۱دَ امزُو غَیت بعضی کسا از منطقِه یهُودیه دَ اَنطاکیه اَمَدُد و دَ بِرارای ایماندار تعلِیم دَده مُوگُفت: ”تاکه دَ مُطابِق سُنَتِ مُوسیٰ پَیغمبر خَتنه نَشُنِید، نِجات پَیدا نَمیتَنِید.“ ۲وختِیکه پولُس و بَرنابا قد ازوا بَحث و گُفتُگوی کَلو کد، قرار امی شُد که پولُس و بَرنابا قد چند نفرِ دِیگه بخاطرِ امزی مَسئله دَ پیشِ رسُولا و بُزُرگای جماعتِ ایماندارا دَ اورُشَلیم بوره. ۳پس جماعتِ ایماندارای اَنطاکیه اُونا ره رَیی کد و دَ حالِیکه از منطقه های فِنِیقیه و سامِره تیر مُوشُد، اُونا دَ بارِه ایمان اَوُردونِ مِلَّت های غَیرِ یهُود دَزوا خبر رَسَند و اِی خبر باعِثِ خوشی تمامِ ایماندارا شُد. ۴وختِیکه اُونا دَ اورُشَلیم رسِید، جماعتِ ایماندارا، رسُولا و بُزُرگا اُونا ره خوش اَمدِید گُفت، و پولُس و بَرنابا دَ بارِه پگ کارای که خُدا دَ وسِیلِه ازوا انجام دَده بُود، نَقل کد. ۵اوخته بعضی کسا از فِرقِه فرِیسی که دَ مَولا عیسیٰ ایمان اَوُرده بُود، باله شُده گُفت: ”تمامِ ایماندارای غَیرِ یهُود باید خَتنه شُنه و ام بَلدِه ازوا باید اَمر شُنه که شریعتِ مُوسیٰ ره دَ جای بیره.“
۶پس رسُولا و بُزُرگا دَ بَین خُو شِشت تا دَ بارِه امزی مَسئله مشوَره کُنه. ۷بعد از بَحث و گُفتُگوی غَدر پِترُس باله شُده دَزوا گُفت: ”اَی بِرارای عزِیز، شُمو مِیدَنِید که مُدَت ها پیش خُدا مَره از قد شُمو اِنتِخاب کد تا غَیرِ یهُودیا پَیغامِ خوشخبری ره از دانِ ازمه بِشنَوه و ایمان بیره. ۸و خُدای که از دِل ها آگاه اَسته، قد دَدونِ روح اُلقُدس دَزوا دَ بارِه ازوا شاهِدی دَد، امُو رقم که دَ حقِ ازمو ام کدُد. ۹اُو دَ بَینِ ازمو و ازوا هیچ فرق قایل نَشُد، چراکه دِل های ازوا ره دَ وسِیلِه ایمان دَ عیسیٰ مسیح پاک کد. ۱۰پس آلی چرا خُدا ره اِمتِحان مُوکُنِید تا یُوغی ره دَ گردونِ پَیرَوا بیلِید که نَه بابه‌کَلون مو طاقتِ بُردون شی ره دَشت و نَه خودون مو؟ ۱۱ اِیطور نَکُنِید، چُون مو ایمان دَری که تَوَسُطِ فَیضِ مَولا عیسیٰ نِجات پَیدا مُونی، امُو رقم که اُونا ام نِجات پَیدا مُونه.“ ۱۲اوخته تمامِ جماعت چُپ شُد و دَ تورای بَرنابا و پولُس که دَ بارِه مُعجزه‌ها و چِیزای عجِیب که خُدا دَ بَینِ مردُمِ غَیرِ یهُود تَوَسُطِ ازوا انجام دَده بُود، گوش دَد. ۱۳امی که تورای ازوا خلاص شُد، یعقُوب گُفت: ”بِرارای عزِیز، دَز مه گوش بِدِید. ۱۴شِمعون پِترُس بَلدِه مو بیان کد که خُدا چی رقم از اوّل نظرِ لُطف کد که از بَینِ مِلَّت ها یگ قَوم ره بَلدِه نام خُو اِنتِخاب کنه. ۱۵اِی مُطابِقِ تورای پَیغمبرا اَسته، امُو رقمِیکه دَ کلامِ مُقَدَّس نوِشته یَه:
۱۶’بعد ازی چِیزا ما پس مییُم
و خانِه داوُود ره که چَپه شُده، دُوباره آباد مُونُم؛
ما خرابی های شی ره بازسازی مُونُم،
و اُو ره دُوباره دَ سرِ پای شی ایسته مُونُم،
۱۷تا باقی بَنی آدم خُداوند ره جُستُجو کنه،
یعنی پگِ مِلَّت های که نامِ ازمه دَ سرِ ازوا ایشته شُده.‘
اِی ره خُداوند که امی چِیزا ره انجام مِیدیه مُوگیه ۱۸و از قدِیم معلُومدار کده. ۱۹پس نظرِ ازمه اینی اَسته: کسای که از بَینِ مِلَّت ها سُون خُدا پس مییه، اُونا ره نَباید دَ تکلِیف بِندَزی، ۲۰بَلکِه دَزوا نوِشته کنی که از آلُوده شُدو قد بُت ها، از زِناکاری، از خوردونِ گوشتِ حَیوانای قَپه شُده و از خوردونِ خُون دُوری کنه، ۲۱چراکه از زمانای قدِیم دَ هر شار مُوسیٰ کسای ره دَشت که شریعت شی ره تعلِیم مِیدَد و هر روزِ آرام دَ عِبادت خانه ها اُو ره میخاند.“
۲۲پس رسُولا و بُزُرگا قد تمامِ جماعتِ ایماندارا فَیصَله کد که چند نفر ره از مَنِه خُو اِنتِخاب کنه و قد پولُس و بَرنابا دَ اَنطاکیه رَیی کُنه. اُونا یهُودای مشهُور دَ بَرسابا و سِیلاس ره اِنتِخاب کد که هر دُوی شی دَ بَینِ بِرارونِ ایماندار مقامِ رهبری ره دَشت.
۲۳اوخته اُونا اینی خط ره نوِشته کده از دِستِ بِرارو رَیی کد:
” مو رسُولا و بُزُرگا، بِرارون شُمو سلام خُو ره دَز شُمو بِرارونِ ایماندارِ غَیرِ یهُود که دَ اَنطاکیه، سُوریه و قِیلِیقیه اَستِید، تقدِیم مُونی.
۲۴مو شِنِیدی که بعضی کسا از مینکلِ ازمو اَمَده و بِدُونِ اَمرِ ازمو قد تورای خُو شُمو ره دَ تَشوِیش اَندخته و فِکرای شُمو ره گڈوَڈ کده. ۲۵امزی خاطر پگ مو دَ یگ دِل تصمِیم گِرِفتی که چند نفر ره اِنتِخاب کنی و قد عزِیزای خُو، بَرنابا و پولُس دَ پیشِ ازشُمو رَیی کنی، ۲۶ قد مَردای که جان خُو ره از خاطرِ خِدمتِ مَولای مو عیسیٰ مسیح دَ خطر اَندخته. ۲۷پس مو یهُودا و سِیلاس ره رَیی کدی تا امی چِیزا ره زِبونی دَز شُمو بُگه.
۲۸چُون روح اُلقُدس و مو لازِم دِیدی که بارِ گِرَنگ دَ سر شُمو نَهایلی، بَغَیر از امزی دستُورای ضرُوری:
۲۹از هر چِیزی که بَلدِه بُت ها قُربانی شُده بَشه، از خُون، از گوشتِ حَیوانای قَپه شُده و از زِناکاری دُوری کُنِید. اگه امزی چِیزا خود ره نِگاه کُنِید، کارِ خُوب مُوکُنِید. سلامَت بَشِید.“
۳۰پس اُونا رَیی شُده دَ اَنطاکیه رفت و دَ اُونجی جماعتِ ایماندارا ره جَم کده خط ره دَزوا دَد. ۳۱وختِیکه مردُم امُو خط ره خاند، اُونا از پَیغامِ تشوِیق کُنِندِه شی غَدر خوشحال شُد. ۳۲یهُودا و سِیلاس که هر دُوی شی از جُملِه اَنبیا بُود، قد تورای مُفَصل خُو بِرارو ره تشوِیق و تقویَت کد. ۳۳بعد ازُو که اُونا یگ مُدَت ره دَ اُونجی مَند، بِرارای ایماندارِ اَنطاکیه اُونا ره دَ سلامَتی پس سُون کسای رَیی کد که از پیشِ ازوا اَمدُد. ۳۴[مگم دَ نظرِ سِیلاس خُوب بُود که دَ اَنطاکیه بُمَنه.] ۳۵لیکِن پولُس و بَرنابا دَ اَنطاکیه مَند و قد غَدر بِرارای دِیگه دَ تعلِیم و وَعظِ کلامِ خُداوند مَشغُول بُود.
۳۶بعد از چند روز پولُس دَ بَرنابا گُفت: ”بیه، پس دَ شارای بوری که کلامِ خُداوند ره دَزوا اِعلان کده بُودی و بِنگری که ایماندارا چِطور اَسته.“ ۳۷بَرنابا میخاست که یوحَنّای مشهُور دَ مَرقَس ره ام قد خُو بُبره. ۳۸مگم پولُس صَلاح نَدِید که اُو ره قد خُو بُبره، چراکه مَرقَس اُونا ره دَ پَمفِیلیه ایله کدُد و دَ کارِ اِعلانِ خوشخبری قد ازوا اِدامه نَدَده بُود. ۳۹بَحثِ ازوا دَ اندازِه کَلو شُد که اُونا یگدِیگِه خُو ره ایله کد و بَرنابا مَرقَس ره گِرِفته دَ کِشتی سُون جزِیرِه قِبرِس رفت. ۴۰لیکِن پولُس، سِیلاس ره همسَفر خُو اِنتِخاب کد و دَ وسِیلِه بِرارو دَ فَیضِ خُداوند سِپُرده شُده حَرکت کد. ۴۱اُو از سُوریه و قِیلِیقیه تیر شُد و جماعت های ایماندارا ره دَ امزُو جای ها تقویَت کد.