۱ ”بِسَلێل و اُهولیاب و سجّهێن هُنَرمند که هُداوندا پاکێن جاگهئے اَڈّ کنگئے سجّهێن کارانی دانایی و پَهم بَکشاتگ‌اَنت، اے کارا هما پئیما سَرجم بکننت که هُداوندا هُکم داتگ.“
۲ بِسَلێل و اُهولیاب و سجّهێن هُنَرمند که هُداوندا دانایی بَکشاتگ‌اَتنت، بزان هرکَس که دلا پرمات که بیئیت و کار بکنت، موسّایا آ گْوانک جت. ۳ موسّایا هما سجّهێن شُگرانه اِشانی دستا داتنت که اِسراییلیان په پاکێن جاگهئے اَڈّ کنگئے کارا آورتگ‌اَتنت. مهلوک اَنگت په وشّی و رَزا هر سُهب په اے کارا شُگرانه آرگا اَت. ۴ گڑا اے سجّهێن هُنرمند که پاکێن جاگهئے اَڈّ کنگا گلاێش اَتنت، اِشان وتی کار یله دات و موسّائے کرّا آتکنت و ۵ گوَشتِش: ”مهلوک په هُداوندئے هُکم داتگێن کارئے سَرجم کنگا چه زلورتا گێش سامان آرگا اِنت.“ ۶ گڑا موسّایا هُکم دات و سجّهێن اُردگاها جار جنَگ بوت: ”په پاکێن جاگهئے اَڈّ کنگا هچّ مردێن یا جنێن چه اِد و گێشتر شُگرانه مئیاریت.“اے پئیما مهلوک چه گێشترێن سامانئے آرگا دارگ بوت، ۷ چێا که په اے سجّهێن کارا آیانی آورتگێن سامان چه زلورتا گێش اَتنت.
۸ اے هُنَرمندان شاهدیئے تَمبوئے دَهێن پرده اَڈّ کرتنت. اے پرده چه هورت‌گواپێن لیلُم و چه آسمانی و جَمو و سُهرێن پَژما گوَپَگ بوتنت. هُنرمندێن اِزمکارێا اے پردهانی سرا کَرّوبیئے نَکش جۆڑ کرت. ۹ سجّهێن پرده یکّێن کَدّ و ماپا اَتنت. همُک پرده دْراجیا بیست و هَشت دَست و پْراهیا چار دَست اَت. ۱۰ پنچ پردهِش زرت و گۆن یکدگرا لِچّێنت و آ دگه پنچێنِش هم همے پئیما لِچّێنتنت. ۱۱ ائولی رِدئے گُڈّی پردهئے لمبا آسمان‌رنگێن لۆپِش پِر کرت و دومی رِدئے گُڈّی پردهئے لمبا هم لۆپِش پِر کرت. ۱۲ یکّ پردهێا پنجاه لۆپِش پِر کرت و دومی رِدئے پردهئے لمبا هم پنجاه لۆپِش پِر کرت. دوێنانی لۆپ دێم په دێم اَتنت. ۱۳ تلاهئے پنجاه کَڑی‌اِش اَڈّ کرت و پردهِش گۆن یکدگرا جۆڑێنتنت و تَمبواِش یکّ کرت.
۱۴ په تَمبوئے پۆشَگا چه سْیَه‌پَسئے مودا پردهِش اَڈّ کرت. یازده پردهِش اَڈّ کرت. ۱۵ یازدهێن پرده یکّێن کَدّ و ماپئیگ اَتنت. همُک پردهئے دْراجی سی دَست اَت و پْراهی چار دَست. ۱۶ پنچ پردهِش یکّ رِدێا گۆن یکدگرا لِچّێنت و آ دگه شَشێن دگه رِدێا. ۱۷ ائولی رِدئے گُڈّی پردهئے لمبا پنجاه لۆپِش پِر کرت و دومی رِدئے گُڈّی پردهئے لمبا هم پنجاه لۆپِش پِر کرت. ۱۸ بْرنجئے پنجاه کَڑی‌اِش اَڈّ کرت که تَمبوا بلِچّێننت و یکّ بکننت. ۱۹ تَمبوئے سربری پۆشِش چه گوَرانڈئے اَنچێن پۆستێا اَڈّ کرت که رَجگ و سُهر کنگ بوتگ‌اَت و اِشیئے سربرا دگه پئیمێن مُهرێن پۆستئے پۆشے پِرِش کرت. ۲۰ په تَمبوا چه چِگردئے دارا مِکّ کنگی تَهتَگِش اَڈّ کرت. ۲۱ هر تَهتَگ دْراجیا دَه دَست اَت و پْراهیا یکّ و نێم دَست. ۲۲ همُک تَهتَگا دو زُبانُکِش پِر کرت و اے زُبانُکِش دپ مان دپ کرتنت. تَمبوئے سجّهێن تَهتَگِش همے پئیما کرتنت. ۲۳ په تَمبوئے جنوبی نێمگا بیست تَهتَگِش اَڈّ کرت و ۲۴ نُگرهئے چِلّ بُنهِشتِش اَڈّ کرت که تَهتَگانی چێرا دئیگ ببنت. په همُک تَهتَگا دو بُنهِشتِش اَڈّ کرت، په همُک زُبانُکئے چێرا یکّ بُنهِشتے اَڈِّش کرت. ۲۵ په تَمبوئے آ دگه نێمگا، بزان تَمبوئے شمالی نێمگا هم بیست تَهتَگِش اَڈّ کرت. ۲۶ په تَهتَگانی چێرا نُگرهئے چلّ بُنهِشتِش اَڈّ کرت، بزان دو بُنهِشت په هر تَهتَگا. ۲۷ په تَمبوئے پُشتی بهرا، بزان رۆنِندی نێمگا شَش تَهتَگِش اَڈّ کرت و ۲۸ په پُشتی بهرئے کُنڈان دو تَهتَگِش اَڈّ کرت. ۲۹ دوێن کُنڈان، اے تَهتَگ چه جَهلا گۆن یکدگرا لِچّتنت و بُرزا دپ مان دپ کنگ و یَکّێن کَڑیئے تها مان کنگ بوتنت. دوێن کُنڈِش همے پئیما کرتنت. ۳۰ هشت تَهتَگ بوتنت و نُگرهئے شانزده بُنهِشت، په همُک تَهتَگئے چێرا دو بُنهِشت.
۳۱ چه چِگردئے دارا گوَربَستِش اَڈّ کرت. پنچ گوَربَست په تَمبوئے یکّ نێمگێئے تَهتَگان، ۳۲ پنچ گوَربَست په آ دگه نێمگئے تَهتَگان و پنچ گوَربَست په رۆنِندی نێمگئے، بزان په تَمبوئے پُشتی بهرئے تَهتَگان. ۳۳ نیامی گوَربَستِش اَڈّ کرت که اے سر تان آ دگه سرا، تَهتَگان سکّ ببیت، تَهتَگانی نێم بُرزیا. ۳۴ تَهتَگِش گۆن تلاها سرپۆش کرتنت و په گوَربَستانی دارگا تِلاهئے کَڑی‌اِش اَڈّ کرت. گوَربَستِش هم گۆن تلاها سرپۆش کرتنت.
۳۵ چه آسمانی و جَمو و سُهرێن پَژما و هورت‌گواپێن لیلُما پردهے اَڈِّش کرت و هُنرمندێن اِزمکارێا اِشیئے سرا کَرّوبیئے نَکش اَڈّ کرتنت. ۳۶ په اے پردهئے دْرَنجگا چار چِگردی مِنُکِش اَڈّ کرت و گۆن تلاها سرپۆشِش کرتنت، تلاهئے کَڑی‌اِش هم اَڈّ کرت و په مِنُکان نُگرهئے چار بُنهِشتِش اَڈّ کرت.
۳۷ آسمانی و جَمو و سُهرێن پَژم و هورت‌گواپێن لیلُمِش زرت و په تَمبوئے دپا رَنگ‌گواپێن پردهے اَڈِّش کرت. ۳۸ په اے پردها پنچ مِنُکِش گۆن کَڑیان اَڈّ کرت و مِنُکانی سَرُک و بندِش گۆن تلاها سرپۆش کرتنت و په مِنُکان بْرِنجئے پنچ بُنهِشتِش اَڈّ کرت.