خرُوج - کِتابِ تَورات - بَخشِ دوّم
فصلِ بِیست و هفتُم
قُربانگاه
۱”یگ قُربانگاه از چیوِ اَکاسی دَ شکلِ چارکُنج تَیار کُو؛ پَنج توغَی دِرازی شی بَشه، پَنج توغَی بَر شی و سِه توغَی بِلندی شی. ۲دَ چار کُنجِ ازُو چار شاخ جور کُو. قُربانگاه و شاخای شی باید از یگ چیو جور شُنه و تمامِ قُربانگاه ره قد رُوی‌کَشِ برونزی بُپوشَن. ۳اَسبابِ ازُو باید پگ شی از برونز تَیار شُنه: سَطل ها بَلدِه بُردونِ خگِشتر، خاک‌اَنداز ها، کاسه ها، چَنگک ها و آتِشدان ها. ۴بَلدِه قُربانگاه یگ اُجاقِ برونزی جور کُو و دَ چار کُنجِ قُربانگاه یگ یگ حَلقِه برونزی ره سخت کُو. ۵اُجاق ره تاه‌تَر از لبِ قُربانگاه جای-دَ-جای کُو تاکه دَ نِیمِ بِلندی قُربانگاه بِرَسه. ۶دِستَک‌چیو‌های دِراز ره از دِرختِ اَکاسی بَلدِه قُربانگاه جور کُو و اُونا ره قد رُوی‌کَشِ برونزی بُپوشَن. ۷وختِیکه قُربانگاه ره مُوبرِید، دِستَک‌چیو ها ره دَ مَنِه حلقه‌های که دَ دُو بغلِ قُربانگاه نَصب شُده، تیر کنِید. ۸قُربانگاه ره از تَخته‌های چیو جور کُو و مَنِه شی خالی بَشه؛ فقط امُو رقم که دَ بَلِه کوه دَز تُو نِشو دَده شُد، باید امُو رقم تَیار شُنه.“
حَولی جایگاهِ مُقَدَّس
۹”بعد ازُو چاردیوالی حَولی جایگاه ره جور کُو. بَلدِه طرفِ جنُوبِ حَولی، پرده ها ره از کتانِ نَرم و مَیده بافت جور کُو که دِرازی شی صد توغَی بَشه ۱۰و اُونا بِیست ستُون دَشته بَشه قد بِیست پایِه برونزی؛ چَنگک ها و پُشت‌بَند‌های ستُون ها نُقره‌یی بَشه. ۱۱امچُنان بَلدِه طرفِ شمالِ چاردیوالی باید پرده ها دَ دِرازی صد توغَی جور شُنه و اُونا بِیست دانه ستُون قد بِیست پایِه برونزی دَشته بَشه. چَنگک ها و پُشت‌بَند‌های شی از نُقره جور شُنه. ۱۲بَلدِه بَرِ چاردیوالی، طرفِ غَرب، پرده‌های پِنجاه توغَی ره قد دَه ستُون و دَه پایه تَیار کُو. ۱۳بَرِ چاردیوالی سَمتِ شَرق، طرفِ آفتَوبُرشُد پِنجاه توغَی بَشه. ۱۴پرده‌های اِی لبِ درگِه چاردیوالی باید پوزده توغَی بَشه قد سِه دانه ستُون و سِه پایِه شی. ۱۵دَ اُو لبِ درگِه چاردیوالی ام باید پردِه پوزده توغَی بَشه قد سِه ستُون و سِه پایِه شی. ۱۶بَلدِه دَروازِه چاردیوالی یگ پردِه بِیست توغَی از کتانِ نَرم و مَیده بافت قد چُوغ‌های لاجوَردی، اَرغَوانی و سُرخ رَنگ دَ وسِیلِه یگ گُلدوزِ لایق جور کُو و بَلدِه شی چار ستُون و چار پایه ام تَیار کُو. ۱۷تمامِ ستُون‌های چاردیوالیِ حَولی باید قد پُشت‌بَند ها و چَنگک‌های نُقره‌یی و قد پایه‌های برونزی جای-دَ-جای شُنه. ۱۸ خُلاصه، دِرازی چاردیوالی باید صد توغَی، بَر شی پِنجاه توغَی و بِلندی شی پَنج توغَی بَشه. پرده‌های شی از کتانِ نَرم و مَیده بافت و پایه‌های شی از برونز جور شُنه. ۱۹تمامِ اَسباب که دَ خِدمتِ جایگاه از شی کار گِرِفته مُوشه قد پگِ میخ‌های خَیمه و میخ‌های چاردیوالی باید از برونز جور شُنه.“
نِگاهداری از چِراغ ها
۲۰”و دَ بَنی اِسرائیل اَمر کُو که روغونِ خالِصِ زَیتُونِ کُفته شُده بَلدِه چِراغدان بیره تاکه چِراغ ها دایم روشو بَشه. ۲۱هارُون و باچه‌های شی چِراغای چِراغدان ره دَ خَیمِه مُلاقات، دَ بُرونِ پردِه صندُوقِ شهادَت از شاو تا صُبح دَ حُضُورِ خُداوند روشو نِگاه کُنه. اِی بَلدِه تمامِ نسل‌های بَنی اِسرائیل یگ حُکمِ دایمی اَسته.“