۱مَنَسّی دوازده ساله بُود که پادشاه شُد و پِنجاه و پَنج سال دَ اورُشَلیم پادشاهی کد. نامِ آبِه شی حِفصِیبه بُود. ۲اُو چِیزای ره که دَ نظرِ خُداوند بَد بُود انجام دَد و از کارای زِشتِ مِلَّت های پَیرَوی کد که خُداوند اُونا ره از پیشِ رُوی بَنی اِسرائیل هَی کدُد. ۳اُو عِبادت‌گاه های جای های بِلند ره که آتِه شی حِزقیا بیرو کدُد، دُوباره آباد کد، بَلدِه بَعل قُربانگاه ها تَیار کد، ستُونِ اَشیره ره رقمی که اَخاب پادشاهِ اِسرائیل جور کدُد، جور کد و دَ برابرِ تمامِ لشکرِ آسمو سَجده کده اُونا ره پرَستِش کد. ۴اُو قُربانگاه ها ره دَ خانِه خُداوند آباد کد، دَ جایی که خُداوند دَ بارِه شی گُفتُد: ”ما نام خُو ره دَ اورُشَلیم قرار مِیدیُم.“ ۵ اَرے، اُو بَلدِه لشکرِ آسمو دَ هر دُو حَولی خانِه خُداوند قُربانگاه ها آباد کد. ۶اُو باچِه خُو ره دَ آتِش تقدِیم کد، پالگری و جادُوگری کد و از کسای که اَرواح ره حاضِر مُوکد و قد جِنیات سر-و-کار دَشت مشوَره گِرِفت. اُو دَ نظرِ خُداوند غَدر کَلو شرارَت کد و قارِ خُداوند ره باله اَوُرد. ۷اُو بُتِ اَشیره ره که جور کدُد، دَ خانِه قرار دَد که خُداوند دَ بارِه شی دَ داوُود و دَ باچِه شی سُلَیمان گُفتُد: ”ما دَ امزی خانه و دَ اورُشَلیم که از مینکلِ پگِ طایفه های اِسرائیل اِنتِخاب کدیم نام خُو ره تا اَبَد قرار مِیدیُم ۸و پایای اِسرائیل ره از سرزمِینی که دَ آته‌گونِ ازوا دَدیم دِیگه آواره نَمُونُم، دَ شرطی که اُونا فِکر خُو ره بِگِیره و دَ مُطابِقِ چِیزای که دَزوا اَمر کدیم و دَ مُطابِقِ شریعتی که خِدمتگار مه مُوسیٰ دَزوا اَمر کده، رفتار کنه.“ ۹لیکِن اُونا گوش نَگِرِفت؛ پس مَنَسّی اُونا ره گُمراه کد و اُونا از مِلَّت های که خُداوند از پیشِ رُوی بَنی اِسرائیل هَی کدُد، بَدتَر رفتار کد.
۱۰اوخته خُداوند دَ وسِیلِه خِدمتگارای خو اَنبیا اینی پَیغام ره رَیی کد و اَنبیا گُفت: ۱۱”ازی که مَنَسّی پادشاهِ یهُودا امی رقم کارای زِشت ره انجام دَده و از اَموریای که پیش ازُو دَ اِی سرزمی بُود بَدتَر رفتار کده و قد بُت‌های خُو باعِث شُده که یهُودا ام گُناه کنه، ۱۲خُداوند، خُدای اِسرائیل اینی رقم مُوگیه، ’اینه، ما دَ بَلِه اورُشَلیم و یهُودا بَلا نازِل مُونُم، دَ اندازِه که هر کس بِشنَوه، گوشای شی جرِینگَس کنه. ۱۳ما دَ بَلِه اورُشَلیم تارِ رجِه سامِره و شاقُولِ خانِه اَخاب ره دِراز مُونُم و اورُشَلیم ره پاک مُونُم، رقمِ کسی که یگ کاسه ره پاک مُونه و دَ غَیتِ پاک کدو چَپه و راسته مُونه. ۱۴ما باقی‌مَندِه میراث خُو ره بےپَناه ایله مُونُم و اُونا ره دَ دِستِ دُشمَنای شی تسلِیم مُونُم و اُونا دَ وسِیلِه تمامِ دُشمَنای خُو چُور و چَپاوُل مُوشه، ۱۵چُون اُونا چِیزای ره که دَ نظرِ ازمه بَد اَسته انجام دَده و از روزی که بابه‌کَلونای ازوا از مِصر بُرو اَمَده تا اِمروز قار مَره باله اَوُرده رَیی یَه.‘“
۱۶علاوه ازی، مَنَسّی خُونِ بیگُناه ها ره از حَد کَلو ریختَند، دَ اندازِه که سراسرِ اورُشَلیم ره پُر کد، اِی گُناهِ ازُو جدا از گُناهی بُود که اُو باعِث شُد تا یهُودا گُناه کنه و چِیزای ره که دَ نظرِ خُداوند بَد بُود، انجام بِدیه.
۱۷باقی کارای مَنَسّی و پگِ چِیزای که کد و گُناهی ره که مُرتکِب شُد، دَ کِتابِ تَوارِیخِ پادشایونِ یهُودا نوِشته یَه. ۱۸وختی مَنَسّی فَوت کده قد بابه‌کَلونای خُو خاو کد و دَ باغِ قصر خُو، یعنی دَ باغِ عُزّا دَفن شُد، باچِه شی آمون دَ جای ازُو پادشاه شُد.
۱۹آمون بِیست و دُو ساله بُود که پادشاه شُد و دُو سال دَ اورُشَلیم حُکمرانی کد. آبِه شی مِشُلِمِت نام دَشت؛ اُو دُخترِ حارُوص از یُطبَه بُود. ۲۰اُو چِیزای ره که دَ نظرِ خُداوند بَد بُود انجام دَد، رقمی که آتِه شی مَنَسّی انجام دَدُد. ۲۱اُو دَ مُطابِقِ پگِ راه های آتِه خُو رفتار کد و بُت ھای ره که آتِه شی پرَستِش کدُد، اُو ام پرَستِش کده اُونا ره سَجده کد. ۲۲اُو خُداوند، خُدای بابه‌کَلونای خُو ره ایله کد و دَ مُطابِقِ راه-و-طرِیقِ خُداوند رفتار نَکد.
۲۳اوخته خِدمتگارای آمون پادشاه دَ خِلافِ ازُو نَقشه کشِید و اُو ره دَ قصر شی کُشت. ۲۴لیکِن مردُمِ سرزمِینِ یهُودا تمامِ کسای ره که دَ خِلافِ آمون پادشاه نَقشه کشِیدُد، از بَین بُرد و باچِه شی یوشیا ره دَ جای ازُو پادشاه جور کد. ۲۵باقی کارای که آمون کد، دَ کِتابِ تَوارِیخِ پادشایونِ یهُودا نوِشته یَه. ۲۶وختی آمون دَ قبر خُو دَ باغِ عُزّا دَفن شُد، باچِه شی یوشیا دَ جای ازُو پادشاه شُد.