۱پس اَبرام قد خاتُون خُو و تمامِ دارایی خُو از مِصر دَ جنُوبِ کِنعان اَمَد؛ و لوط ام قد شی قتی بُود. ۲اَبرام از نِگاهِ گَله-و-رمه و نُقره و طِلّا غَدر دَولتمَند بُود. ۳اُو از جنُوب کوچ کده دَ بَیت‌ئیل اَمَد، دَمزُو جای که اوّل خَیمه زَدُد، یعنی دَ مینکلِ بَیت‌ئیل و عای، ۴دَ جای که دَفعِه اوّل قُربانگاه جور کدُد. دَ امُونجی اَبرام بسم نامِ خُداوند ره گِرِفته عِبادت کد.
۵لوط که قد اَبرام بُود، اُو ام گَله و رمه و خَیمه ها دَشت. ۶و امُو زمی اُوقَس گُنجایش نَدَشت که اُونا یگجای زِندگی کنه، چُون مال-و-دارایی ازوا دَ اندازِه کَلو بُود که اُونا نَمِیتنِست یگجای زِندگی کنه. ۷و دَ بَینِ چوپونای رَمِه اَبرام و چوپونای رَمِه لوط نِزاع پَیدا شُد. دَ اُو زمان کِنعانی ها و فِرِزی ها دَمزُو سرزمی زِندگی مُوکد.
۸پس اَبرام دَ لوط گُفت: ”خُوب نِییه که دَ بَینِ ازمه و ازتُو و دَ بَینِ چوپونای ازمه و چوپونای ازتُو جنجال بَشه، چُون مو بِرار اَستی. ۹آیا تمامِ امزی سرزمی دَ پیش رُوی تُو واز نِییه؟ پس از مه جدا شُو؛ اگه تُو طرفِ چَپ موری، ما طرفِ راست مورُم، و اگه تُو طرفِ راست موری، ما طرفِ چَپ مورُم.“ ۱۰اوخته لوط باله توخ کد و دِید که تمامِ دَرِّه اُردُن تا منطقِه صوغَر مِثلِ باغِ خُداوند و یا مِثلِ سرزمِینِ مِصر سیر آو اَسته. اِی زمانی بُود که خُداوند شارای سَدُوم و عمُوره ره خراب نَکدُد. ۱۱پس لوط تمامِ دَرِّه اُردُن ره اِنتِخاب کد و سُون شَرق کوچ کد. دَمزی رقم اُونا از یگدِیگه خُو جدا شُد. ۱۲اَبرام دَ سرزمِینِ کِنعان مَند و لوط دَ شارای دَرِّه اُردُن جای-دَ-جای شُده خَیمِه خُو ره تا سَدُوم بُرد. ۱۳مگم مردُمِ سَدُوم دَ نظرِ خُداوند غَدر بَدکار و گُناهکار بُود.
۱۴بعد از جدا شُدونِ لوط از اَبرام، خُداوند دَ اَبرام گُفت: ”آلی باله توخ کُو و از جای که ایسته یی سُون شمال و جنُوب، و شَرق و غَرب بِنگر، ۱۵چُون پگِ امزی سرزمی ره که مِینگری، تا اَبَد دَز تُو و نسل تُو مُوبخشُم. ۱۶ما نسل تُو ره مِثلِ ریگِ دریا جور مُونُم. اگه کس ریگِ دریا ره حِساب کده بِتَنه، نسلِ ازتُو ره ام حِساب کده مِیتنه. ۱۷باله شُو و دَ دِرازی و بَرِ امزی سرزمی بِگرد، چُون ما اِی ره دَز تُو مُوبخشُم.“ ۱۸پس اَبرام خَیمِه خُو ره جَم کد و دَ بَلُوطِستانِ مَمری دَ منطقِه حِبرون اَمَده جای-دَ-جای شُد و دَ اُونجی بَلدِه خُداوند یگ قُربانگاه آباد کد.