۱ هُداوندا گۆن موسّایا گوَشت: ۲ ”اِسراییلیان بگوَش پِر تَرّێت و مِگدُل و دریائے دَرنیاما، پی‌هاهِرۆتئے نزّیکّا اُرد کنێت. بَهَل‌سِپونئے دێما، تئیاب‌دَپا اُرد کنێت. ۳ پِرئون وتی دلا گوَشیت: ’اِسراییلی گیابانا سَرگَردان اَنت. هر نێمگا که برئوَنت، راهے دَر گێتکَ نکننت.‘ ۴ من، پِرئونئے دلا سِنگَ کنان و آ اِسراییلیانی رَندا کپیت. پِرئون و آییئے سجّهێن پئوج منی شان و شئوکتئے سئوَب‌سازَ بنت. گڑا مِسریَ زاننت که من هُداوند آن.“اِسراییلیان همۆدا اُرد کرت که هُداوندا گوَشتگ‌اَت.
۵ پِرئون سهیگ بوت که اے مهلوک تتکگ. اِشانی بارئوا پِرئون و آییئے هِزمتکارانی اِراده بدل بوت، گوَشتِش: ”ما چێا چُشێن کارے کرت؟ اِسراییلی مئے هِزمتا کنگا اَتنت، ما چێا رئوگا اِشتنت؟“ ۶ پِرئونا وتی اَرّابه تئیار کناێنت و گۆن وتی پئوجا راه گِپت. ۷ آییا شَش سد گچێنی اَرّابه و مِسرئے آ دگه اَرّابه هم زرتنت گۆن. هر یکّێا اَپسَرے مان اَت. ۸ هُداوندا مِسرئے بادشاه پِرئونئے دل سِنگ کرت و پِرئون اِسراییلیانی رندا کپت که په سربُلندی در آیگ و رئوگا اَتنت. ۹ مِسری اِسراییلیانی رندا کپتنت. پِرئونئے سجّهێن اَسپ و اَرّابه و اَرّابه‌سوار و پئیادگێن لشکرا پی‌هاهِرۆتئے نزّیکّا، تئیاب‌دَپا، بَهَل‌سِپونئے دێما اِسراییلی رسێنتنت، هما جاگها که اِسراییلیان اُرد کرتگ‌اَت.
۱۰ وهدے پِرئون آیانی نزّیکّا رَست، اِسراییلیان چمّ چست کرتنت و مِسری‌اِش دیستنت که آیانی رَندا کپتگ‌اَتنت. اِسراییلیان سکّ تُرست و هُداوندئے کرّا پِریاتِش کرت. ۱۱ گۆن موسّایا گوَشتِش: ”زانا مِسرا کبر نێست‌اَت که تئو مارا په مِرَگا اے گیابانا آورتگ؟ اے چِه کارے که تئو گۆن ما کرت؟ تئو چێا مارا چه مِسرا دَر کرت؟ ۱۲ ما مِسرا ترا نگوَشت: ’مارا یله کن و بِلّ که مِسریانی گُلامیا کنێن؟‘ چه اے گیابانا مِرَگا په ما مِسریانی گُلامی شَرتر اَت.“ ۱۳ موسّایا گۆن مردمان گوَشت: ”متُرسێت. دلا ڈَڈّ کنێت و بچارێت که مرۆچی هُداوند شمارا چۆن نجاتَ دنت، چێا که اے مِسریان که شما مرۆچی گِندگا اێت، پدا اِشان هچبرَ نگِندێت. ۱۴ هُداوند وت په شما جنگَ کنت، شما بَسّ آراما بنندێت.“
۱۵ هُداوندا گۆن موسّایا گوَشت: ”تئو چێا منی کرّا پریات کنگا ائے؟ اِسراییلیان بگوَش دێما رئوان ببێت. ۱۶ تئو وتی اَسایا چست کن و دستا دریائے سرا شهار دئے و دریایا دو بهر کن که اِسراییلی چه دریائے تَها، هُشکیئے سرا بگوَزنت. ۱۷ من مِسریانی دلان سِنگَ کنان که اِسراییلیانی رندا بکپنت و پِرئون و آییئے سجّهێن پئوج و اَرّابه و اَرّابه‌سوار منی شان و شئوکتئے سئوَب‌ساز ببنت. ۱۸ وهدے پِرئون و آییئے اَرّابه و اَرّابه‌سوارانی سئوَبا منا شان و شئوکتَ رسیت، گڑا مِسریَ زاننت که من هُداوند آن.“
۱۹ هُدائے پرێشتگ که اِسراییلی لشکرئے دێما رئوان اَت، کِنزت و آیانی پُشتا شت. جمبرئے مِنُک هم چه آیانی دێما کِنزت و آیانی پُشتا اۆشتات. ۲۰ جمبرئے مِنُک مِسرئے لشکر و اِسراییلئے لشکرئے نیاما اۆشتات. جمبرا یکّ نێمگے تهار و دومی نێمگ رُژنا کرت. سجّهێن شپا لشکر یَکدومیئے نزّیکّا نئیاتکنت.
۲۱ موسّایا وتی دست دریائے سرا شهار دات و چه هُداوندئے زۆرا سجّهێن شپا چه رۆدراتکا ترُندێن گواتێا کَشِّت و دریا پُشتا کِنزێنت. آپ دو بهر بوت و هُشکی زاهر بوت. ۲۲ اِسراییلی دریائے تها چه همے هُشکیا رئوان بوتنت. آپ آیانی راست و چَپّێن نێمگا چۆ دیوالا اۆشتاتگ‌اَت. ۲۳ مِسری گۆن پِرئونئے سجّهێن اَسپ و اَرّابه و اَرّابه‌سواران تان دریائے نیاما آیانی رندا کپتنت. ۲۴ شپئے چارُمی پاسا هُداوندا چه آس و جمبرئے مِنُکئے تها مِسرئے پئوج چارِت و سَربَتَگ و سَرگَردان کرت. ۲۵ هُداوندا آیانی اَرّابهانی پَرَّگ گَٹّێنتنت که اَرّابهانی برگ په آیان گران ببیت. مِسریان گوَشت: ”بیاێت چه اِسراییلیانَ تَچێن که هُداوند په آیانیگی گۆن مِسرا جنْگا اِنت.“ ۲۶ هُداوندا گۆن موسّایا گوَشت: ”وتی دستا دریائے سرا شهار دئے که آپ مِسری و آیانی اَرّابه و اَرّابه‌سوارانی سرا پِر بِلێٹیت.“ ۲۷ موسّایا وتی دست دریائے سرا شهار دات و چه بامگواها پێسر، هما وهدا که مِسری چه آپا تَچگا اَتنت، دریا وتی جاگها آتک. اے پئیما هُداوندا مِسری دریایا چَگل داتنت. ۲۸ وهدے پِرئونئے سجّهێن پئوجئے اَرّابه و اَرّابه‌سوار اِسراییلیانی رندا کپتنت و دریایا مانِش دات، آپ پِر تَرّت و آیی بُکّێنتنت. چه آیان یکّے هم سر نئیاتک. ۲۹ اِسراییلی دریائے تها، چه هُشک بوتگێن راها گوَستنت و آپ آیانی راست و چَپّێن نێمگا چۆ دیوالا اۆشتاتگ‌اَت.
۳۰ اے پئیما هُداوندا آ رۆچی اِسراییل چه مِسریانی دستا رَکّێنت و اِسراییلیان دیست که مِسریانی جۆن و جَسد تئیاب‌دَپا کپتگ‌اَنت. ۳۱ وهدے اِسراییلیان هُداوندئے زۆرمَندێن دست دیست که مِسریانی هلاپا چِستی کرتگ‌اَت، چه هُداوندا تُرستِش و هُداوندئے جند و هُداوندئے هِزمتکار موسّائے سرا باوَرِش کرت.