۱بعد از چند وخت داوُود فَلَسطِینیا ره زَده سرکوب کد و مِتِگ-اَمّاه ره از دِستِ فَلَسطِینیا گِرِفت. ۲اُو موآبیا ره ام شِکست دَد. اُو اُونا ره دَ رُوی زمی خاوَلجی کده قد ریسپو اندازه کد و از هر سِه اندازِه ریسپو دُو اندازِه شی ره کُشت و اندازِه سِوّم ره زِنده ایشت. پس موآبیا خِدمتگارای داوُود شُد و دَزُو جَزیه مِیدَد.
۳داوُود هدَد-عِزِر باچِه رِحوب، پادشاهِ صوبه ره وختِیکه مورفت تا قُدرت خُو ره دَ بَغلِ دریای فَرات بسم دَ دِست بیره، زَد. ۴و داوُود یگ هزار و ھفت صد سوار و بِیست هزار عسکرِ پیدِه ازُو ره اسِیر گِرِفت و سِنگِیرِ پایای تمامِ اَسپای گاڈی های جنگی ره مُنٹی کد، لیکِن بَلدِه صد گاڈی جنگی امزُو اَسپ ها نِگاه کد. ۵وختی مردُمِ ارام از دَمِشق اَمَد که دَ هدَد-عِزِر پادشاهِ صوبه کومَک کنه، داوُود بِیست و دُو هزار نفر ازوا ره ام کُشت. ۶داوُود دَ منطقِه مردُمِ ارام دَ دَمِشق پَیره‌دارخانه ها قرار دَد و ارامیا خِدمتگارِ داوُود شُد و دَزُو جَزیه مِیدَد. دَ امزی رقم خُداوند دَ داوُود دَ هر جای که مورفت پیروزی مِیدَد. ۷داوُود سِپرھای طِلّایی ره که دَ پیشِ خِدمتگارای هدَد-عِزِر بُود گِرِفت و دَ اورُشَلیم اَوُرد. ۸امچُنان از باته و بیروتای که شارای هدَد-عِزِر بُود، داوُود پادشاه برونزِ بےاندازه کَلو دَ دِست اَوُرد.
۹وختی توعی پادشاهِ حمات شِنِید که داوُود تمامِ لشکرِ هدَد-عِزِر ره شِکست دَده، ۱۰اُو باچِه خُو یورام ره دَ پیشِ داوُود پادشاه رَیی کد تا احوالِ سلامَتی ازُو ره پُرسان کنه؛ و ازی که داوُود قد هدَد-عِزِر جنگ کده و اُو ره شِکست دَده، بَلدِه شی تبرِیک بُگیه، چُون هدَد-عِزِر قد توعی جنگ دَشت. یورام بَلدِه ازُو چِیزای نُقره‌یی، طِلّایی و برونزی اَوُردُد. ۱۱داوُود پادشاه امی چِیزا ره ام دَ خُداوند وَقف کد، امُو رقم که نُقره و طِلّا ره از پگِ مِلَّت های شِکست خورده وَقف کدُد، ۱۲ یعنی از ارام، موآب، عمونیا، فَلَسطِینیا، عمالیقیا و وُلجِه هدَد-عِزِر باچِه رِحوب، پادشاهِ صوبه.
۱۳داوُود دَ غَیتِ پس اَمَدو هژده هزار نفرِ اِدومیا ره دَ دَرِّه نَمَک زَد و دَمزی رقم بَلدِه خُو نامِ کٹه کَمایی کد. ۱۴اُو دَ اِدوم پَیره‌دارخانه ها قرار دَد، یعنی دَ تمامِ اِدوم؛ و پگِ اِدومیا خِدمتگارِ داوُود شُد. دَ امزی رقم خُداوند دَ داوُود دَ هر جای که مورفت پیروزی مِیدَد.
۱۵داوُود دَ بَلِه تمامِ اِسرائیل پادشاهی مُوکد و عدالت و اِنصاف ره دَ مینکلِ پگِ قَوم خُو دَ جای میوُرد. ۱۶یوآب باچِه صَرُویه قومَندانِ لشکر بُود و یهوشافاط باچِه اَخِیلُود کاتِب؛ ۱۷صادوق باچِه اَخِیطُوب و اَخِیمَلِک باچِه اَبیاتار پیشوایو بُود و سِرایا مُنشی؛ ۱۸بِنایاه باچِه یهویاداع قومَندانِ کریتیا و فِلِتیا بُود و باچه های داوُود مقامِ پیشوایی دَشت.