۱بعد ازُو یعقُوب باچههای خُو ره کُوی کده گُفت: ”گِرد مه جَم شُنِید تا دَز شُمو بُگُم که دَ آینده چی واقِعه ها دَ سر شُمو مییه.
۲اَی باچه های یعقُوب! جَم شُنِید و گوش بِگِیرِید،
دَ تورای آتِه خُو اِسرائیل گوش بِدِید!
۳رئـوبین، تُو باچِه اوّلباری مه اَستی،
تَوانایی مه و اوّلِین ثَمرِ قُوَت مه،
بِلند مَرتبه دَ مقام و بِلند مَرتبه دَ قُدرت،
۴سرشار مِثلِ آوِ دریا، مگم بِلند مَرتبه نَمُومَنی،
چراکه دَ بَلِه جاگِه آتِه خُو بُر شُدی،
و اُو ره بے عِزَت کدی؛ اَرے، تُو دَ بَلِه جای خاو مه بُر شُدی.
۵شِمعون و لاوی بِرارو اَسته،
شمشیرای ازوا آلاتِ ظُلم.
۶اَی جان مه، دَ مشوَرِه ازوا شرِیگ نَشُو!
اَی روح-و-رَوان مه، قد جَم ازوا یگجای نَشُو،
چراکه اُونا دَ وختِ قار خُو آدم کُشت
و بَلدِه ساعت تیری خُو سِنگِیرِ پای گاو ها ره مُنٹی کد.
۷نالَت دَ قارِ ازوا که وَحشتناک اَسته
و دَ غَضَبِ ازوا که بےرَحم اَسته!
ما اُونا ره دَ سرزمِینِ یعقُوب تقسِیم مُونُم
و اُونا ره دَ اِسرائیل تِیت‌پَرَک مُوکنُم.
۸یهُودا، بِرارون تُو، تُو ره تعرِیف-و-تَوصِیف مُونه.
دِست تُو دَ پسِ گردونِ دُشمَنای تُو اَسته
و باچه های آتِه تُو دَ برابر تُو خود ره خَم کده اِحتِرام مُونه.
۹یهُودا، تُو یگ شیرِ نَوجوان اَستی،
باچِه مه، تُو از شِکار خُو باله شُدی.
اُو خود ره جَم کده رقمِ شیر خاو مُونه، رقمِ شیرِ غُران؛
کِی مِیتنه اُو ره بِخیزَنه؟
۱۰تَیاقِ پادشاهی از دِستِ یهُودا دُور نَمُوشه
و نَه ام سوٹه-چیوِ حُکمرانی از مینکلِ پایای شی
تا وختی امُو شخص بییه
که قَوما از شی اِطاعَت مُونه.
۱۱اُو اُلاغِ جوان خُو ره دَ تاکِ انگُور بسته مُونه
و کُرِه اُلاغ خُو ره دَ خُوبتَرِین تاکِ انگُور؛
اُو کالای خُو ره دَ شرابِ انگُور مُوشویه
و چَپَن خُو ره قد خُونِ انگُور.
۱۲چِیمای شی از شرابِ انگُور روشوتَر اَسته
و دَندونای شی سفیدتَر از شِیر.
۱۳زِبُولُون دَ بَغلِ دریا جای-دَ-جای مُوشه؛
منطقِه ازُو بندرِ کِشتیها جور مُوشه
و سرحد ازُو تا منطقِه صَیدون مِیرَسه.
۱۴یسّاکار مِثلِ یگ اُلاغِ قَوی اَسته
که دَ مینکلِ قوتونا خاو کده.
۱۵اُو دِید که جای خاوِ ازُو خُوب اَسته
و زمِین شی خوش آیند.
اُو پُشت خُو ره بَلدِه بار خَم کد
و تابِع کارِ اِجباری شُد.
۱۶دان دَ بَلِه قَومای خُو قضاوَت مُوکُنه
مِثلِ یکی از طایفه های اِسرائیل.
۱۷دان یگ مار دَ بَغلِ راه اَسته
یگ تِیر مار دَ سرِ راه
که پُشتِ پای اَسپ ره مِیگزه
تا سَوار شی پَسکی بُفته.
۱۸اَی خُداوند، ما چِیم دَ راهِ نِجات تُو اَستُم!
۱۹جاد ره غارَتگرا غارَت مُوکُنه
مگم اُو اُونا ره دُمبال مُونه.
۲۰اَشِیر نان شی چرب اَسته
و اُو خوراکِ مَزه‌دارِ شاهانه تَهیه مُونه.
۲۱نَفتالی یگ آهُو اَسته که آزادانه مُودَوه
و آهُو-بارههای نُوربَند مِیزَیه.
۲۲یوسُف تاگِ انگُورِ پُرثَمر اَسته
یگ تاکِ پُرثَمر دَ بیخِ چشمِه
که شاخچه های شی دَ سرِ دیوال بُر مُوشه.
۲۳تِیراَندازا دَ بَلِه ازُو بےرَحمانه حَمله کد
اُونا سُون شی تِیر اَندخته اُو ره اَزار-و-اَذیَت کد.
۲۴مگم کَمونِ ازُو دَ قُوَت-و-زور خُو باقی مَند
و بازُو های شی دَ وسِیلِه دِستِ خُدای قُدرتمَندِ یعقُوب قَوی جور شُد،
دَ وسِیلِه هِدایت کُنِنده اِسرائیل،
۲۵دَ وسِیلِه خُدای آتِه تُو که تُو ره کومَک مُوکُنه،
دَ وسِیلِه قادِرِ مُطلَق که تُو ره بَرکَت مِیدیه
قد بَرکت های آسمو از عالمِ باله
و بَرکت های غَوُجی ها که دَ تَی زمی اَسته،
و بَرکت های پِستونا و رَحم.
۲۶بَرکت های آتِه تُو
بُزُرگتَر از بَرکَت های کوه های اَبَدی اَسته
و بُزُرگتَر از سرحدای تِپه های قدِیمی؛
دُعا مُونُم که اُونا دَ سر یوسُف قرار بِگِیره،
دَ تولغِه امزُو که از مینکلِ بِرارون خُو اِنتِخاب شُد.
۲۷بِنیامِین یگ گُرگِ دَرِنده یَه
که دَ وختِ صُبح شِکار کده مُوخوره
و دَ وختِ شاو وُلجه ره تقسِیم مُونه.“
۲۸اینَمیا دوازده طایفِه اِسرائیل اَسته؛ و اینَمی ام توره های بُود که آتِه ازوا دَ وختِ بَرکَت دَدو دَزوا گُفت و هر کُدَم شی ره مُطابِقِ حالِ شی بَرکَت دَد.
۲۹پس یعقُوب اُونا ره وصیَت کده گُفت: ”ما دَ زُودی قد قَوم خُو یگجای مُوشُم. مَره دَ پالُوی بابه‌کَلونای مه دَ غاری که دَ زمِینِ عِفرونِ حِتّی اَسته دَفن کُنِید، ۳۰دَمزُو غاری که دَ منطقِه مَکفیله دَ نزدِیکِ مَمری دَ سرزمِینِ کِنعان اَسته، دَ امزُو غاری که اِبراهِیم اُو ره قد زمی از عِفرونِ حِتّی بَلدِه قبرِستو خرِید. ۳۱اِبراهِیم و خاتُون شی ساره دَ امُونجی دَفن اَسته؛ اِسحاق و خاتُون شی رِبِکا دَ امُونجی دَفن شُده؛ و ما ام لیه ره دَ امُونجی دَفن کدُم. ۳۲امُو زمی و غاری که دَزشی اَسته از بَنی حِت خرِیده شُده.“ ۳۳وختِیکه وصیَتِ یعقُوب دَ باچه های شی تامو شُد، اُو پایای خُو ره دَ بَلِه جاگِه خُو جوره کد و آخِرِین نَفَسای خُو ره کشِیده قد قَوم خُو یگجای شُد.