۱ نوهئے چُکّ، سام و هام و یاپِتئے نَسل و پَدرێچئے کِسّه چُش اِنت:
اِشان چه توپّانا رند چُکّ و بَر کرت.
۲ گومِر و ماجوج و مَدایی و یاوان و توبال و ماشِک و تیراس، یاپِتئے مردێن‌چُکّ اَتنت. ۳ اَشکِناز و ریپَت و توگَرمَه، گومِرئے مردێن‌چُکّ اَتنت. ۴ اِلیشَه و تَرشیش و کِتّیمی مردم و دۆدانیمی مردم، یاوانئے مردێن‌چُکّ اَتنت. ۵ چه اِشان تئیاب‌دَپی مردم وتی سرڈگاران تالان بوتنت، هر یکّے گۆن وتی جندئے زُبانا، وتی کَبیلهانی هسابا، وتی کئومانی تها.
۶ کوش و مِسراییم و پوت و کَنهان، هامئے مردێن‌چُکّ اَتنت. ۷ سِبا و هئویلَه و سَبتاه و رامَه و سَبتِکا، کوشئے مردێن‌چُکّ اَتنت. سَبا و دێدان، رامَهئے مردێن‌چُکّ اَتنت. ۸ چه کوشا نَمرود پێدا بوت که زمینئے سرا ائولی زۆرمندێن جَنگۆل اَت. ۹ هُداوندئے چمّان نَمرود، زرِنگێن شکاریے اَت، پمێشکا گوَشگَ بیت: ”اے مرد، هُداوندئے چمّان نَمرودئے پئیمێن مزنێن شکاریے.“ ۱۰ نَمرودئے بادشاهیئے بِندات چه بابِل، اِرِک، اَکّاد و کَلنِها بوت که شینارئے سرڈگارا اَتنت. ۱۱ آ چه اے سرڈگارا آشورا شت و اۆدا نئینئوا، رَهوبوت‌ایر، کالَه و ۱۲ ریسِنئے شهری اَڈّ کرتنت. ریسِن، نئینئوا و کالَهئے نیاما اِنت، کالَه مزنێن شهرے.
۱۳ چه مِسراییما، لودی و اَنَمی و لِهابی و نَپتوهی مردم پێدا بوتنت و ۱۴ پَتروسی و کَپتوری و کَسلوهی مردم، که چه کَسلوهیان، پیلِستی پێدا بوتنت.
۱۵ کَنهانئے ائولی چُکّ سئیدون اَت و پدا هیتّی و ۱۶ یَبوسی و اَموری و گِرگاشی و ۱۷ هێوی و اَرکی و سینی و ۱۸ اَروادی و سِماری و هَماتی مردم پێدا بوتنت. رندا کَنهانی کَبیله شِنگ و تالان بوتنت. ۱۹ کَنهانئے هَدّ و سیمسر، چه سئیدونا که دێم په گِرارا رئوئے تان گَزَّها اَت و اگن دێم په سُدوم، گُمورَه، اَدمَه و سِبویما رئوئے، تان لَشاها اَت. ۲۰ هامئے نَسلئے کِسّه، آیانی کَبیله و زُبان و سرڈگار و کئومئے هسابا همِش اَت.
۲۱ سام که یاپِتئے مسترێن برات اَت، آییا هم مردێن‌چُکّ بوت. سام، اِبِرئے سجّهێن چُکّانی بُنپیرُک اِنت. ۲۲ سامئے مردێن‌چُکّ، ایلام و آشور و اَرپَکشاد و لود و اَرام اَتنت. ۲۳ اَرامئے مردێن‌چُکّ، اوز و هول و گیتِر و ماش اَتنت. ۲۴ اَرپَکشاد، شِلَهئے پت اَت و شِلَه، اِبِرئے پت. ۲۵ اِبِرا دو مردێن‌چُکّ بوت، یکّێئے نام پێلِگ اَت، چێا که همے وهدا زمین بهر و بانگ بوت. براتئے نامی یُکتان اَت. ۲۶ یُکتان، اَلموداد و شێلپ و هَزَرماوِت و یێرَه و ۲۷ هَدورام و اوزال و دِکلَه و ۲۸ اۆبال و اَبیماێل و سَبا و ۲۹ اُپیر و هئویلَه و یوبابئے پت اَت. اے سجّهێن یُکتانئے مردێن‌چُکّ اَتنت. ۳۰ آ دَمگا که اے نندۆک اَتنت، چه مِشایا دێم په سِپارا اَت، رۆدراتکئے کۆهستگێن مُلکا. ۳۱ سامئے چُکّانی کِسّه، آیانی کَبیله و زُبان و سرڈگار و کئومئے هسابا همِش اَت.
۳۲ نوهئے مردێن‌چُکّانی کَبیله، آیانی سَر و بُنئے رِد و بندئے سرا، آیانی کئومانی هسابا همِش اَتنت. توپّانا رَند چه همِشان سجّهێن کئوم زمینئے سرا شِنگ و تالان بوتنت.