۱دَ سالِ هفتُمِ پادشاهی ییهُو، یوآش پادشاه شُد و مُدَتِ چِل سال دَ اورُشَلیم پادشاهی کد. نامِ آبِه شی صِبیه و از مردُمِ بِئیرشِبَع بُود. ۲یوآش دَ تمامِ روزای که یهویاداع پیشوا اُو ره تعلِیم مِیدَد، چِیزای ره که دَ نظرِ خُداوند دُرُست بُود دَ جای میوُرد. ۳لیکِن عِبادت‌گاه های جای‌های بِلند از بَین بُرده نَشُد و مردُم هنوز ام دَ جای‌های بِلند قُربانی تقدِیم مُوکد و بُخورِ خوشبُوی مُوسوختَند.
۴ دَ امزُو زمان یوآش دَ پیشوایو گُفت: ”تمامِ نُقرِه که دَ عِنوانِ هدیِه مُقَدَّس دَ خانِه خُداوند اَوُرده مُوشه، چی نُقرِه هدیِه سرشُماری، چی نُقرِه که دَ بَلِه یَگو کس نَذر گشته و چی نُقرِه که دِلِ یَگو کس مُوشه و دَ خانِه خُداوند میره، ۵پیشوایو باید اُونا ره از هر نفرِ هدیه کُنِنده بِگِیره و بَلدِه جور کدونِ خرابی های خانِه خُداوند، دَ هر جای شی که مِینگره، دَ مصرَف بِرسَنه.“ ۶لیکِن تا سالِ بِیست و سِوّمِ پادشاهی یوآش، پیشوایو خرابی های خانِه خُداوند ره جور نَکدُد. ۷امزی خاطر یوآش پادشاه یھویاداع پیشوا و دِیگه پیشوایو ره کُوی کده دَزوا گُفت: ”چرا خرابی های خانِه خُداوند ره جور نَکدید؟ بعد ازی دِیگه از هدیه کُنِنده ها نُقره نَگِیرِید، بَلکِه بَلدِه جور کدونِ خرابی های خانِه خُداوند تحوِیل کُنِید.“ ۸پس پیشوایو قبُول کد که دِیگه از مردُم نُقره نَگِیره و خرابی های خانِه خُداوند ره ام جور نَکنه.
۹اوخته یھویاداع پیشوا یگ صندُوق ره گِرِفته سر شی ره سُلاخ کد و دَ پالُوی قُربانگاه، دَ طرفِ راستِ راهی که مردُم دَ خانِه خُداوند داخِل مُوشُد، ایشت. پیشوایونی که نِگاهوانای درگِه داخِل شُدو بُود، تمامِ نُقرِه ره که دَ خانِه خُداوند اَوُرده مُوشُد، دَ مَنِه صندُوق مِیندَخت. ۱۰وختی مِیدِید که دَ صندُوق نُقره کَلو شُده، اوخته مُنشی پادشاه و پیشوای بُزُرگ اَمَده نُقره ره که دَ خانِه خُداوند بُود حِساب مُوکد و دَ خلطه ها پُر کده دان شی ره بسته مُوکد. ۱۱بعد ازُو نُقرِه حِساب شُده ره دَ دِستِ سرکارگرای که مسئُولِ جور کدونِ خرابی های خانِه خُداوند بُود تسلِیم مُوکد و اُونا امزُو نُقره مُزدِ کارگرای ره که دَ خانِه خُداوند کار مُوکد مِیدَد، مُزدِ نجارا، اُستاکارا، ۱۲گِلکارا و سنگتراشا ره. اُونا امچُنان امزُو نُقره بَلدِه خرِیدونِ چیو و سنگای تَراش شُده که بَلدِه جور کدونِ خرابی های خانِه خُداوند دَ کار مورفت و بَلدِه هر خَرچِ دِیگِه که دَ جور کدونِ خانِه خُداوند لازِم بُود، مصرَف مُوکد. ۱۳پس بَلدِه خانِه خُداوند جامَک های نُقره‌یی، چِراغ گُلگَرَک ها، کاسه ها، شیپُورها و هیچ ظرفِ طِلّایی یا نُقره‌یی دِیگه از نُقرِه که دَ خانِه خُداوند اَوُرده مُوشُد، جور نَشُد، ۱۴چُون امُو نُقره دَ سرکارگرا دَده مُوشُد تا خرابی های خانِه خُداوند ره قد شی جور کنه. ۱۵از مسئُولِینِ نُقره که مُزدِ کارگرا ره مِیدَد حِساب گِرِفته نَمُوشُد، چراکه اُونا صادِقانه رفتار مُوکد. ۱۶لیکِن پَیسِه قُربانی های جُرم و قُربانی های گُناه دَ خانِه خُداوند اَوُرده نَمُوشُد، چراکه حقِ پیشوایو بُود.
۱۷دَ امزُو غَیت حزائیل پادشاهِ ارام باله اَمَده دَ بَلِه شارِ جَت حَمله کد و اُو ره تَصَرُف کد. بعد ازُو حزائیل رُخ سُون اورُشَلیم کد تا دَ بَلِه ازُو ام حَمله کنه، ۱۸لیکِن یوآش پادشاهِ یهُودا پگِ چِیزای وَقف شُده ره که بابه‌کَلونای شی یهوشافاط، یهورام و اَخَزیاه پادشایونِ گُذشتِه یهُودا وَقف کدُد و ام چِیزای ره که خود شی وَقف کدُد قد تمامِ طِلّای که دَ خزانِه خانِه خُداوند و دَ قصرِ پادشاه بُود، گِرِفته دَ حزائیل پادشاهِ ارام رَیی کد و حزائیل از اورُشَلیم پس رفت.
۱۹باقی کارای یوآش و چِیزای که کد، دَ کِتابِ تَوارِیخِ پادشایونِ یهُودا نوِشته یَه. ۲۰خِدمتگارای یوآش باله شُده دَ ضِدِ ازُو نَقشه کشِید و اُو ره دَ بَیت-مِلّو دَ راهی که طرفِ سِلّا تاه مُوشه کُشت. ۲۱ اَرے، خِدمتگارای شی یوزاباد باچِه شِمِعَت و یهوزاباد باچِه شومیر اُو ره زَده کُشت. اُو دَ مینکلِ بابه‌کَلونای خُو دَ شارِ داوُود دَفن شُد و باچِه شی اَمَصیا دَ جای ازُو پادشاه شُد.