۱ دو سالا رند پِرئونا وابے دیست که نیلّئے کئورئے کرّا اۆشتاتگان. ۲ همے وهدا هپت ڈئولدار و پَزّۆرێن گۆک چه آپا در آتک و کاشانی تها چَرَگا لگِّتنت. ۳ چه اِشان و رند دگه هپت بدڈئول و لاگَرێن گۆک چه نیلّا در آتک و کئورئے کَشا، آ دگه گۆکانی کِرّا اۆشتاتنت. ۴ بدڈئول و لاگَرێن گۆکان هَپتێن ڈئولدار و پَزّۆرێن گۆک وارتنت. پِرئون چه وابا آگَه بوت.
۵ پِرئون پدا وپت و دگه وابے دیستی که دانئے هپت زَنڈ و شرّێن هۆشگ یکّ ٹالێئے سرا رُدَگا اِنت. ۶ چه اِشان و رند دگه هپت هۆشگ زاهر بوت. اے هۆشَگ لاگَر اَتنت و چه رۆدراتکا کَشّۆکێن لِوارا گیمُّرێنتگ‌اَتنت. ۷ لاگَرێن هۆشگان هَپتێن زَنڈ و شرّێن هۆشگ وارتنت. پِرئون پاد آتک و زانتی که اے وابے اَت.
۸ سُهب که بوت، پِرئون پرێشان اَت. وتی مردمی راه داتنت و مِسرئے سجّهێن دانا و جادوگری لۆٹاێنتنت. پِرئونا گۆن آیان وتی وابانی کِسّه کرت، بله کَسّا آییئے واب مانا کرت نکرتنت.
۹ گڑا مسترێن آپیا گۆن پِرئونا گوَشت: ”من مرۆچی وتی رَدیانی ترانَگا کپتگان. ۱۰ یکّ رندے تئوِ پِرئون وتی هِزمتکارانی سرا زهر گپتئے و منا و مسترێن نانی زُرت و نِگهپانانی مسترئے بندیجاها بند کناێنت. ۱۱ یکّ شپے ما دوێنان واب دیست و هر یکّ وابێا وتی ماناے هست‌اَت. ۱۲ اۆدا گۆن ما اِبرانی وَرناے بند اَت. نِگهپانانی مسترئے هِزمتکارے اَت. ما گۆن آییا وتی وابئے کِسّه کرتنت و آییا مانا کرت و داتنت. دوێنان وتی وابانی مانا رست. ۱۳ هما پئیما که آییا مئے واب مانا کرتگ‌اَتنت، هما ڈئولا بوت. منا وتی پێسریگێن مَنسَب رست و نانی دْرَنجگ بوت.“
۱۴ گڑا پِرئونا ایسُّپ لۆٹاێنت و ایسُّپ هما دمانا چه سْیَه‌چاتا در کنگ و آرَگ بوت. ایسُّپا ریشّ سات و گُد مَٹّ کرتنت و پِرئونئے دربارا آتک. ۱۵ پِرئونا گۆن ایسُّپا گوَشت: ”من وابے دیستگ و کَسّ اِشیا مانا کرتَ نکنت، بله من تئیی بارئوا اِشکتگ که اگن کَسے گۆن تئو وتی وابئے کِسّها بکنت، تئو مانایی کرتَ کنئے.“ ۱۶ ایسُّپا گوَشت: ”اے چه منی وَس و واکا در اِنت، بله هُدا تئوِ پِرئونا هئیرێن پسّئوے داتَ کنت.“
۱۷ گڑا پِرئونا گۆن ایسُّپا گوَشت: ”من واب دیست که نیلّئے کئورئے کَشا اۆشتاتگان. ۱۸ همے وهدا هپت پَزّۆر و ڈئولدارێن گۆک چه کئورا در آتک و کاشانی تها چَرَگا لَگّتنت. ۱۹ چه آیان و رند دگه هپت گۆک در آتک که نِزۆر و بدڈئول و لاگر اَتنت. سجّهێن مِسرئے مُلکا من چُشێن بدڈئولێن گۆک هچبر ندیستگ‌اَت. ۲۰ لاگر و بدڈئولێن گۆکان پێسری هپتێن پَزّۆرێن گۆک وارتنت. ۲۱ بله آیانی ورگا رند هم اے گۆک اَنگت پێسری ڈئولا اَنچۆ بدڈئول اَتنت که نگوَشئے آ گۆکِش وارتگ‌اَنت. من چه وابا آگَه بوتان.
۲۲ پدا که واب کپتان، گِندان که دانئے هپت زَنڈێن و شرّێن هۆشگ یکّ ٹالێئے سرا رُدَگا اِنت. ۲۳ چه آیان و رند، دگه هپت هۆشگ رُست. اے هۆشَگ نِزۆر و لاگر اَتنت و چه رۆدراتکا کَشّۆکێن لِوارا گیمُّرێنتگ‌اَتنت. ۲۴ لاگَرێن هۆشگان هپتێن شَرّێن هۆشگ وارتنت. من گۆن جادوگران کِسّه کرت، بله چه آیان کَسّا اے واب مانا کرت نکرت.“
۲۵ گڑا ایسُّپا گۆن پِرئونا گوَشت: ”تئوِ پِرئونئے دوێن واب یکّ اَنت. هما کار که هُدا دێمترا کنتی، په تئوِ پِرئونا پدّری کرتگ. ۲۶ هپتێن شَرّێن گۆک هپت سال اَنت و دانئے هپتێن شَرّێن هۆشگ هم هپت سال اَنت. دوێن واب یکّ اَنت. ۲۷ هما هپتێن لاگر و بدڈئولێن گۆک که چه آیان و رند در آتکنت، هَپت سال اَنت و همے ڈئولا هپتێن هۆرک و هالیگێن هۆشگ که چه رۆدراتکا کَشّۆکێن لِوارا گیمُّرێنتگ‌اَتنت، هپت سالئے ڈُکّال اَنت. ۲۸ من گۆن تئوِ پِرئونا گوَشت، هما کار که هُدا دێمترا کنتی، په تئوِ پِرئونا پدّری کرتگ. ۲۹ نون سجّهێن مِسرا هپت سالا مزنێن سَرسبزی و پراوانیے بیت، ۳۰ بله چه اِشیا رند، هپت سالا ڈُکّالَ بیت و اے ڈُکّال مِسرا اَنچۆ تباه و وئیرانَ کنت که مردم مُلکئے سجّهێن سرسبزی و پراوانیا شمۆشنت. ۳۱ مُلکئے سرسبزی شمۆشگَ بیت، چێا که اے ڈُکّال که رندا کئیت، سکّ گرانَ بیت. ۳۲ اے واب پمێشکا تئوِ پِرئونئے سرا دو رندا آتکگ که هُدایا پَکّاییا پئیسله کرتگ و هُدا اے کارا همے زوتّانَ کنت.
۳۳ نون تئوِ پِرئون اگلمند و داناێن مردے در گێج و مِسرئے مُلکئے سجّهێن کاران هماییئے دستا بدئے. ۳۴ تئوِ پِرئون باید اِنت مُلکا اَنچێن کارمستر بدارئے که سرسبزیئے هپتێن سالانی وهدا کِشارانی پَنچِکا بگرنت. ۳۵ اے کارمستر سرسبزیئے آیۆکێن سالان وَرد و وراک مُچّ بکننت و پِرئونئے چێردستیا، شهران په ورگا دان اَمبار بکننت. ۳۶ اے وَرد و وراک په مُلکا اَمبار کنگ ببنت و هما هپتێن سالان که مِسرا ڈُکّالَ کپیت، کارمرز کنگ ببنت که مُلک چه ڈُکّالا تباه مبیت.“
۳۷ اے هبر، پِرئون و پِرئونئے سجّهێن اَپسرانی چمّان شَرّێن هبرے اَت. ۳۸ پِرئونا گۆن وتی هِزمتکاران گوَشت: ”دگه چُشێن مردمے درَ کپیت که اے مردئے پئیما هُدائے روه آییا مان ببیت؟“ ۳۹ دێمی گۆن ایسُّپا کرت و گوَشتی: ”هُدایا اے سجّهێن چیزّ که په تئو پدّر کرتگ‌اَنت، گڑا بزان تئیی پئیمێن اگلمند و دانا دگه نێست. ۴۰ من ترا وتی لۆگئے مسترَ کنان و منی سجّهێن مردم تئیی پرمانئے پابندَ بنت و تهنا منِ بادشاه چه تئو مسترَ بان.“
۴۱ نون پِرئونا گۆن ایسُّپا گوَشت: ”بچار، تئو چه منی نێمگا سجّهێن مِسرئے مُلکئے مستر ائے.“ ۴۲ پِرئونا وتی مُهرئے مُندریکّ چه دستا کَشِّت و ایسُّپئے دستا دات، شَرّێن لیلُمئے پۆشاک و سُهرئے هارے گوَرایی دات. ۴۳ مُلکئے نائِبئے اَرّابَها سواری کرت. مردمان جار جت که ایسُّپئے دێما کۆنڈان بکپێت. پِرئونا ایسُّپ سجّهێن مِسرئے مستر کرت. ۴۴ پِرئونا گۆن ایسُّپا گوَشت: ”من پِرئون آن. بے تئیی رَزایا سجّهێن مِسرئے مُلکا کَسّ وتی دست و پادے سُرێنتَ نکنت.“ ۴۵ پِرئونا ایسُّپ سُپنات‌پَنێها نامێنت و گۆن اونئے شهرئے دینی پێشوا پوتیپێرائے جنکّ اَسِناتا سور دات. نون ایسُّپ سجّهێن مِسرا گَشت.
۴۶ وهدے ایسُّپا مِسرئے بادشاه پِرئونئے هِزمت بندات کرت، اُمری سی سال اَت. ایسُّپ چه پِرئونئے دربارا پاد آتک و سجّهێن مِسرا گَشت. ۴۷ سَرسبزیئے هپتێن سالان زمینا مزنێن بَر و سَمرے دات. ۴۸ سَرسبزیئے هپتێن سالان که مِسرئے مُلکا وَرد و وراک باز اَت، ایسُّپا شهرانی اَمبار پُرّ کرتنت. هر شهرئے کَش و کِرّئے ڈگارانی بَر و سَمری هما شهرا امبار کرت. ۴۹ ایسُّپا سکّ باز دان امبار کرت، دریائے رێکانی کَدّا. دان اَنچۆ باز اَتنت که اِشانی هساب کنگی بند کرت، چێا که چه هسابا ڈَنّ اَتنت.
۵۰ چه ڈُکّالئے سالان و پێسر ایسُّپا دو مردێن‌چُکّ بوت. اِشانی مات اَسِنات، اونئے شهرئے دینی پێشوا پوتیپێرائے جنکّ اَت. ۵۱ ایسُّپا وتی ائولی چُکّئے نام مَنَسی کرت، گوَشتی: ”هُدایا منا چه سجّهێن سکّی و سۆریان و چه پتئے لۆگئے سجّهێن تْرانگان آزات کرتگ.“ ۵۲ دومی چُکّئے نامی اِپراێم کرت، گوَشتی: ”منی سکّی و سۆریانی مُلکا، هُدایا منا پُرسَمر کرتگ.“
۵۳-۵۴ گڑا هما پئیما که ایسُّپا گوَشتگ‌اَت، مِسرئے مُلکئے سَرسبزیئے هپتێن سال هلاس بوتنت و ڈُکّالئے هپتێن سال بُنگێج بوتنت. آ دگه سجّهێن مُلکان ڈُکّال بوت، بله سَرجمێن مِسرا وراک هست‌اَت.
۵۵ گڑا سجّهێن مِسر که شُدیگ بوت، مردمان پِرئونئے کِرّا په وراکا پریات کرت. پِرئونا گۆن سجّهێن مِسریان گوَشت: ”ایسُّپئے کِرّا برئوێت و آ هرچے که گوَشیت، هما ڈئول بکنێت.“ ۵۶ سَرجمێن مُلک که ڈُکّالا گپت، ایسُّپا امبارانی دپ پچ کرت و مِسریانی کِرّا دانی بها کرت که سجّهێن مِسرا مزنێن ڈُکّالے کپتگ‌اَت. ۵۷ سَرجمێن دنیا په دانئے گِرَگا مِسرا ایسُّپئے کِرّا آتک، چێا که سجّهێن دنیایا گرانێن ڈُکّالے کپتگ‌اَت.