کِتابِ حَگَی نَبی

فصلِ اوّل

حُکم بَلدِه تکمِیل کدونِ خانِه خُدا

۱دَ سالِ دوّمِ حُکمرانی داریوش پادشاه، دَ روزِ اوّلِ ماهِ شَشُم کلامِ خُداوند دَ وسِیلِه حَگَی نَبی دَ زِروبابِل باچِه شِئَلتِیئیل والی یهُودا و دَ یهوشُعَ باچِه یهوصادق پیشوای بُزُرگ رَسَنده شُد که اینی رقم بُود:

۲خُداوندِ لشکر‌ها اینی رقم مُوگیه: ”اِی قَوم مُوگیه، ’وخت شی هنوز نَمَده که خانِه خُداوند دُوباره آباد شُنه.‘“

۳اوخته کلامِ خُداوند دَ وسِیلِه حَگَی نَبی اَمَده گُفت: ۴”آیا بَلدِه شُمو وخت شی اَسته که شُمو دَ خانه‌های مُزَیَن-شُده زِندگی کنِید و اِی خانه خراب باقی بُمَنه؟“

۵پس آلی خُداوندِ لشکر‌ها اینی رقم مُوگیه: ”دَ بارِه راه-و-رفتار خُو دَ دِل خُو فِکر کنِید. ۶شُمو غَدر کِشت کدِید، ولے حاصِلِ کَم گِرِفتِید؛ شُمو مُوخورِید، ولے سیر نَمُوشِید؛ شُمو وُچی مُونِید، ولے طَبع-خوش نَمُوشِید؛ شُمو کالا مُوپوشِید، ولے گرم نَمُوشِید و شُمو که مُزد مِیگِیرِید، مُزد خُو ره دَ خلطِه سُلاخ پورته مُوکُنِید.“

۷خُداوندِ لشکر‌ها اینی رقم مُوگیه: ”دَ بارِه راه-و-رفتار خُو دَ دِل خُو فِکر کنِید. ۸دَ کوهِستو بورِید و چیو اَوُرده خانه ره آباد کنِید تا از دِیدون شی خوش شُنُم و جلال مه دَ اُونجی ظاهِر شُنه.“اِی ره خُداوند مُوگیه. ۹”شُمو چِیم دَ راهِ کَلو بُودِید، ولے اینه، کَم حاصِل کدِید و غَیتِیکه خانه اَوُردِید ما اُو ره ام دَ باد دَدُم. چرا؟ بخاطری که خانِه ازمه خراب باقی مَنده و شُمو هر کُدَم شُمو دَ عَجَله خانِه خُو مورِید.“اِی ره خُداوندِ لشکر‌ها مُوگیه. ۱۰”امزی خاطر آسمونا دَ بَلِه شُمو شبنم خُو ره بَند کده و زمی حاصِل خُو ره. ۱۱ما دَ بَلِه زمی و کوهِستو خُشکسالی ره کُوی کدیم؛ دَ بَلِه غَلّه-و-دانه، شِیرِه انگُور، روغونِ زَیتُون، چِیزای که از زمی مُورویه و دَ بَلِه اِنسانا و حَیوانا، اَرے، دَ بَلِه تمامِ حاصِلِ زَحمتِ دِستای شُمو.“

۱۲اوخته زِروبابِل باچِه شِئَلتِیئیل، یهوشُعَ باچِه یهوصادق پیشوای بُزُرگ و پگِ باقی‌مَنده‌های قَوم از آوازِ خُداوند، خُدای خُو و از توره‌های حَگَی نَبی که خُداوند، خُدای ازوا اُو ره رَیی کدُد اِطاعَت کد و ترس-و-اِحترامِ خُداوند دَ دِلِ مردُم جای گِرِفت.

۱۳دَ امزُو غَیت حَگَی پَیغمبرِ خُداوند، اینی پَیغامِ خُداوند ره بَلدِه قَوم رَسَنده گُفت: ”خُداوند مُوگیه، ’ما قد شُمو اَستُم.‘“ ۱۴و خُداوند روحِ زِروبابِل باچِه شِئَلتِیئیل والی یهُودا، روحِ یهوشُعَ باچِه یهوصادق پیشوای بُزُرگ و روحِ پگِ باقی‌مَنده‌های قَوم ره دَ حَرکت اَوُرد و اُونا اَمَده دَ بَلِه خانِه خُداوندِ لشکر‌ها، خُدای خُو کار ره دُوباره شُروع کد. ۱۵ اِی واقِعه دَ سالِ دوّمِ حُکمرانی داریوش پادشاه، دَ روزِ بِیست و چارُمِ ماهِ شَشُم رُخ دَد.