۱ آدمئے نَسل و پَدرێچئے کِتابی کِسّه چُش اِنت:
هُدایا آ رۆچا که انسان جۆڑ کرت، وتی شِکلا جۆڑی کرت. ۲ مردێن و جنێنی جۆڑ کرتنت. هما وهدا که اَڈّی کرتنت، برکتی داتنت و آیانی نامی اِنسان کرت.
۳ آدما که 130 سال بوت، وتی پئیمێن، وتی شِکلئے مردێن‌چُکّێئے پت بوت و آییئے نامی سئیت کرت. ۴ سئیتئے پێدائِشا رند، آدما 800 سال اُمر کرت و آییا دگه مردێن‌چُکّ و جنێن‌چُکّ هم بوت. ۵ اے هسابا آدما سَرجمیا 930 سال اُمر کرت و مُرت.
۶ سئیتا که 105 سال بوت، چه آییا اێنۆش پێدا بوت. ۷ اێنۆشئے پێدائِشا رند، سئیتا 807 سال اُمر کرت و آییا دگه مردێن‌چُکّ و جنێن‌چُکّ هم بوت. ۸ اے هسابا سئیتا سَرجمیا 912 سال اُمر کرت و مُرت.
۹ وهدے اێنۆشا 90 سال بوت، چه آییا کِنان پێدا بوت. ۱۰ چه کِنانئے پێدائِشا رند، اێنۆشا 815 سال اُمر کرت و آییا دگه مردێن‌چُکّ و جنێن‌چُکّ هم بوت. ۱۱ اێنۆشا سَرجمیا 905 سال اُمر کرت و مُرت.
۱۲ کِنانا که 70 سال بوت، چه آییا مَهَلالێل پێدا بوت. ۱۳ مَهَلالێلئے پێدائِشا رند، کِنانا 840 سال اُمر کرت و آییا دگه مردێن‌چُکّ و جنێن‌چُکّ هم بوت. ۱۴ کِنانا سَرجمیا 910 سال اُمر کرت و مُرت.
۱۵ وهدے مَهلالێلا 65 سال بوت، چه آییا یارِد پێدا بوت. ۱۶ یارِدئے پێدائِشا رند، مَهلالێلا 830 سال اُمر کرت و آییا دگه مردێن‌چُکّ و جنێن‌چُکّ هم بوت. ۱۷ مَهَلالێلا سَرجمیا 895 سال اُمر کرت و مُرت.
۱۸ وهدے یارِدا 162 سال بوت، چه آییا هَنوک پێدا بوت. ۱۹ هَنوکئے پێدائِشا رند، یارِدا 800 سال اُمر کرت و آییا دگه مردێن‌چُکّ و جنێن‌چُکّ هم بوت. ۲۰ یارِدا سَرجمیا 962 سال اُمر کرت و مُرت.
۲۱ وهدے هَنوکا 65 سال بوت، چه آییا مِتوشالَه پێدا بوت. ۲۲ مِتوشالَهئے پێدائِشا رند، هَنوکا 300 سال هُدائے راها گامَ جَت و آییا دگه مردێن‌چُکّ و جنێن‌چُکّ هم بوت. ۲۳ هَنوکئے سَرجمێن اُمر 365 سال بوت. ۲۴ هَنوکا هُدائے راها گامَ جت و رندا کَسّا ندیست، چێا که هُدایا هَنوک زندگا زُرت و بُرت.
۲۵ وهدے مِتوشالَها 187 سال بوت، چه آییا لَمێک پێدا بوت. ۲۶ لَمێکئے پێدائِشا رند، مِتوشالَها 782 سال اُمر کرت و آییا دگه مردێن‌چُکّ و جنێن‌چُکّ هم بوت. ۲۷ مِتوشالَها سَرجمیا 969 سال اُمر کرت و مُرت.
۲۸ وهدے لَمێکا 182 سال بوت، چه آییا مردێن‌چُکّے پێدا بوت. ۲۹ آییا وتی چُکّ نوه نامێنت و گوَشت: ”اے چُکّ مارا چه مئے دستانی هما گرانێن کار و زهمتان آسودگَ کنت که چه هُدائے نالت کرتگێن زمینا چِست بوتگ‌اَنت.“ ۳۰ نوهئے پێدائِشا رند، لَمێکا 595 سال اُمر کرت و آییا دگه مردێن‌چُکّ و جنێن‌چُکّ هم بوت. ۳۱ لَمێکا سَرجمیا 777 سال اُمر کرت و مُرت.
۳۲ نوهئے اُمر 500 سال بوت و رندا چه آییا سام و هام و یاپِت پێدا بوتنت.