۱بعد از پَنج روز حنانیا پیشوای بُزُرگ قد چند نفر از رِیش سفیدا و یگ وکِیلِ دعوا دَ نامِ تِرتُولُس دَ قَیصَریه رسِید و اِدعاهای خُو ره دَ ضِدِ پولُس دَ والی پیش کد. ۲وختِیکه پولُس ره حاضِر کد، تِرتُولُس اِدعاهای خُو ره شُروع کده گُفت: ” جنابِ عالِیقدر، بخاطرِ حُکمرانی شُمو مو دَ اَمنیَتِ کامِل اَستی و بخاطرِ دُوراَندیشی شُمو دَ امزی قَوم بِهبُودی غَدر دَ وجُود اَمَده ۳و مو ازی چِیزا دَ هر جای و از هر طرِیق از شُمو قدردانی و شُکرگُزاری مُونی. ۴و آلی ازی که وخت شُمو ره کَلو نَگِیرُم، خاهِش مُونُم که قد امزُو لُطفِ همیشَگی خُو دَ عرضِ کوتاهِ مو تَوَجُه کُنِید: ۵دَز مو معلُوم شُده که اِی آدم یگ شخصِ مُضِر اَسته و دَ مینکلِ تمامِ یهُودیا دَ سراسرِ دُنیا فِتنه اَندازی مُونه و امچُنان یگ سرکردِه فِرقِه ناصِری اَسته. ۶اُو حتیٰ کوشِش مُوکد که خانِه خُدا ره نَجِس کُنه، مگم مو اُو ره دِستگِیر کدی [و مو میخاستی که دَ مُطابِقِ شریعتِ خودون خُو اُو ره محاکِمه کُنی ۷مگم لِیسیاس قومَندان اَمَد و دَ زور اُو ره از چنگ مو خلاص کد ۸و دَ مُدَعیای ازُو اَمر کد که دَ پیش شُمو بییه.] اگه خودون شُمو ازُو تحقِیق کُنِید، حقِیقتِ اِدعاهای مو دَ خِلافِ ازُو بَلدِه شُمو روشو مُوشه.“ ۹یهُودیا ام دَ یگصَدا اِدعاهای تِرتُولُس ره تایِید کد و گُفت: ”راست مُوگه!“
۱۰وختی والی سُون پولُس اِشاره کد که گپ بِزنه، اُو اینی رقم گُفت: ”ما خبر دَرُم که غَدر سال ها اَسته که شُمو قاضی ازی مِلَّت اَستِید، امزی خاطر ما دَ خوشی از خود خُو دِفاع مُونُم. ۱۱شُمو مِیتنِید معلُوم کُنِید، کَلوتَر از دوازده روز نَشُده که ما بَلدِه عِبادت دَ اورُشَلیم رفته بُودُم. ۱۲هیچ کس مَره نَدِیده که دَ خانِه خُدا یا دَ عِبادت خانه ها و یا دَ داخِلِ شار قد یَگو نفر بَحث کده بَشُم و یا مردُم ره دَ شورِش اَوُرده بَشُم. ۱۳و اِدعاهای ره که فِعلاً دَ ضِد مه جور کده اُونا نَمِیتنه که دَ پیش شُمو دَ ثبُوت بِرسَنه. ۱۴مگم دَ حُضُور شُمو اِقرار مُونُم که ما خُدای بابه‌کَلونای خُو ره دَ مُطابِقِ امزُو راهِ که اُونا بِدعَت مُوگیه، عِبادت مُونُم و دَ پگِ چِیزای که مُطابِقِ تَورات و نوِشته های پَیغمبرا اَسته، عقِیده دَرُم. ۱۵ما رقمِ خودِ امزی نفرا دَ خُدا اُمِید دَرُم که بَلدِه آدمای نیک و بَد قیامت دَ پیشِ رُوی اَسته. ۱۶امزی خاطر از حد کَلو کوشِش خُو ره مُونُم که هر وخت دَ پیشِ خُدا و اِنسان وِجدانِ پاک دَشته بَشُم. ۱۷ما پس از چندِین سال دَ اورُشَلیم اَمدُم تا بَلدِه غرِیبای قَوم خُو کومَک بیرُم و هدیه ها تقدِیم کنُم. ۱۸بعد از مراسِمِ پاک شُدو دَمزی کار مَشغُول بُودُم که اُونا مَره دَ خانِه خُدا پَیدا کد و دَ اُونجی نَه بِیر-و-بار بُود و نَه شَر-و-شور. ۱۹مگم چند نفر از یهُودیای آسیا که دَ اُونجی بُود باید دَ پیش شُمو حاضِر شُنه و اگه کُدَم اِدعای دَ ضِدِ ازمه دَره، خودونِ ازوا بُگه. ۲۰یا امی کسای که دَ اِینجی اَسته، بُگیه: وختِیکه ما دَ حُضُورِ شورا ایسته بُودُم، دَز مه چی جُرم پَیدا شُد، ۲۱بَغَیر ازی که دَ بَینِ ازوا قد آوازِ بِلند گُفتُم: ’از خاطرِ اُمِید دَ قیامتِ مُرده ها، ما اِمروز دَ اِینجی محاکِمه مُوشُم!‘“
۲۲مگم فیلِکس والی که خود شی از راهِ مَولا عیسیٰ خُوب صَحیح خبر دَشت، محاکِمه ره پس اَندخته گُفت: ”وختِیکه لِیسیاس قومَندان دَ اِینجی بییه، اوخته ما دَ بارِه دعوای شُمو فَیصَله مُونُم.“ ۲۳پس دَ یگ صاحِب مَنصَب اَمر کد که پولُس ره نظر بَند کُنه، مگم تا یگ اندازِه اُو ره آزاد بیله و مانِع رفت-و-اَمَدِ دوستای پولُس که بَلدِه پُوره کدونِ ضرُورَت و خِدمت شی مییه، نَشُنه.
۲۴چند روز بعد فیلِکس قد درُوسِلّا خاتُون خُو که یگ خاتُونِ یهُودی بُود، دَ اُونجی اَمَد و پولُس ره دَ پیش خُو طلب کده دَ تورای شی دَ بارِه ایمان دَ عیسیٰ مسیح گوش دَد. ۲۵مگم وختِیکه دَ بارِه عدالت، پرهیزگاری و جَزای آخِرَت توره گُفت، فیلِکس ترس خورد و گُفت: ”بَلدِه فِعلاً بورُو، غَیتِیکه فرصت پَیدا شُد، تُو ره بسم طلب مُونُم.“ ۲۶دَ حینِ حال فیلِکس اُمِیدوار بُود که شاید پولُس بَلدِه شی پَیسه بِدیه و ازی خاطر اکثرِ وخت اُو ره طلب کده قد شی نَقل مُوکد.
۲۷مگم بعد از دُو سال پورکیوس فِستوس جانِشِینِ فیلِکس شُد. و ازی که فیلِکس میخاست دَ حقِ یهُودیا یگ نیکی کُنه، اُو پولُس ره دَ بَندی‌خانه نِگاه کد.