۱ ای صهیونه، شه راویښ، راپاڅه
خپل ځان قوي کړه
ای سپېڅلی ښاره اورشلیمه،
کالي واغونده د خپل شان او شوکت!
په رښتیا به کافران او ناپاکه کسان
بیا هېڅکله داخل نه شي ستا دروازو ته
۲ ای اورشلیمه، ځان ته ټکان ورکړه، ازاد شه!
له خاورو پورته شه او کښېنه په خپل تخت باندې
ای اسیرانو د صهیون، وشلوئ
د غلامۍ زنځیرونه د خپلو غاړو نه
۳ نو څښتن داسې وایي: «تاسو په وړیا توګه خرڅ شوي وئ او هم به په وړیا توګه بېرته واخیستل شئ.»
۴ څښتن تعالی داسې وایي: «ډېره موده مخکې زما قوم مصر ته تللی ؤ چې هلته د پردیو په توګه ژوند وکړي، وروسته اشوریانو هغوی اسیران کړل او بې سببه یې په هغوی ظلم کاوه
۵ او اوس په بابل کې هم په هغوی ظلم کیږي. هغوی په وړیا توګه غلامان شوي دي او د هغوی حاکمان په خپل ځان ویاړي او هر وخت زما نوم سپکوي.
۶ خو هغه ورځ راتلونکې ده چې زما قوم به زما د نوم اقرار وکړي چې زه خدای یم. هو، هغوی به پوه شي چې زه دلته یم او په خپله د هغوی سره خبرې کوم.»
۷ څومره ښکلي دي د پیغام وړونکي قدمونه
چې په غرونو دي روان
چې راوړي زېری د خوشحالۍ او سولې
هغه اعلان کړي د ژغورنې او صهیون ته وایي:
«پاچاهي کوي ستا خدای»
۸ څوک چې ساتنه کړي د ښار، هغه چیغې وهي
هغوی چیغې وهي له خوشحالۍ نه
ځکه هغوی په خپلو سترګو ویني
د څښتن راستنېدل صهیون ته
۹ ای د اورشلیم کنډوالو،
یوځای او په لوړ اواز د خوشحالۍ ووهئ چیغې!
ځکه څښتن به وژغوري خپل ښار
او خپلو خلکو ته به ورکړي تسلي
۱۰ څښتن به کار واخلي له خپل سپېڅلي ځواکه
د ټولو قومونو مخکې
وبه ګوري ټوله نړۍ
زمونږ د خدای ژغورنه
۱۱ ځئ، لاړ شئ، ووځئ له دې ځایه!
څوک چې سامان وړي د څښتن د کور
له بابله ووځئ
پاک کړئ ځانونه خپل
او لاس مه وروړئ ناپاکه شي ته
۱۲ دا ځل به ونه وځئ په بیړه تاسو
له هغه ځایه
تاسو به نه کوئ د تېښتې هڅه
ځکه څښتن به ځي ستاسو نه مخکې
او د شا له خوا به کړي ساتنه ستاسو
د اسراییلو خدای
۱۳ څښتن وایي:
«ګورئ، په خپل کار کې بریالی به وي زما خدمتګار
وي به سرلوړی او ډېر درناوی به یې کیږي
۱۴ خو کله چې ولید هغه ډېرو خلکو
نو حیران شول هغوی
ځکه بدرنګه یې څېره شوه دومره
چې نه ښکاره کېدله د انسان په شان
۱۵ خو اوس به ډېر قومونه شي حیران هغه ته
او چوپ به شي پاتې پاچاهان له حیرانتیا نه
هغوی به وویني داسې شیان
چې هېڅکله ورته نه وو ویل شوي
هغوی به پوه شي داسې شیانو باندې
چې یې نه وو اورېدلي مخکې»