۱امی که شورِش خلاص شُد، پولُس پَیرَوای مَولا عیسیٰ ره طلب کده اُونا ره تشوِیق کد و بعد از خُدا حافِظی حَرکت کده سُون مَقدونیه رَیی شُد. ۲اُو دَ امزُو منطِقا سَفر کده قد غَدر تورا ایماندارا ره تشوِیق کد و آخِرِکار دَ یونان رسِید ۳و سِه ماه دَ اُونجی مَند. وختِیکه میخاست قد کِشتی دَ سُوریه بوره، فامِید که یهُودیا دَ ضِد شی راه جوری کده. امزی خاطر تصمِیم گِرِفت که از راهِ مَقدونیه پس بوره. ۴اینی نفرا قد شی قتی بُود: سوپاتروس باچِه پیروس از بیریه؛ آرِستَرخُس و سِکُندوس از تِسالونِیکی؛ گایوس از دِربِه؛ امچُنان تِیموتائوس، تِیخِیکاس و تروفِیموس از ولایتِ آسیا. ۵اِی نفرا پیشلو رفت و دَ تروآس معطلِ ازمو شِشت. ۶مگم مو بعد از عِیدِ فطِیر از شارِ فِیلِیپی دَ کِشتی سوار شُدی و پَنج روز بعد دَ بندرِ تروآس دَ پیشِ ازوا رسِیدی و یگ هفته دَ اُونجی مَندی.
۷دَ شاوِ یگشَمبِه بَلدِه مَراسِمِ ٹوٹه کدونِ نانِ آخِرِ عیسیٰ مسیح قد یگدِیگِه خُو جَم شُدی. پولُس از خاطری که روزِ دِیگِه شی دَ سَفر رَیی بُود، بَلدِه ایماندارا موعِظه کد و تا نِیمِ شاو دَ نقل های خُو اِدامه دَد. ۸دَ باله‌خانِه که جَم شُده بُودی چِراغای زیاد روشو بُود. ۹ دَ اُونجی یگ جوان دَ نامِ اِفتِیخوس دَ دانِ کِلکِین شِشته بُود و دَ حالِیکه پولُس نَقل مُوکد دَ بَلِه ازُو کم کم خاو میمَد. دَ آخِر خاو سر شی زور شُد و اُو از منزِلِ سِه تاه پَرِید. وختِیکه اُو ره باله کد، اُو مُرده بُود. ۱۰پولُس تا رفت و خود ره دَ بَلِه شی اَندخته اُو ره دَ بَغل خُو گِرِفت و گُفت: ”تَشوِیش نَکُنِید. جان شی دَ وجُود شی اَسته.“ ۱۱وختِیکه پولُس دُوباره باله رفت و نان ره ٹوٹه کده خورد، اُو کَلو دیر گُفتُگوی خُو ره اِدامه دَد یعنی تا دَمِ روزواز شُدو؛ بعد ازُو بُر شُده رفت. ۱۲و اُونا امُو جوان ره زِنده دَ خانه بُرد و فِکرِ پگ شی کامِلاً آرام شُد.
۱۳مو پیش از دِیگرو دَ کِشتی سوار شُده طرفِ بندرِ اَسوس حَرکت کدی تاکه پولُس ره ازُونجی سوار کُنی. اُو امی رقم فَیصَله کد، چُون خودِ ازُو خاست که تا اُونجی ره پای پیده بوره. ۱۴وختِیکه پولُس دَ شارِ اَسوس قد مو یگجای شُد، اُو ره دَ کِشتی سوار کدی و دَ بندرِمِیتِیلینی رفتی. ۱۵روزِ دِیگِه شی ازُونجی دَ دریا رَیی شُده دَ نزدِیکِ جزِیرِه خِیئوس رسِیدی و روزِ سِوّم شی دَ جزِیرِه ساموس رسِیدی. صَباحِ امزُو روز دَ بندرِ مِیلیتُس اَمَدی، ۱۶چراکه پولُس تصمِیم گِرِفتُد که دَ اِفِسُس گِیر نَکُنه، چُون نَمیخاست دَ ولایتِ آسیا وخت تیر کنه. اُو عَجَله دَشت که زُودتَر دَ اورُشَلیم بِرَسه و دَ صُورتِ اِمکان عِیدِ «روزِ پِنجاهُم» ره دَ اُونجی بَشه.
۱۷پولُس از مِیلیتُس یگ پَیغام دَ اِفِسُس رَیی کد و بُزُرگای جماعتِ ایماندارا ره دَ پیش خُو کُوی کد. ۱۸وختِیکه اُونا دَ پیش شی اَمَد، پولُس دَزوا گُفت: ”شُمو مِیدَنِید، از اوّلِین روزِ که ما پای خُو ره دَ آسیا ایشتُم دَ تمامِ وختِیکه قد شُمو بُودُم چِطور رفتار کدُم، ۱۹ یعنی چِطور قد شِکسته-نَفسی کامِل و آودِیده های کَلو مَولا عیسیٰ ره خِدمت کدُم، باوجُودِ آزمایش های که دَ وسِیلِه دَسِیسه های یهُودیا دَ بَلِه مه اَمَد. ۲۰ شُمو مِیدَنِید که ما از تعلِیم دَدونِ هر چِیزی که بَلدِه شُمو فایده دَشت دِریغ نَکدُم، بَلکِه پَیغام ره دَز شُمو رَسَندُم و چی دَ جای عُمُومی، چی دَ خانه های شُمو دَز شُمو تعلِیم دَدُم. ۲۱ما دَ یهُودیا و یونانیا اِعلان کدُم که اُونا دَ حُضُورِ خُدا توبه کُنه و دَ مَولای مو عیسیٰ مسیح ایمان بیره. ۲۲و آلی دَ فرمونِ روح اُلقُدس دَ اورُشَلیم مورُم و ازی که دَ اُونجی چِیزخیل دَ سر مه مییه نَمِیدَنُم، ۲۳سِوای که روح اُلقُدس دَ هر شار دَز مه خبر مِیدیه که بَندی‌گری و سختی ها دَ اِنتِظار مه اَسته. ۲۴مگم اِدامِه زِندگی بَلدِه مه اُوقَس اَرزِش نَدره. فقط آرزوی مه امی اَسته که دَورِه خُو ره دَ آخِر بِرسَنُم و خِدمتی ره که مَولا عیسیٰ دَ عُهدِه مه ایشته، یعنی اِعلانِ خوشخبری فَیضِ خُدا ره انجام بِدیُم. ۲۵آلی ما مِیدَنُم که هیچ کُدَمِ ازشُمو که ما دَ مینکل شُمو گشته پادشاهی خُدا ره دَز شُمو اِعلان کدُم، دِیگه رُوی مَره نَمِینگرِید. ۲۶امزی خاطر اِمروز بَلدِه شُمو واضِح مُوگیُم که دَ روزِ آخِرَت خُونِ هیچ کس دَ گردونِ ازمه نِیَسته، ۲۷چراکه دَ اِعلان کدونِ تمامِ مقصدِ خُدا بَلدِه شُمو هیچ کوتاهی نَکدیم. ۲۸فِکر خُو ره سُون خود و سُون پگ رَمِه که روح اُلقُدس شُمو ره دَ سرِ ازوا سرپرَست جور کده، بِگِیرِید تا دَ بَلِه جماعتِ ایماندارای خُدا چوپونی کنِید، چُون خُدا اُونا ره قد خُونِ باچِه خُو خرِیده. ۲۹ما مِیدَنُم که بعد از رفتون مه گُرگ های دَرِنده دَ مینکل شُمو مییه و دَ بَلِه رمه رَحم-و-دِلسوزی نَمُونه. ۳۰حتیٰ از مینکلِ خودون شُمو کسای باله مُوشه که حقِیقت ره تغیِیر مِیدیه تا پَیرَوا ره دَ دُمبالِ خود خُو کش کُنه. ۳۱پس آگاه بَشِید و پُرمُشت نَکُنِید که دَ اِی مُدَتِ سِه سال، شاو و روز از اَخطار دَدو قد آودِیده دَ هر کُدَم شُمو فارِغ نَبُودُم. ۳۲آلی شُمو ره دَ خُدا و دَ کلامِ پُرفَیضِ ازُو تسلِیم مُونُم که مِیتنه شُمو ره آباد کنه و شُمو ره دَ مینکلِ تمامِ کسای که تقدِیس شُده یگ میراث بِدیه. ۳۳ما چِیم مه دَ طِلّا و نُقره و یا کالای کسی نَمَنده. ۳۴خودون شُمو مِیدَنِید که قد امزی دِستا زَحمت کشِیدیم و ضرُورَت های خود خُو و کسای ره که قد مه بُود، پُوره کدیم. ۳۵ما عمَلاً دَز شُمو نِشو دَدُم که مو باید امی رقم زَحمت بِکشی و دَ آدمای ناتو یاری کنی و تورای مَولا عیسیٰ ره دَ یاد دَشته بَشی که مُوگُفت: ’بخشِیدو از گِرِفتو کده بَرکت شی کَلو اَسته.‘“ ۳۶وختِیکه پولُس تورای خُو ره دَ آخِر رَسَند، قد پگِ ازوا زانُو زَده دُعا کد. ۳۷اُونا پگ شی غَدر چخرا کد و پولُس ره دَ بغل خُو گِرِفته ماخ کد. ۳۸امی تورِه پولُس اُونا ره از پگ کَلوتَر غَمگی کده بُود که گُفت: ”دِیگه رُوی مَره نَمِینگرِید.“ اوخته اُونا اُو ره تا بیخِ کِشتی همراهی کد.