۱ سئیمی رۆچا، جَلیلا، کانا نامێن مێتگێا، سور و آرۆسے هست‌اَت و ایسّائے مات همۆدا اَت. ۲ ایسّا و آییئے مُریدِش هم لۆٹتگ‌اَتنت. ۳ وهدے شراب هَلّتنت، ایسّائے ماتا گۆن آییا گوَشت: ”اِشان دگه شراب نێست.“ ۴ گوَشتی: ”او بانُک! منا و ترا گۆن اِشیا چِه کار؟ منی وهد اَنگت نئیاتکگ.“ ۵ ماتا گۆن کارندهان گوَشت: ”هرچے که شمارا گوَشیت، هما کارا بکنێت.“
۶ اۆدا شَش سِنگێن کونزگ اێر اَت که هر یکّێا هشتاد تان سَد و بیست لیتر آپَ داشت و یَهودیانی شُشت و شۆدی رسمان کارمرزَ بوتنت. ۷ ایسّایا گۆن کارندهان گوَشت: ”کونزگان چه آپا پُرّ کنێت.“گڑا کونزگِش چه آپا پُرّ کرتنت. ۸ ایسّایا گوَشت: ”نون کَمُّکے بکَشّێت و په دیوانئے کماشا ببرێت.“آیان اَنچُش کرت. ۹ اے آپ که شراب بوتگ‌اَتنت، دیوانئے کماشا چَشِتنت. نزانتی که چه کجا آرگ بوتگ‌اَنت، بله هما کارندهان که آپ کَشّتگ‌اَتنت، آیانَ زانت. نون دیوانئے کماشا، سالۆنک تئوار جت و ۱۰ گوَشتی: ”هرکَس مهمانان شرترێن شرابا پێسرا دنت. وهدے آ مَست و ملارَ بنت، رَندا اَدنا و اَرزانترێنا کاریت. بله تئو شرترێن شراب نۆکی آورتگ.“
۱۱ اے مۆجزه و اَجَبَّتێن نشانی که ایسّایا جَلیلئے مێتگ کانایا پێش داشت، آییئے ائولی مۆجزه اَت. آییا گۆن همے مۆجزها وتی شان و شئوکت زاهر کرت و مُریدان آییئے سرا ایمان آورت. ۱۲ رَندا ایسّا گۆن وتی مات و برات و مُریدان کَپَرناهومئے شهرا شت. لهتێن رۆچا همۆدا داشتِش.
۱۳ یَهودیانی پِسَه، بزان سَرگوَزئے ائیید نزّیکّ اَت. پمێشکا، ایسّا اورشَلیما شت. ۱۴ دیستی که مزنێن پرستشگاها مردم گۆک و پَس و کپۆتئے بها کنگا گُلاێش اَنت و سَرّاپ هم نِشتگ‌اَنت. ۱۵ گڑا چه سادا هئیزرانے جۆڑی کرت و سجّهێن سئوداگر و پَس و گۆکی چه پرستشگاها گلّێنتنت و سَرّاپانی زرّ و سِکَّه‌ای هم رێتکنت و ٹێبَلی چپّی کرتنت. ۱۶ گۆن کپۆت بها کنۆکان گوَشتی: ”اے چیزّان چه اِدا در کنێت. منی آسمانی پتئے لۆگا بازارے مکنێت.“ ۱۷ نون مُرید یاتا کپتنت که هُدائے پاکێن کتابا نبشته اِنت: آ جۆش و گئیرت که منا په هُدائے لۆگا هست‌اِنت، منا سۆچیت و پُرَ کنت.
۱۸ گڑا یَهودیان گوَشت: ”تئو گۆن چۆنێن مۆجزه و اَجَبَّتێن نشانیے سابتَ کنئے که ترا اے کارانی اِجازت هست‌اِنت؟“ ۱۹ ایسّایا گوَشت: ”اے مزنێن پرستشگاها بپْرۆشێت، من سئے رۆچا پدا چستیَ کنان.“ ۲۰ یَهودیان گوَشت: ”اے مزنێن پرستشگاه، چِلّ و شَش سالا جۆڑ کنگ بوتگ، تئو چۆن اِشیا سئے رۆچا چستَ کنئے؟“ ۲۱ بله آ پرستشگاه که ایسّا آییئے بارئوا هبر کنگا اَت، آییئے جندئے جسم و جان اَت. ۲۲ ایسّائے مِرَگ و جاه جنَگا رَند، مُرید یاتا کپتنت که آییا وت اے هبر گوَشتگ‌اَت. نون آیان هُدائے پاکێن کتاب و ایسّائے هبرانی سرا ایمان آورت.
۲۳ آ رۆچان، ایسّا سَرگوَزئے ائییدا اورشَلیما اَت. بازێن مردمێا که ایسّائے اَجَبَّتێن نشانی دیستنت، آییئے نامئے سرا ایمانِش آورت. ۲۴ بله ایسّایا آیانی ایمانئے سرا باوَر نکرت، چێا که آییا سجّهێنانی دل و درونَ زانت. ۲۵ آییا انسانئے بارئوا هچکَسئے گواهیئے زلورت نه‌اَت، چێا که آ، انسانئے دلئے هر هالا سهیگ اَت.