۱دَ زمانِ حُکمرانی خشایارشاه، امُو خشایارشاه که از هِندوستان تا کُوش دَ بَلِه یگ صد و بِیست و هفت ولایت حُکمرانی مُوکد، اینی واقِعه رُخ دَد: ۲دَ امزُو زمانِ وختِیکه خشایارشاه دَ بَلِه تَختِ پادشاهی خُو دَ قصرِ شُوش شِشتُد، ۳اُو دَ سالِ سِوّمِ پادشاهی خُو بَلدِه پگِ نفرای دَربار و خِدمتگارای خُو یگ مِهمانی ترتِیب دَد. قُدرتمَندای فارس و ماد، کٹه‌سرا و والی های ولایت‌ها ام دَ اُونجی حُضُور دَشت. ۴اوخته اُو مال و دارایی پادشاهی خُو و شان و شَوکتِ بُزُرگی خُو ره بَلدِه روزای کَلو، یعنی یگ صد و هشتاد روز نِشو دَد. ۵وختی امُو روزا خلاص شُد، پادشاه بَلدِه تمامِ کسای که دَ پایتَخت دَ شُوش بُود، بَلدِه ریزه و کٹه دَ حَولی باغِ خانِه پادشاه یگ مِهمانی هفت روزه دَد. ۶دَ اُونجی پرده های کتانِ سفید و لاجوَردی قد ریشمه های کتانِ سفید و چُوغِ اَرغَوانی دَ حلقه های نُقره‌یی دَ بَلِه ستُون های سنگِ مَرمَرِ سفید اَوزو شُدُد و تَخت های طِلّایی و نُقره‌یی دَ بَلِه سنگفرشی که از سنگِ اَلَگک و مَرمَرِ سفید، دُر و مَرمَرِ سیاه بُود، ایشته شُدُد. ۷وُچی کدنی ها دَ جام های طِلّایی که جام های رقم رقم بُود، بَخش مُوشُد و شرابِ شاهانه از سَخاوَتِ پادشاه پِرَیمو بُود. ۸دَ بارِه وُچی کدو، نظر دَ مُقرَرات هیچ مَوانِع وجُود نَدَشت، چُون پادشاه دَ تمامِ خِدمتگارای دَربار خُو دستُور دَدُد که قد هر کس مُطابِقِ مَیل شی رفتار کنه. ۹دَ امزُو غَیت مَلِکه وَشتی ام بَلدِه خاتُونو دَ قصرِ پادشاهی خشایارشاه یگ مِهمانی ترتِیب دَد.
۱۰دَ روزِ هفتُمِ مِهمانی وختِیکه دِلِ پادشاه از مَستی شراب خوش بُود، اُو دَ بَلِه مِهُومان، بِزتا، حَربونا، بِگتا، اَبَگتا، زِتار و کرکاس که هفت حاضِرباش بُود و دَ حُضُورِ خشایارشاه خِدمت مُوکد، اَمر کد ۱۱که مَلِکه وَشتی ره قد تاجِ شاهانِه شی دَ پیشِ پادشاه بیره تا نُوربَندی ازُو ره دَ مردُم و کٹه کَلونا نِشو بِدیه، چُون اُو خوشنُمای بُود. ۱۲لیکِن مَلِکه وَشتی پَیغامِ پادشاه ره که از دِستِ حاضِرباشا رَیی کدُد نادِیده گِرِفت و نَمَد. پس پادشاه غَدر قار شُد و غَضَبِ ازُو دَ درُون شی اَلَنگه کد.
۱۳اوخته پادشاه قد مَردای حکِیم-و-دانا که از وَضعیَتِ زمان-و-قانُون باخبر بُود مشوَره کد، چُون پادشاه عادت دَشت که قد تمامِ کسای که قانُون و قضاوَت کدو ره مُوفامِید، مشوَره کنه. ۱۴و اینی کسا دَزُو نزدِیک بُود: کَرشِنا، شیتار، اَدماتا، تَرشِیش، مِرِس، مَرسِنا و مِمُوکان، هفت کٹِه فارس و ماد که همیشه دَ حُضُورِ پادشاه بُود و دَ قصرِ پادشاهی دَ قطارِ اوّل مِیشِشت. ۱۵ پادشاه پُرسِید: ”دَ مُطابِقِ قانُون قد مَلِکه وَشتی باید چی کار شُنه؟ چراکه اُو اَمرِ خشایارشاه ره که دَ وسِیلِه حاضِرباشا شُد، دَ جای نَوُرد.“ ۱۶اوخته مِمُوکان دَ حُضُورِ پادشاه و کٹه‌کَلونا اینی رقم گُفت: ”مَلِکه وَشتی نَتنها دَ خِلافِ پادشاه خطا کده، بَلکِه دَ خِلافِ تمامِ کٹه‌کَلونا و مردُمای که دَ پگِ ولایت‌های خشایارشاه اَسته خطا کده. ۱۷چُون وختِیکه اِی کارِ مَلِکه دَ پیشِ پگِ خاتُونو بَرمَلا شُنه، اوخته شُویونِ ازوا دَ نظرِ ازوا خار-و-حقِیر مُوشه و اُونا مُوگه، ’ اونه، خشایارشاه اَمر کد که مَلِکه وَشتی ره دَ پیش شی بیره، ولے اُو نَمَد.‘ ۱۸ اَرے، اِمروز خاتُونوی نفرای دَربارِ فارس و ماد که دَ بارِه امزی رفتارِ مَلِکه شِنِیده، اُونا ام دَ پگِ نفرای دَربارِ پادشاه امی رقم جواب مِیدیه و تَوهِین و غَضَب از حد کَلو پَیدا مُوشه. ۱۹پس اگه صَلاحِ پادشاه بَشه، بیله که یگ فرمانِ شاهانه از طرفِ ازُو صادِر شُنه و دَ قَوانِین فارس و ماد ام ثَبت شُنه تا تغیِیر نَکنه و نوِشته شُنه که وَشتی دِیگه هرگِز دَ حُضُورِ خشایارشاه نَیه. امچُنان پادشاه مقامِ شاهانِه ازُو ره دَ یگِ دِیگه که ازُو کده خُوبتَر بَشه بِدیه. ۲۰وختی امی حُکم که پادشاه صادِر مُونه دَ تمامِ قَلمرَوِ پادشاهی شی که غَدر کٹه اَسته شِنِیده شُنه، اوخته پگِ خاتُونو دَ شُویون خُو اِحترام مُونه، چی کٹه بَشه، چی ریزه.“
۲۱امی توره دَ نظرِ پادشاه و کٹه‌کَلونا خُوب معلُوم شُد و پادشاه مُطابِقِ تورِه مِمُوکان رفتار کد. ۲۲اوخته پادشاه دَ تمامِ ولایت‌های خُو فرمان رَیی کد، دَ هر ولایت مُطابِقِ رسم-اُلخط شی و دَ هر قَوم مُطابِقِ زِبون شی، تا هر مَرد دَ خانِه خُو حاکِم بَشه و مُطابِقِ رَسمِ مردُم خُو تصمِیم بِگِیره.