۱ رندا پیلاتوسا ایسّا زرت و شَلّاک و هئیزران جناێنت. ۲ پئوجیان چه ڈَنگر و کُنٹگان تاجے اَڈّ کرت و ایسّائے سرا دات، جَمورنگێن کَباهے هم گوَرا داتِش. ۳ ایسّائے کِرّا شت و آتکنت و گوَشتِش: ”سلام و درۆت، او یَهودیانی بادشاه!“شَهماتِش هم جت. ۴ پیلاتوس پدا یَهودیانی کِرّا ڈنّا در آتک و گوَشتی: ”بچارێت، اِشیا شمئے کِرّا ڈنّا کاران تانکه شما بزانێت که من په اِشیئے مئیاریگ کنگا هچّ بنیادے نگندان.“ ۵ ایسّایا کُنٹگێن تاج سرا اَت و جَمورنگێن کَباه گوَرا اَت و ڈنّا در آتک. پیلاتوسا گۆن یَهودیان گوَشت: ”بچارێت، اے مرد همِدا اِنت!“ ۶ وهدے مزنێن دینی پێشوایان و آیانی سپاهیگان دیست، کوکّارِش کرت: ” سَلیبی کَشّ! سَلیبی کَشّ!“پیلاتوسا گوَشت: ”شما وت اِشیا بزورێت و سَلیب بکَشّێت. من په اِشیئے مئیاریگ کنگا هچّ بنیادے نگندان.“ ۷ یَهودیان گوَشت: ”مارا شَریَتے هست‌اِنت که آییئے رِدا، اے مرد الّما کُشگ ببیت، چێا که گوَشتگی: ’من هُدائے چُکّ آن.‘“ ۸ وهدے پیلاتوسا اے هبر اِشکت، گَنتر تُرستی.
۹ پیلاتوس پدا وتی کلاتا شت و اۆدا چه ایسّایا جُستی کرت: ”تئو چه کجا آتکگئے؟“ایسّایا پَسّئو ندات. ۱۰ پیلاتوسا گوَشت: ”گۆن من هبرَ نکنئے؟ تئو نزانئے که تئیی آزات کنگ و سَلیب کَشّگئے اِهتیار منی دستا اِنت؟“ ۱۱ ایسّایا پَسّئو دات: ”اگن هُدایا ترا اے اِهتیار مداتێن، منی سرا ترا هچّ واک و اِهتیارے نێست‌اَت. پمێشکا هما که منا تئیی دستا داتی گێشتر مئیاربار اِنت.“ ۱۲ چه اِد و رَند، پیلاتوسا جُهدَ کرت که آییا آزات بکنت، بله یَهودیان کوکّارَ کرت: ”اگن تئو اے مردا آزات بکنئے، کئیسَرئے دۆست نه‌ائے. هرکَس وتا بادشاه سرپد ببیت، کئیسَرئے دژمن اِنت.“
۱۳ وهدے پیلاتوسا اے هبر اِشکت، ایسّایی ڈنّا آورت و وت یکّ جاهے په دادرسیا نِشت که آییا ”سِنْگپَرْشَ“گوَشنت و اَرَمایی زبانا ”جَبّاتا“بیت. ۱۴ سَرگوَزئے ائییدئے تئیاریئے رۆچا، نێمرۆچئے وهدا، پیلاتوسا گۆن یَهودیان گوَشت: ”بچارێت، اِش اِنت شمئے بادشاه!“ ۱۵ بله آیان کوکّار کرت: ”گار و گُمساری کن! گار و گُمساری کن! سَلیبی کَشّ!“پیلاتوسا گوَشت: ”شمئے بادشاها سَلیب بِکَشّان؟“مزنێن دینی پێشوایان گوَشت: ”چه کئیسَرا اَبێد، مارا دگه بادشاهے نێست.“ ۱۶ آهِرا، پیلاتوسا ایسّا پئوجیانی دستا دات که سَلیب کشّگ ببیت. گڑا آیان ایسّا برت.
۱۷ ایسّایا سَلیبِش بَڈّا دات و ”کامپۆل“نامێن جاگهێا بُرتِش. اے جاگه اَرَمایی زبانا ”جُلْجُتا“گوَشگَ بیت. ۱۸ همۆدا سَلیبِش کشّت. گۆن آییا دگه دو مردمِش هم سَلیب کَشّت، یکّے اے کَشا و یکّے آ کَشا. ایسّا، آ دوێنانی نیاما اَت. ۱۹ پیلاتوسئے هُکما مئیارنامگێئے سرا نبشته‌اِش کرت و سَلیبئے سرا دْرتکِش. نبشته اے ڈئولا اَت: ”ایسّا ناسِری - یَهودیانی بادشاه.“ ۲۰ چه یَهودیان بازێنێا اے مئیارنامگ وانت، چێا که ایسّائے سَلیب کَشّگئے جاگه چه شهرا دور نه‌اَت و مئیارنامگ اِبرانی و لاتینی و یونانی زبانان نبیسگ بوتگ‌اَت. ۲۱ گڑا یَهودیانی مزنێن دینی پێشوایان گۆن پیلاتوسا گوَشت: ”’یَهودیانی بادشاه‘ نبشته مکن، نبشته کن که اے مردا گوَشتگ من یَهودیانی بادشاه آن.“ ۲۲ پیلاتوسا گوَشت: ”آ چیزّ که من نبشته کرتگ، بدلَ نبیت.“
۲۳ سَلیب کَشّگئے وهدا، پئوجیان ایسّائے پُچّ زرتنت، چار بهرا بهر کرتنت، په هر پئوجیێا یکّ بهرے. بله ایسّائے جامگ مَنت که هچّ چاکی پِر نه‌اَت، سَرا تان پادا یَک‌گواپ اَت. ۲۴ گڑا آیان وت‌مان‌وتا گوَشت: ”بیاێت، اِشیا ندِرّێن، اِشیئے سرا لاٹری و کُرَه‌کشّیَ کنێن، چارێن بارێن کئیا رسیت؟“هما ڈئولا که هُدائے پاکێن کتابَ گوَشیت، هما ڈئولا بوت:
”منی پُچِّش وت‌مان‌وت بهر کرتنت و
جامگئے سرا کُرَه‌کشّی‌اِش کرت.“
پئوجیان همے کار کرت.
۲۵ سَلیبئے نزّیکّا ایسّائے مات و ماتئے گهار و کْلیوپاسئے جَن مَریَم و مَریَم مَگدَلینی اۆشتاتگ‌اَتنت. ۲۶ وهدے ایسّایا وتی مات دیست که هما دۆستێن مُریدئے کِرّا اۆشتاتگ، گۆن ماتا گوَشتی: ”او بانُک! اے تئیی چُکّ اِنت.“ ۲۷ رَندا گۆن وتی مُریدا گوَشتی: ”اے تئیی مات اِنت.“آ مُریدا چه هما وهدا مَریَم برت و وتی لۆگا داشت.
۲۸ نون ایسّایا دیست که سجّهێن چیزّ سَرجم بوتگ‌اَنت گڑا پاکێن کتابئے هبرئے راست و سَرجم بئیَگئے هاترا گوَشتی: ”تُنّیگ آن.“ ۲۹ چه تْرپشێن شرابا پُرّێن کونزگے اۆدا اێر اَت. آیان اِسْپنجے زرت و شرابێن کرت، زوپائے ٹالێئے سرا بست و ایسّائے لُنٹان پِر مُشت. ۳۰ وهدے ایسّایا شراب دپ جت، گوَشتی: ”کار هلاس بوت!“رَندا سری جَهل کرت و ساهی دات.
۳۱ آ رۆچ، شَبّتئے تئیاریئے رۆچ اَت. یَهودیان نلۆٹت که سلیب کَشّتگێنانی جۆن و جَسَد شَبَّتئے رۆچا سَلیبئے سرا لۆنجان ببنت، چێا که اے هاسێن شَبَّتے اَت. پمێشکا چه پیلاتوسا دَزبندی‌اِش کرت که آ سئیێنانی پادان پرۆش و چه سَلیبانی سرا اێرِش گێج. ۳۲ گڑا پئوجی دێما آتکنت و هما دوێنانی پادِش پرۆشتنت که گۆن ایسّایا سَلیب کَشّگ بوتگ‌اَتنت، پێسرا یکّێئے و پدا دومیئے. ۳۳ ایسّائے کِرّا که آتکنت، دیستِش که آییا ساه داتگ. پمێشکا آییئے پادِش نپرۆشتنت. ۳۴ بله چه پئوجیان یکّێا، نئیزَهے ایسّائے کَش و پهناتا جت و هما دمانا چه آییئے جۆنا هۆن و آپ در آتک. ۳۵ هما کسا که چَمِّ وت اے چیزّ دیستگ‌اَنت، شاهدیَ دنت تانکه شما ایمان بیارێت. آییئے شاهدی راست اِنت. آ زانت که من راستَ گوَشان. ۳۶ اے کار هما ڈئولا بوت تانکه پاکێن کتابئے اے هبر راست و سَرجم ببیت که گوَشیت: ”آییئے هچّ هڈّ پرۆشگَ نبیت.“ ۳۷ پاکێن کتاب دگه یکّ جاگهے هم گوَشیت: ”آ هماییا چارنت که آییئے جانِش ٹُنگ ٹُنگ کرتگ.“
۳۸ رَندا، ایسُّپ نامێن مردے که اَریماتیائے شهرئے نندۆک اَت، پیلاتوسئے کِرّا شت و ایسّائے جۆنی لۆٹت. آ ایسّائے مُریدے اَت بله چێرُکایی، چێا که چه یَهودیانَ تُرسِتی. پیلاتوسا اِجازت دات و آییا جۆن برت. ۳۹ نیکودیموس، هما که پێسرا شپے ایسّائے گِندگا شتگ‌اَت، آتک و گۆن وت لهتێن هۆر و هئوارێن مُرّ و ائوود و کَرْزاَرواهی آورت که سی کیلوئے کِساسا اَتنت. ۴۰ نون آیان ایسّائے جۆن زرت و یَهودیانی کَبر و کَپنئے رسمانی رِدا، گۆن آ وشبۆان لیلُمێن پٹّیان پتات. ۴۱ هما جاگهئے نزّیکّا که ایسّا سَلیب کشّگ بوت، باگے هست‌اَت که اۆدا نۆکێن کَبرے جتگ‌اَتِش و اَنگت کَسّ آییئے تها کَبر کنگ نبوتگ‌اَت. ۴۲ یَهودیانی تئیاریئے رۆچ اَت و کَبر نزّیکّا اَت، پمێشکا ایسّائے جۆنِش همۆدا کَبر کرت.