کِتابِ هوشِعَ نَبی
فصلِ هشتُم
حاصِلِ اِسرائیل گِردباد اَسته
۱شیپُور ره دَ دان خُو بیلِید!
دُشمو رقمِ بُرگُج اَلّی دَ بَلِه خانِه خُداوند مییه،
چراکه اُونا عهد مَره مَیده کده
و از شریعت مه سرپیچی کده.
۲اِسرائیل دَ پیش مه فریاد کده مُوگیه،
’اَی خُدای مو، مو تُو ره مِینَخشی!‘
۳لیکِن اِسرائیل نیکی ره ایله کده؛
پس دُشمو اُو ره دُمبال مُونه.
۴اُونا پادشایو ره تعیِین کد، لیکِن بِدُونِ تایِیدِ ازمه؛
اُونا رهبرا ره مُقرَر کد، لیکِن بِدُونِ موافِقتِ ازمه.
اُونا قد نُقره و طِلّای خُو بَلدِه خُو بُتها جور کد
تا باعِثِ نابُودی ازوا شُنه.
۵اَی سامِره، بُتِ گوسَلِه تُو رَد شُده.
آتِشِ غَضَب مه دَ خِلافِ باشِندههای تُو دَر گِرِفته.
تا کَی اُونا نَمِیتَنه از گُناه پاک شُنه؟
۶امُو بُت کارِ اِسرائیل اَسته،
یگ صَنعتگر اُو ره جور کده؛
اُو خُدا نِییه.
پس گوسَلِه سامِره
تِکه-و-پرچه مُوشه.
۷چُون اُونا باد کِشت مُونه
و گِردباد دِرَو مُوکُنه.
نَیچه های غَلّه خوشه نَدره
و اُونا آرد نَمِیدیه.
اگه بِدیه ام،
بیگَنهگو اُو ره قُورت مُونه.
۸اِسرائیل قُورت شُده؛
و آلی اُونا دَ مینکلِ مِلَّت ها
رقمِ ظرفای بےاَرزِش اَسته.
۹چراکه اُونا دَ آشُور رفته
رقمِ خَرِ وَحشی که تنها و سرگردو بَشه؛
اَرے، اِفرایم عاشُقا ره کِرا کده.
۱۰اگرچِه اُونا عاشُقا ره از مینکلِ مِلَّتها کِرا مُونه،
ما دَ زُودی اُونا ره یگجای جَم مُونُم.
اوخته اُونا دَ زیرِ بارِ ظُلمِ پادشاهِ قَوی
خَم شُده موره.
۱۱وختی اِفرایم قُربانگاه های کَلو بَلدِه تقدِیم کدونِ قُربانی گُناه جور کد،
امُو قُربانگاه باعِث شُد که اُونا گُناه کُنه.
۱۲اگرچِه ما بَلدِه ازوا چِیزای کَلو از شریعت خُو نوِشته کدُم،
لیکِن اُونا امُو نوِشتهها ره رقمِ یگ چِیزِ عجِیب-و-غرِیب حِساب کد.
۱۳اگرچِه اُونا قُربانیهای مَورِدِ پِسَند مَره تقدِیم مُونه
و گوشت شی ره مُوخوره،
لیکِن ما اُونا ره قبُول نَمُونُم.
اینه، ما شرارَت ازوا ره دَ یاد خُو میرُم
و اُونا ره بخاطرِ گُناههای ازوا جَزا مِیدیُم
و اُونا پس دَ مِصر موره.
۱۴اِسرائیل خالِق خُو ره پُرمُشت کده
و قصرها آباد کده؛
یهُودا ام شارای دیوالدارِ کَلو جور کده،
لیکِن ما یگ آتِش ره دَ بَلِه شارای شی رَیی مُونُم
و اُو قلعههای مُستَحکم شی ره قُورت مُونه.“