۱اَی تمامِ قَوم ها، اِی ره بِشنَوِید،
اَی پگِ باشِنده های دُنیا، اِی ره گوش بِگِیرِید؛
۲عام و خاص، دَولَتمَندا و غرِیبا،
پگ شُمو گوش بِگِیرِید:
۳دان مه توره های حکِیمانه مُوگیه؛
فِکرای دِل مه پُر از فامِیدگی اَسته.
۴گوش خُو ره سُون یگ مَثَل مِیگِیرُم؛
و تورِه پوشِیدِه خُو ره قد آوازِ بَربط تشریح مُونُم.
۵چرا دَ روزای بَلا-و-مُصِیبت بِتَرسُم،
دَ غَیتِیکه شرارَتِ خیانَتکارا دَور مَره مِیگِیره،
۶اُونای که دَ مال-و-دَولت خُو تَوَکُل دَره
و از کَلونی دارایی خُو لاف مِیزَنه.
۷یقِیناً، هیچ کس نَمِیتَنه جانِ بِرار خُو ره بازخرِید کُنه،
و نَه ام مِیتَنه بَلدِه ازُو دَ خُدا یگ فِدیه بِدیه؛
۸چراکه فِدیِه جان قِیمَت اَسته
و هرگِز قِیمَت شی پُوره نَمُوشه
۹تا اِنسان بَلدِه اَبَد زِنده بُمنه
و قبر ره نَنگره.
۱۰چُون مو مِینگری که آدمای حکِیم-و-دانا مُومُره
و امُو رقم آدمای بےعقل و بےشعُور ام نابُود مُوشه
و مال-و-دَولت خُو ره بَلدِه دِیگرو ایله مِیدیه.
۱۱اُونا دَ دِل خُو فِکر مُونه که خانه های ازوا تا اَبَد باقی مُومنه
و نسل اَندر نسل جای بُود-و-باشِ ازوا برقرار اَسته؛
اُونا حتیٰ زمِینای خُو ره دَ نام خُو مُونه،
۱۲لیکِن اِنسان دَ شان-و-شَوکت خُو باقی نَمُومَنه،
بَلکِه رقمِ حَیوانا مُومُره.
۱۳اینی سرنوِشتِ کسای اَسته که دَ خود خُو تَوَکُل کده،
و عاقُبَتِ کسای که توره های ازوا ره تایِید مُونه. سِلاه.
۱۴رقمِ گوسپندو اُونا بَلدِه عالمِ مُرده ها تعیِین شُده،
مَرگ، چوپونی ازوا ره مُونه.
صباحگاه آدمای راستکار دَ بَلِه ازوا حُکمرانی مُونه
و شکل های ازوا دَ قبر از بَین موره
که دُور از خانه های ازوا یَه.
۱۵لیکِن خُدا جان مَره از عالمِ مُرده ها بازخرِید مُونه،
چُون اُو مَره دَ حُضُور خُو قبُول مُونه. سِلاه.
۱۶وختِیکه یَگو آدم دَولتمَند مُوشه
و شان-و-شَوکت خانِه شی کَلو شُده موره ترس نَخور،
۱۷چُون وختِیکه اُو بُمُره چِیزی ره قد خُو بُرده نَمِیتنه
و شان-و-شَوکت شی از پُشتِ ازُو دَ گور دَر نَمییه.
۱۸اگرچِه اُو دَ دَورونِ زِندگی خُو، خود ره خوشبَخت مِیدَنه،
و مردُم بخاطرِ روزگارِ خُوب شی اُو ره تعرِیف-و-تَوصِیف مُونه،
۱۹لیکِن اُو قد جَمِ بابه‌کَلونای خُو یگجای مُوشه
و دِیگه هرگِز روشَنی ره نَمِینگره.
۲۰اِنسان نَه دَ شان-و-شَوکت خُو باقی مُومنه و نَه ام دَ عِلم خُو،
اُو رقمِ حَیوانا از بَین موره.