۱ هُداوندا گۆن موسّایا گوَشت: ۲ ”گۆن اِسراییلیان بگوَش که په من شُگرانه بیارێت. چه هما سجّهێن مردمان شُگرانه بزورێت که دلِشَ پَرماییت. ۳ چه مردمان اے شُگرانهان بگرێت: تلاه، نُگره، بْرنج، ۴ آسمانی و جَمو و سُهرێن پَژم، شَرّێن لیلُم، بُزئے مود، ۵ گوَرانڈئے رَتکگێن سُهرێن پۆست، دگه پئیمێن مُهرێن پۆست، چِگردئے دار، ۶ په چراگان ٹێل، په پِر مُشَگی رۆگن و وشبۆێن سۆچُکیا مَساله و ۷ په اێپۆد و سێنَگ‌پۆشا سِنگِ سُلئیمان و دگه گران‌کیمّتێن سِنگ. ۸ په من پاکێن جاگهے اَڈّ بکننت که من آیانی نیاما جَهمنند ببان. ۹ تَمبو و تَمبوئے تَهئے سجّهێن سامانان هما پئیما اَڈّ بکننت که من ترا پێشَ داران.
۱۰ چه چِگردئے دارا پێتیے اَڈّ بکننت که دْراجیا دو و نێم دست ببیت، پْراهیا یکّ و نێم دست و بُرزیا هم یکّ و نێم دست. ۱۱ پێتیا چه ڈنّا و تها گۆن زَگرێن تلاها سرپۆش کن. گِرداگِرد تلاهێن پَٹّیے پِری کن. ۱۲ په پێتیا تلاهئے چار کَڑی اَڈّ کن و پێتیئے چارێن پادَگان لِچّێنِش، دو کَڑی یکّ نێمگێا و دو آ دگه نێمگا. ۱۳ چه چِگردئے دارا دو گوَرباسک اَڈّ کن و گۆن تلاها سرپۆشِش کن. ۱۴ په پێتیئے چست کنگا گوَرباسکان چه پێتیئے کَشئے کَڑیان بگوازێن. ۱۵ گوَرباسک پێتیئے کڑیان ببنت و چه کڑیان در کنگ مبنت. ۱۶ شاهِدیئے وانِکان که من ترا دئیان، همے پێتیا مانِش کن.
۱۷ چه زَگرێن تلاها کَپارَتے اَڈّ کن و پێتیا سرپۆش کن. دْراجیا دو و نێم دَست ببیت و پْراهیا یکّ و نێم دَست. ۱۸ تِلاهئے دو کَرّوبی اَڈّ کن، تلاها بزور و ٹَپّ و اَڈِّش کن. اے کَرّوبیان سرپۆشئے دوێن سَران اَڈّ کن، ۱۹ یکّ کَرّوبیے سرپۆشئے یکّ سرێا اَڈّ کن و آ دگه کَرّوبیا دومی سرا. سرپۆش و دوێن سرانی کَرّوبیان جتا جتا اَڈّ مکن، اے یَک‌ٹُکُّر ببنت. ۲۰ کَرّوبیانی دێم گۆن یکدومیا ببیت و چمِّش گۆن سرپۆشا. بانزُلِش بُرزادیا پَچ ببنت و سرپۆشا ساهێل بکننت. ۲۱ سرپۆشا پێتیئے سرا اێر کن و هما شاهِدیئے وانِکان که من ترا دئیان، آیان پێتیئے تها کن. ۲۲ من همۆدا تئیی دێما زاهِرَ بان و گۆن تئو هبرَ کنان، چه سرپۆشئے بُرزا، چه شاهدیئے پێتیئے سرئے دوێن کَرّوبیانی نیاما اِسراییلیانی بارئوا هر پرمانے که هست، ترا گوَشانِش گۆن.
۲۳ چه چِگردئے دارا ٹێبَلے اَڈّ کن. دْراجیا دو دَست ببیت، پْراهیا یکّ دَست و بُرزیا یکّ و نێم دَست. ۲۴ گۆن زَگرێن تلاها سرپۆشی کن و تلاهئے پَٹّیے اَڈّ کن و چارێن نێمگان پِری کن. ۲۵ ٹێبَلئے سَربری تَهتَگا، چارێن نێمگان تلاهئے پَٹّیے پِر کن و تَهتَگئے چێرا چارێن نێمگان یکّ پَنجَگێئے پْراهیئے کَدّێن کابے پِر کن. ۲۶ په ٹێبَلا تلاهئے چار کَڑی اَڈّ کن و کڑیان چارێن کُنڈان، پادَگان پِر کن. ۲۷ اے کَڑی باید اِنت کابئے نزّیکّا ببنت چێا که ٹێبَلئے چِست کنگئے وهدا گوَرباسکانَ دارنت. ۲۸ ٹێبَلئے چِست کنگئے گوَرباسکان چه چِگردئے دارا اَڈّ کن و گۆن تلاها سرپۆشِش کن. ۲۹ اے ٹێبَلئے تال و تاسان چه زَگرێن تلاها اَڈّ کن. ٹێبَلئے جَگ و هما کاسَگان هم که په رێچَگی کُربانیگئے اێر رێچگا کار بندگَ بنت، چه زَگرێن تلاها اَڈّ کن. ۳۰ ’پاکوَنڈێن نگنا‘ مُدام همے ٹێبَلئے سرا، منی دێما اێر کن.
۳۱ چه زَگرێن تلاها چِراگدانے اَڈّ کن. چِراگدانا، بزان بُن و بُنشاه و پیاله و گُلبُن و پُلّان ٹَپّ و اَڈّ کن، جتا جتا اَڈِّش مکن، اے یَک‌ٹُکُّر ببنت. ۳۲ چه بُنشاهئے کَشان شش شاهڑ در بیئیت، سئے شاهڑ چه یکّ کَشێا و سئے شاهڑ چه آ دگه کَشا. ۳۳ هر شاهَڑا سئے پیاله پِر ببیت، پیالهانی سربُرا بادامئے پُلّئے وڑێن گُلبُن و پُلّے پِر ببیت. چِراگدانئے هر شَشێن شاهڑ همے پئیما ببنت. ۳۴ چِراگدانئے بُنشاها چار پیاله پِر ببیت، گۆن بادامئے پُلّئے وڑێن گُلبُن و پُلّان. ۳۵ چه بُنشاها در آیۆکێن ششێن شاهڑانی بُنا گُلبُن ببیت، یکّ گُلبُنے ائولی دوێن شاهَڑانی بُنا ببیت، چه هما جاگها کَمّے جَهلتِر که شاهَڑ چه بُنشاها درَ کاینت، دومی گُلبُن دومی دوێن شاهڑانی بُنا و سئیمی گُلبُن سئیمی دوێن شاهڑانی بُنا ببیت. ۳۶ گُلبُن و شاهڑ و چِراگدان یَک‌ٹُکُّر ببنت. اے سجّهێنان چه یکّێن ٹَپِّتگێن زَگرێن تلاها اَڈّ کن.
۳۷ هپت چراگ اَڈّ کن و چِراگدانا پِرِش کن که چِراگدانئے دێمئے جاگها رُژنا بکننت. ۳۸ چِراگدانئے سَمبالگئے ائوزار و سامانان چه زَگرێن تلاها اَڈّ کن. ۳۹ په چِراگدان و اِشیئے سجّهێن سامانانی اَڈّ کنگا یکّ تالانتے زَگرێن تلاه کارمرز کن.
۴۰ بچار، اے سجّهێن چیزّان هما پئیما اَڈّ کن که من ترا کۆهئے سرا پێش داشت.