Afghan Bibles
English · دری · پښتو
 

د یهودا لیک - (افغان پښتو - می ۲۰۱۹)

د یهودا لیک

سلامونه

۱دا لیک د یهودا له خوا چې د عیسی مسیح خدمتګار او د یعقوب ورور دی، هغو خلکو ته لیکل شوی دی چې د خدای پلار له خوا رابلل شوي دي او مینه ورسره کوي او د عیسی مسیح په وسیله خوندي ساتل شوي دي. ۲رحم، سلامتي او مینه دې په تاسو کې زیاته شي.

د دروغجنو ښوونکو په هکله تعلیم

۳ګرانو دوستانو! ما ډېر غوښتل چې تاسو ته د هغه خلاصون په هکله ولیکم چې مونږ ټول په کې شریک یو، خو دا مې ضروري وګڼله چې تاسو وهڅوم چې د هغه ایمان په خاطر چې خدای یوځل او د تل دپاره خپلو سپېڅلو خلکو ته ورکړی دی، هلې ځلې وکړئ. ۴زه تاسو ته د دې دپاره وایم چې ځینې بې دینه خلک چې د غلطې عقیدې په هکله تعلیم ورکوي، په پټه په مونږ کې راننوتلي دي. دا هغه خلک دي چې ډېر پخوا د خدای په کلام کې هغوی ته د سزا ورکولو په هکله لیکل شوي دي. هغوی زمونږ د خدای فضل په غلطه تعبیروي، ترڅو د خپلو شهواني غوښتنو د پوره کولو دپاره بهانه جوړه کړي او زمونږ د یوازيني بادار او څښتن عیسی مسیح څخه انکار کوي.

۵که څه هم تاسو لا د مخکې نه له دې څخه خبر یئ، خو زه غواړم تاسو ته درپه یاد کړم چې څښتن څنګه د اسراییلو خلک د مصر څخه راوویستل. ۶همدارنګه هغه فرښتې چې خپل مقام یې ونه ساته او خپل اصلي ځای یې پرېښود، خدای هغوی په تورو تیارو کې په تلپاتې زنځیرونو وتړلې او د قیامت تر ورځې پورې به یې چې سزا به ورته ورکوي، هلته ساتي. ۷په همدې ډول د سدوم او عموره او د هغه شاوخوا ښارونه چې خلک یې د هغو فرښتو په شان په جنسي بد اخلاقۍ او ناروا خواهشاتو اخته شول او اوس ورته د عبرت په توګه په تلپاتې اور کې سزا ورکول کیږي.

۸همدارنګه دا خلک داسې رویاګانې ویني چې هغوی دې ته مجبوروي چې خپل بدنونه ناپاکه کړي، د خدای واک او اختیار نه مني او جلالي موجوداتو ته بد رد وایي. ۹حتی میکاییل چې د ټولو فرښتو مشره ده هغې هم کله چې د شیطان سره د موسی د مړي په هکله بحث کاوه، خپل ځان ته دا حق ورنه کړ چې په بدو خبرو هغه محکوم کړي بلکې ویې ویل: «څښتن دې تاته سزا درکړي.» ۱۰خو دا خلک هغو شیانو ته چې پرې نه پوهیږي بد رد وایي او کله چې هغوی د بې شعوره ځناورو په شان عمل کوي او بې له دې چې فکر وکړي دا کارونه کوي، دا شیان د هغوی د تباهۍ سبب ګرځي. ۱۱افسوس د هغوی په حال! ځکه چې هغوی په هغه لاره روان شول چې قاین په شان یې سرکښي وکړه او د هغه په شان هلاک شول. ۱۲هغوی ستاسو د ملګرتیا مېلمستیاوې خرابوي، ځکه چې په بې شرمۍ سره خوري او څښي او یوازې د خپلو ځانونو په فکر کې دي. هغوی د بې بارانه ورېځو په شان دي چې بادونه یې ځغلوي. هغوی د مني بې مېوې ونې دي چې له بیخه ویستل شوې او بیخي مړې دي. ۱۳هغوی د دریاب د هغو طوفاني څپو په شان دي چې د شرم نه ډک کارونه یې لکه د ځګونو په شان د سیند په مخ راښکاره کیږي. هغوی د سرګردانه ستورو په شان دي او خدای د هغوی دپاره یو داسې ځای ساتلی دی چې هلته تل ترتله توره تیاره وي. ۱۴خنوخ چې د آدم څخه وروسته اووم نسل ؤ، د دې خلکو په هکله پېشګويي وکړه او ویلي یې دي: «ګورئ، څښتن به د خپلو زرګونو فرښتو سره راځي ۱۵چې د ټولو خلکو په هکله قضاوت وکړي او هغو بې دینه خلکو ته د هغوی د بدو کارونو له امله چې کړي یې دي، سزا ورکړي. څښتن به دې بې دینه ګناهکارانو ته د هغو سختو خبرو سزا ورکړي چې د څښتن په ضد یې کړي دي.»

۱۶دا خلک تل ګوریږي او شکایتونه کوي او خپلو بدو خواهشاتو پسې ګرځي. هغوی د خپلو ځانونو په هکله غټې غټې خبرې کوي او د خپلې ګټې دپاره نورو ته غوړه مالي کوي.

خبرداری او لارښوونې

۱۷خو ګرانو دوستانو! تاسو باید زمونږ د څښتن عیسی مسیح د رسولانو هغه خبرې چې مخکې یې کړې دي درپه یاد کړئ. ۱۸هغوی تاسو ته ویلي وو چې په آخره زمانه کې به داسې خلک پیدا شي چې په تاسو به ملنډې وهي او د خپلو بدو خواهشاتو پسې به ګرځي. ۱۹دا خلک ستاسو په منځ کې بې اتفاقي راپیدا کوي، هغوی نفساني دي او روح القدس په کې نشته.

۲۰خو ګرانو دوستانو! په خپل سپېڅلي ایمان کې ټینګ اوسئ، د روح القدس د قدرت په وسیله دعا کوئ، ۲۱خپل ځانونه د خدای په مینه کې ټینګ وساتئ او زمونږ د څښتن عیسی مسیح د رحمت په تمه اوسئ چې تاسو ته تلپاتې ژوندون درکړي.

۲۲د هغو خلکو په اړه چې شک لري، زړه سواندي اوسئ. ۲۳نور خلک د اور د لمبو نه راوباسئ او ویې ژغورئ. په وېرې سره په نورو خلکو باندې رحم وکړئ او حتی له هغو کالیو څخه چې د جنسي ګناهونو داغ ورباندې لګېدلی وي، کرکه کوئ.

خدای ته د ستاینې دعا

۲۴اوس هغه چاته چې کولای شي تاسو د تېروتنې څخه وساتي او بې عیبه او په ډېرې خوشحالۍ سره مو خپل د جلال څخه ډک حضور ته راولي، ۲۵یعنې یوازېني خدای ته دې چې زمونږ د څښتن عیسی مسیح په وسیله زمونږ خلاصوونکی دی، جلال، لویي، قوت او واک او اختیار وي، له ازل نه، اوس او تل ترتله! آمین!