۱پگِ مردُمِ دُنیا دَ یگ زِبو و لهجه گپ مِیزَد. ۲وختی مردُم سُون شَرق کوچ کد، اُونا یگ دَشت ره دَ سرزمِینِ شِنعار پَیدا کد و دَ اُونجی جای-دَ-جای شُد. ۳اُونا قد یگدِیگِه خُو گُفت: ”بیِید که خِشت بِریزَنی و اُونا ره خُوب پُخته کنی.“ اُونا دَ جای سنگ از خِشت و دَ جای گَج از قِیر اِستِفاده کد. ۴اوخته اُونا گُفت: ”بیِید که یگ شار بَلدِه خُو آباد کنی و یگ بُرج که سر شی دَ آسمو بِرَسه، تا بَلدِه خُو یگ نام جور کنی. اگه نَه دَ رُوی تمامِ زمی تِیت‌پَرَک مُوشی.“
۵اوخته خُداوند تاه اَمَد تاکه شار و بُرجی ره که بَنی آدم آباد کدُد، بِنگره. ۶و خُداوند گُفت: ”اونه! اُونا یگ مردُم اَسته و زِبونِ پگ شی یگه. و اِی فقط شُروعِ کارِ ازوا یَه. اینالی هر کاری ره که اُونا قَصدِ انجام دَدون شی ره کنه، بَلدِه ازوا نامُمکِن نِییه. ۷بیِید که تا بوری و زِبونِ ازوا ره گڈوَڈ کنی تاکه اُونا تورِه یگدِیگِه خُو ره نَفامه.“ ۸اوخته خُداوند اُونا ره از اُونجی دَ تمامِ رُوی زمی تِیت‌پَرَک کد و اُونا از آباد کدونِ شار دِست بَله کد. ۹امزی خاطر اُونجی ره بابُل نام ایشت چراکه خُداوند دَ اُونجی زِبونِ تمامِ مردُمِ دُنیا ره گڈوَڈ کد و از اُونجی خُداوند اُونا ره دَ تمامِ رُوی زمی تِیت‌پَرَک کد.
۱۰اینیا نسل های سام اَسته: وختی سام صد ساله بُود، یعنی دُو سال بعد از طوفان، اُو آتِه اَرفَکشاد شُد. ۱۱بعد از پَیدا شُدونِ اَرفَکشاد، سام پَنج صد سالِ دِیگه زِندگی کد و صاحِبِ دِیگه باچه ها و دُخترو شُد. ۱۲وختِیکه اَرفَکشاد سی و پَنج ساله بُود، اُو آتِه شالِح شُد. ۱۳بعد از پَیدا شُدونِ شالِح، اَرفَکشاد چار صد و سِه سالِ دِیگه زِندگی کد و صاحِبِ دِیگه باچه ها و دُخترو شُد. ۱۴وختِیکه شالِح سی ساله بُود اُو آتِه عِبِر شُد. ۱۵بعد از پَیدا شُدونِ عِبِر، شالِح چار صد و سِه سالِ دِیگه زِندگی کد و صاحِبِ دِیگه باچه ها و دُخترو شُد. ۱۶وختِیکه عِبِر سی و چار ساله بُود، اُو آتِه فِلِج شُد. ۱۷بعد از پَیدا شُدونِ فِلِج. عِبِر چار صد و سی سالِ دِیگه زِندگی کد و صاحِبِ دِیگه باچه ها و دُخترو شُد. ۱۸وختِیکه فِلِج سی ساله بُود اُو آتِه رِعُو شُد. ۱۹بعد از پَیدا شُدونِ رِعُو، فِلِج دُو صد و نُه سالِ دِیگه زِندگی کد و صاحِبِ دِیگه باچه ها و دُخترو شُد. ۲۰وختِیکه رِعُو سی و دُو ساله بُود اُو آتِه سَرُوج شُد. ۲۱بعد از پَیدا شُدونِ سَرُوج، رِعُو دُو صد و هفت سالِ دِیگه زِندگی کد و صاحِبِ دِیگه باچه ها و دُخترو شُد. ۲۲وختِیکه سَرُوج سی ساله بُود اُو آتِه ناحور شُد. ۲۳بعد از پَیدا شُدونِ ناحور، سَرُوج دُو صد سالِ دِیگه زِندگی کد و صاحِبِ دِیگه باچه ها و دُخترو شُد. ۲۴وختِیکه ناحور بِیست و نُه ساله بُود اُو آتِه تارَح شُد. ۲۵بعد از پَیدا شُدونِ تارِح، ناحور یگ صد و نُزده سال زِندگی کد و صاحِبِ دِیگه باچه ها و دُخترو شُد. ۲۶وختِیکه تارَح هفتاد ساله بُود اُو آتِه اَبرام، ناحور و هاران شُد.
۲۷اینیا نسل های تارَح اَسته: تارَح آتِه اَبرام، ناحور، و هاران شُد. و هاران آتِه لوط شُد. ۲۸هاران پیشِ رُوی آتِه خُو تارَح دَ اُورِ کَلدانیا، یعنی سرزمِینِ که پَیدا شُدُد، فَوت کد. ۲۹اَبرام و ناحور، هر دُوی شی خاتُو کد. نامِ خاتُونِ اَبرام، سارای بُود و نامِ خاتُونِ ناحور، مِلکه که دُخترِ هاران بُود. هاران آتِه مِلکه و یِسکه. ۳۰ولے سارای سَنڈه بُود، یعنی اَولاد نَدَشت.
۳۱تارَح باچِه خُو اَبرام و نوسِه خُو لوط ره که باچِه هاران بُود و بیری خُو سارای ره که خاتُونِ اَبرام بُود، گِرِفت و از اُورِ کَلدانیا بُر شُد که طرفِ سرزمِینِ کِنعان بوره. مگم وختِیکه دَ شارِ حَران رسِید، دَ اُونجی مَند. ۳۲روزای عُمرِ تارَح دُو صد و پَنج سال بُود و تارَح دَ حَران فَوت کد.