۱ په سۆچُکیئے چێر سۆچگا کُربانجاهے اَڈّ کن، چه چِگردئے دارا اَڈّی کن. ۲ چارکُنڈی کن، دْراجیا یکّ دَست ببیت، پْراهیا هم یکّ دَست و بُرزیا دو دَست. کانٹ و کُربانجاه هۆر اَڈّ ببنت، اے یَک‌ٹُکُّر ببنت. ۳ کُربانجاهئے سرا و سجّهێن نێمگان و کانٹان گۆن زَگرێن تلاها سرپۆش کن و چَپّ و چاگردا تلاهێن پَٹّیے پِری کن. ۴ په کُربانجاها تلاهئے کَڑی اَڈّ کن و همے پَٹّیئے چێرا پِرِش کن. کُربانجاهئے دوێن کَشان دو دو کَڑی پِر کن که کُربانجاهئے چِست کنگئے وهدا گوَرباسکان بدارنت. ۵ گوَرباسکان چه چِگردئے دارا اَڈّ کن و گۆن تلاها سرپۆش کن. ۶ کُربانجاها هما پردهئے دێما اێر کن که شاهدیئے پێتیئے دێما اِنت، بزان کَپارَتئے سرپۆشئے دێما که شاهدیئے وانِکانی سربرا اِنت، هما جاگها که من گۆن تئو گِندُکَ کنان.
۷ هارون هر سُهب که چراگان چاریت و دلگۆشَ کنت، بۆسۆچی کُربانجاهئے سرا وشبۆێن سۆچُکی چێر بسۆچیت. ۸ مَگرِب‌تَهارا که هارون چراگان رۆکَ کنت، پدا سۆچُکی چێر بسۆچیت. اے هُداوندئے بارگاها دائِمی چێر سۆچَگی کُربانیگے، نَسلانی نَسل. ۹ اِشیئے سرا دگه پئیمێن سۆچُکی و سۆچَگی کُربانیگ یا دانئے کُربانیگ چێر مسۆچێت و اِشیئے سرا رێچَگی کُربانیگ مرێچێت. ۱۰ هارون سالے یکّ رندے اِشیئے کانٹانی سرا مهلوکئے گناهانی کَپارَتا بکنت. اے کَپارَت چه گناهانی کَپارَتئے هۆنا کنگ ببیت، سالے یکّ رندے، نَسلانی نَسل. اے په هُداوندا چه پاکا پاکتر اِنت.“
۱۱ هُداوندا گۆن موسّایا گوَشت: ۱۲ ”وهدے په مَردم‌شُماریا اِسراییلیان هسابَ کنئے، هرکَسئے نام که نِبیسگَ بیت، په وتی زِندئے مۆکگا هُداوندا کَپارَت بدنت. گڑا نام‌نِبیسیئے وهدا وباے آیانی چَکّا نکپیت. ۱۳ هما مردم که نامِش نِبیسگَ بنت، نێم شِکِل بدئینت، پاکێن جاگهئے شِکِلئے هسابا که شِکِلے بیست گێراه اِنت. اے نێم شِکِل په هُداوندا شُگرانهے. ۱۴ هرکَس که اُمری بیست سال یا گێشتر اِنت، نامی نبیسگ ببیت و هُداوندئے شُگرانها بدنت. ۱۵ وهدے په وتی زِندئے مۆکگا هُداوندئے شُگرانها دئیێت، هستۆمند چه نێم شِکِلا گێشتر و نێزگار کمتر مدئینت. ۱۶ چه اِسراییلیان کَپارَتئے زرّان بگر و شاهدیئے تَمبوئے هِزمتی کارانی سرا هرچِش کن. هُداوندئے بارگاها اے، په اِسراییلیان وتی زندئے مۆکگئے کَپارَتئے یاتگێجے.“
۱۷ هُداوندا گۆن موسّایا گوَشت: ۱۸ ”په شُشت و شۆدا بْرِنجئے تْرَشتے اَڈّ کن و پادَگی هم بْرِنجئے ببیت. شاهدیئے تَمبو و کُربانجاهئے نیاما اێری کن و آپی مان کن. ۱۹ هارون و آییئے مردێن‌چُکّ وتی دست و پادان گۆن همے آپان بشۆدنت. ۲۰ هر وهدا که تَمبوئے تها کاینت، وتا بشۆدنت که مَمِرَنت، هما وهدا هم وتا بشۆدنت که کُربانجاهئے نزّیکّا کاینت که هِزمت بکننت و په هُداوندا آس‌جَتێن کُربانیگ چێر بسۆچنت. ۲۱ وتی دست و پادان بشۆدنت که مَمِرَنت. اے په هارون و آییئے نَسل و پَدرێچا اَبدمانێن پرمانے، نَسلانی نَسل.“
۲۲ هُداوندا گۆن موسّایا گوَشت: ۲۳ ”اے شَرترێن وشبۆان بزور: پنچ سد شِکِل آپێن مُرّ، مُرّانی نێمئے کِساسا بزان دو سد و پنجاه شِکِلئے کِساسا وشبۆێن دارچینی، دو سد و پنجاه شِکِل وشبۆێن کانڈێل، ۲۴ پنچ سد شِکِل کاشیا، سجّهێن پاکێن جاگهئے شِکِلئے هسابا ببنت، و چار سێر زئیتونئے ٹێل. ۲۵ اِشان بزور و پِر مُشَگی پاکێن رۆگنے اَڈّ کن، وشبۆێن رۆگنے. اِشان هما پئیما هئوار کن که اَترساز وشبۆ اَڈَّ کننت. اے پِر مُشَگی پاکێن رۆگنَ بیت. ۲۶ تَمبو و شاهدیئے پێتی و ۲۷ ٹێبَل و ٹێبَلئے سجّهێن سامان و چِراگدان و چِراگدانئے سامان و بۆسۆچی کُربانجاه و ۲۸ سۆچَگی کُربانیگانی کُربانجاه و آییئے سجّهێن سامان و تْرَشت و تْرَشتئے پادگا رۆگن پِر مُش. ۲۹ اِشان وَپْک کن که چه پاکا پاکتر ببنت. هر چیزّ که گۆن اِشان ڈُکّ بلگّیت، پاکَ بیت.
۳۰ هارون و آییئے چُکّان رۆگن پِر مُش و وَپْکِش کن که دینی پێشوا ببنت و منی هِزمتا بکننت. ۳۱ گۆن اِسراییلیان بگوَش: ’اے منی پِر مُشَگی پاکێن رۆگن اِنت، په شما، نَسلانی نَسل. ۳۲ اِشیا هرکَسا پِر مَمُشێت و اے سامانان اے ڈئولا هئوار مکنێت و دگه چُشێن رۆگن اَڈّ مکنێت. اے پاکێن رۆگنے، اِشیئے کَدرا بکنێت. ۳۳ هرکَسا اِشیئے پئیمێن وشبۆے اَڈّ کرت یا اَنچێن مردمێا پِری مُشت که دینی پێشواے نه‌اِنت، چه وتی مهلوکا سِندگَ بیت.‘“
۳۴ هُداوندا گۆن موسّایا گوَشت: ”اے چیزّان بزور و هئوار کن: درچکی شیرَگ، سَدَپ، گَلبَنوم و زَگرێن کُندِرک، سجّهێنانی کَچّ و کِساس یکّ ببیت. ۳۵ هما پئیما هئوارِش کن و وشبۆێن سۆچُکیے اَڈّ کن که اَترساز وشبۆ اَڈَّ کنت. اے سۆچُکی وادۆک و زَگر و پاک ببیت. ۳۶ چه اِشان لهتێن بدْرُش و آرت کن و تَمبوا شاهدیئے پێتیئے دێما، اێر کن، همۆدا که من گۆن تئو گِندُکَ کنان. اِشیئے کَدرا بزانێت که چه پاکا پاکتر اِنت. ۳۷ په وتی جندا سۆچُکی اے پئیما اَڈّ مکنێت. هُداوندئے بارگاها اے پاکێن چیزّے، اِشیئے کَدرا بکنێت. ۳۸ هرکَسا په وتی دِلوَشّیا اے پئیمێن سۆچُکیے اَڈّ کرت، چه وتی مهلوکا سِندگَ بیت.“