۱مَردای اِفرایم جم شُده طرفِ صَفون تیر شُد و دَ یفتاح گُفت: ”چرا بَلدِه جنگ کدو قد عمونیا تنهای خُو رفتی و مو ره کُوی نَکدی که قد تُو قَتی مورَفتی؟ آلی مو خانِه تُو ره دَ سر تُو دَر مِیدی.“ ۲یفتاح دَزوا گُفت: ”ما و قَوم مه قد عمونیا جنگِ سخت دَشتی؛ وختِیکه ما شُمو ره کُوی کدُم، شُمو مَره از دِستِ ازوا خلاص نَکدِید. ۳پس وختی دِیدُم که شُمو مَره از دِستِ ازوا خلاص نَمُونِید، خُون خُو ره دَ قفِ اَلغِه خُو گِرِفته، دَ خِلافِ عمونیا رفتُم و خُداوند اُونا ره دَ دِستِ ازمه تسلِیم کد. پس چرا اِمروز دَ پیش مه اَمَدید که قد مه جنگ کنِید؟“
۴اوخته یفتاح پگِ مَردای جِلعاد ره جَم کد و قد اِفرایم جنگ کد؛ و مَردای جِلعاد اِفرایم ره شِکست دَد، چُون مَردای اِفرایم گُفتُد: ”اَی مردُمِ جِلعاد، شُمو دُوتا کدَگی های اِفرایم اَستِید که دَ مینکلِ اِفرایم و دَ مینکلِ مَنَسّی زِندگی مُونِید.“ ۵مردُمِ جِلعاد راه های تیر شُدو از دریای اُردُن ره دَ رُوی مَردای اِفرایم بسته کد؛ هر غَیتِیکه یکی از دُوتا کَدَگی های اِفرایم اَمَده مُوگُفت: ”مَره بیلِید که تیر شُنُم،“ مَردای جِلعاد دَز شی مُوگُفت: ”آیا تُو اِفرایمی اَستی؟“ اگه مُوگُفت: ”نَه،“ ۶اوخته دَزُو مُوگُفت: «شِبولِت» بُگی! و اُو «سِبولِت» مُوگُفت، چُون نَمِیتنِست صَحیح تلفُظ کنه، پس اُو ره گِرِفته دَ امُونجی، یعنی دَ نزدِیکِ راه های تیر شُدو از دریای اُردُن مُوکُشت. دَ امزُو غَیت چِل و دُو هزار نفرِ اِفرایمیا کُشته شُد.
۷یفتاح مُدَتِ شَش سال بَنی اِسرائیل ره رهبری کد. اوخته یفتاحِ جِلعادی فَوت کد و دَ یکی از شارای جِلعاد دَفن شُد.
۸بعد ازُو اِبصانِ بَیت‌لَحَمی بَنی اِسرائیل ره رهبری کد. ۹اِبصان سی باچه دَشت و سی دُختر، اُو دُخترون خُو ره دَ بُرو از اَولادِ بابِه خُو دَده بُود و سی دُختر ره از بُرو بَلدِه باچه های خُو اَوُردُد. اُو مُدَتِ هفت سال رهبرِ بَنی اِسرائیل بُود. ۱۰اوخته اِبصان فَوت کد و دَ بَیت‌لَحَم دَفن شُد.
۱۱بعد ازُو ایلونِ زِبُولونی بَنی اِسرائیل ره رهبری کد؛ و اُو مُدَتِ دَه سال رهبرِ بَنی اِسرائیل بُود. ۱۲اوخته ایلونِ زِبُولونی فَوت کد و دَ اَیَلون دَ سرزمِینِ زِبُولُون دَفن شُد.
۱۳بعد ازُو عَبدون باچِه هِلیلِ پِرعاتونی بَنی اِسرائیل ره رهبری کد. ۱۴اُو چِل باچه و سی نوسه دَشت که دَ بَلِه هفتاد اُلاغ سوار مُوشُد. اُو مُدَتِ هشت سال رهبرِ بَنی اِسرائیل بُود. ۱۵اوخته عَبدون باچِه هِلیلِ پِرعاتونی فَوت کد و دَ پِرعاتون دَ سرزمِینِ اِفرایم دَ کوهِستونِ عمالیقیا دَفن شُد.