۱اَی مردُمِ سرمایهدار، مَخته و چخرا کنِید، چراکه بَلا-و-غَم دَ سر شُمو اَمدَنی اَسته. ۲مال-و-دَولت شُمو بَرباد شُده و کالای شُمو ره کویه خورده. ۳طِلّا و نُقرِه شُمو ره زَنگ زَده و زَنگ‌زدَگی ازوا دَ پیشِ خُدا دَ ضِدِ شُمو شاهِدی مِیدیه و رقمِ آتِش اَلّی گوشت شُمو ره مُوخوره، چُون شُمو حتیٰدَ روزای آخِر ام دَ جَم کدونِ مالِ دُنیا مصرُوف اَستِید.
۴مُزدِ امزُو کارگرا ره که زمِینای شُمو ره دِرَو کده، شُمو دَغَلی کده نِگاه کدِید و امُو مُزد دَ ضِد شُمو فریاد مُونه. و نالِه امزُو دِرَوگرا دَ گوشِ خُداوندِ لشکر ها رسِیده. ۵شُمو دَ رُوی زمی عَیش و نوشِ کَلو کده کُفتِ دِل خُو ره بُر کدِید و خود ره بَلدِه روزِ کُشتو چاق کدِید. ۶شُمو آدمِ عادِل-و-نیک ره محکُوم کدِید و دَ حالِیکه هیچ از خُو دِفاع نَمُوکد، اُو ره کُشتِید.
۷پس امزی خاطر، اَی بِرارو، تا روزِ اَمَدونِ مَولا عیسیٰ صَبر-و-حَوصِله کنِید. اونه، دیغو بَلدِه کِشتِ پُر اَرزِشِ زمِین خُو اِنتِظار کشِیده صَبر-و-حَوصِله مُونه تاکه بارِشِ اوّل و آخِر دَ بَلِه کِشت بُباره. ۸ اَرے، شُمو ام باید صَبر دَشته بَشِید و خاطر جَم بَشِید، چراکه اَمَدونِ مَولا عیسیٰ قرِیب اَسته.
۹ اَیبِرارو، از یگدِیگِه خُو شِکایت نَکنِید، نَشُنه که خودون شُمو محکُوم شُنِید؛ چُون قاضی حقِیقی امی آلی بَلدِه قضاوَت کدو دَ دانِ درگه ایسته یَه.
۱۰بِرارو، از صَبر-و-حَوصِلِه پَیغمبرای که دَ نامِ خُداوند توره گُفته و رَنج کشِیده، سرمَشق بِگِیرِید. ۱۱واقعاً، مو آدمای پُر صَبر و تَحَمُل ره خوشبَخت مِیدَنی. شُمو دَ بارِه صَبر-و-تَحَمُلِ اَیُوب پَیغمبر شِنِیدید و کاری ره که دَ آخِر خُداوند بَلدِه ازُو انجام دَد اممِیدَنِید، چُون خُداوند غَدر رَحِیم و مِهربو اَسته.
۱۲از پگ کده مُهِمتَر، اَی بِرارای مه، قَسم نَخورِید؛ نَه دَ آسمو و زمی و نَه دَ هیچ چِیزِ دِیگه. «نَهِ» شُمو «نَه» بَشه و «اَرے» شُمو «اَرے» بَشه؛ نَشُنه که محکُوم شُنِید.
۱۳اگه کُدَم نفر دَ بَینِ شُمو دُچارِ رَنج-و-مُصِیبت بَشه اُو باید دُعا کنه و کسی که خوش اَسته، باید سرُود بِخانه. ۱۴اگه کسی دَ بَین شُمو ناجور بَشه، اُو بُزُرگای جماعتِ ایماندارا ره طلب کنه که بییه و دَ نامِ مَولا عیسیٰ بَلدِه شی دُعا کده جان شی ره قد روغونِ زَیتُون چرب کنه. ۱۵دُعای که از رُوی ایمان بَشه ناجور ره شفا مِیدیه و مَولا عیسیٰ اُو ره از بِسترِ ناجوری باله مُونه؛ و اگه گُناه کده بَشه گُناهِ شی ام بخشِیده مُوشه. ۱۶پس گُناهای خُو ره دَ پیشِ یگدِیگِه خُو اِقرار کنِید و بَلدِه یگدِیگِه خُو دُعا کنِید تاکه جور شُنِید. دُعای آدمِ صادِق-و-راستکار قُدرت و تاثِیرِ کَلو دَره. ۱۷اِلیاس پَیغمبر مِثلِ ازمو وَری یگ اِنسان بُود، لیکِن وختی از تَی دِل دُعا کد که بارو نَباره، تا سِه و نِیم سال دَ بَلِه زمی بارو نَبارِید، ۱۸و زمانِیکه دُوباره دُعا کد، از آسمو بارو بارِید و زمی حاصِل دَد.
۱۹اَی بِرارون مه، اگه کُدَم کس دَ مینکل شُمو از راهِ حقِیقت گُمراه شُده بَشه و دِیگه نفر اُو ره پس دَ راهِ راست بیره، ۲۰بِدَنِید که امُو نفر که گُناهکار ره از گُمراهی پس دَ راه میره، دَ حقِیقت جانِ ازُو ره از مَرگِ اَبَدی نِجات مِیدیه و گُناه های غَدرِ آدمِ گُمراه ره مُوپوشَنه.