۱اوخته تمامِ بَنی اِسرائیل بُر شُده اَمَد و جماعت از دان تا بِئیرشِبَع قد طایفه های سرزمِینِ جِلعاد رقمِ یگ آدم اَلّی دَ حُضُورِ خُداوند دَ مِصفه جم شُد. ۲رهبرای تمامِ قَوم از پگِ طایفه های اِسرائیل دَ جماعتِ قَومِ خُدا خود ره حاضِر کد؛ اُونا چار صد هزار مَردِ پیدِه شمشیرزَن بُود. ۳و اَولادِه بِنیامِین شِنِید که بَنی اِسرائیل دَ مِصفه بُر شُده.
اوخته بَنی اِسرائیل بَلدِه فامِیدون قضیه گُفت: ”بُگِید که اِی کارِ زِشت چی رقم انجام دَده شُده.“ ۴امُو مَردِ لاوی که شُوی خاتُونِ کُشته شُده بُود، دَ جوابِ ازوا گُفت: ”ما قد کنِیز خُو دَ جِبعه که مربُوطِ بِنیامِین مُوشه رفتُم تا شاو ره دَ اُونجی تیر کنُم. ۵اوخته مردُمِ جِبعه دَ ضِد مه باله شُده دَ غَیتِ شاو چارطرفِ خانه ره گِرِفت و قَصد دَشت که مَره بُکُشه. اُونا کنِیز مَره بےعِزَت کد و اُو مُرد. ۶بعد ازُو ما کنِیز خُو ره گِرِفته ٹوٹه ٹوٹه کدُم و اُو ره دَ تمامِ منطقه های مُلکِ اِسرائیل رَیی کدُم، چراکه اُونا یگ کارِ زِشت و شرم‌آوَر دَ اِسرائیل انجام دَده. ۷آلی اَی بَنی اِسرائیل، پگ شُمو توره و مشوَرِه خُو ره بُگِید.“
۸اوخته تمامِ قَوم رقمِ یگ آدم اَلّی باله شُد و گُفت: ”هیچ کُدَم مو دَ خَیمِه خُو نَموری و نَه ام هیچ کُدَم مو پس دَ خانِه خُو موری! ۹بَلکِه اینی کار ره دَ حقِ جِبعه مُونی: مو دَ مُطابِقِ پِشک دَ بَلِه ازُو موری. ۱۰مو از صد نفر دَه نفر، از هزار نفر صد نفر و از دَه هزار نفر یگ هزار نفر از تمامِ طایفه های اِسرائیل مِیگِیری تا بَلدِه لشکر خوراک بیره، و اُونا بوره تا جِبعِه بِنیامِین ره بَلدِه امزُو کارِ شرم‌آوَر که دَ اِسرائیل انجام دَده، جَزا بِدیه.“ ۱۱پس تمامِ مَردای اِسرائیل دَ بَلِه شار جم شُد و رقمِ یگ آدم اَلّی مُتَحِد بُود.
۱۲ دِیگه طایفه های اِسرائیل چند نفر ره دَ پیشِ پگِ طایفِه بِنیامِین رَیی کده گُفت: ”اِی چی شرارَت اَسته که دَ مینکل شُمو انجام دَده شُده؟ ۱۳پس آلی امُو مَردای بَد-و-بیکاره ره که دَ جِبعه اَسته، دَز مو تسلِیم کنِید تا اُونا ره بُکُشی و شرارَت ره از اِسرائیل دُور کنی.“ لیکِن اَولادِه بِنیامِین دَ تورِه بِرارون خُو، بَنی اِسرائیل گوش نَدَد. ۱۴و اَولادِه بِنیامِین از شارای خُو دَ جِبعه جَم شُد تا رفته قد بَنی اِسرائیل جنگ کنه. ۱۵دَ امزُو روز اَولادِه بِنیامِین بِیست و شَش هزار مَردِ شمشیرزَن ره از شارای خُو جَم کد، علاوه از باشِنده های جِبعه که هفت صد مَردِ اِنتِخاب شُده بُود. ۱۶دَ مینکلِ پگِ امزی لشکر هفت صد مَردِ چَپ‌قَی اِنتِخاب شُده بُود که هر کُدَم شی مُوی ره قد سنگِ پَلَخمو مِیزَد و خطا نَمُوکد.
۱۷از مَردای اِسرائیل بغَیر از بِنیامِینیا چار صد هزار مَردِ شمشیرزَن جَم شُد که پگ شی مَردای جنگی بُود. ۱۸اوخته بَنی اِسرائیل باله شُده دَ بَیت-ئیل رفت و از خُدا مشوَره گِرِفته گُفت: ”از طرفِ ازمو کِی اوّل دَ جنگِ اَولادِه بِنیامِین بوره؟“ خُداوند گُفت: ”یهُودا اوّل بوره.“
۱۹پس بَنی اِسرائیل صَباح‌گاه باله شُد و رُوی دَ رُوی جِبعه خَیمه زَد. ۲۰دَمزی رقم مَردای اِسرائیل دَ جنگِ بِنیامِینیا رفت و دَ خِلافِ ازوا دَ جِبعه آمادَگی گِرِفت. ۲۱اوخته اَولادِه بِنیامِین از جِبعه بُرو اَمَد و دَ امزُو روز بِیست و دُو هزار نفرِ اِسرائیلیا ره کُشته نَقش زمی کد. ۲۲و قَوم، یعنی مَردای اِسرائیل جُراَت کد و دَ امزُو جای که روزِ اوّل بَلدِه جنگ آمادَگی گِرِفتُد، بسم دَ امُونجی آمادَگی گِرِفت، ۲۳چُون بَنی اِسرائیل رفته تا شام دَ حُضُورِ خُداوند چخرا کدُد و از خُداوند مشوَره گِرِفته گُفتُد: ”آیا مو بسم بوری و قد بِرارون خُو اَولادِه بِنیامِین جنگ کنی؟“ خُداوند گُفتُد: ”دَ خِلافِ ازوا بورِید.“
۲۴پس بَنی اِسرائیل دَ روزِ دوّم دَ خِلافِ اَولادِه بِنیامِین پیش رفت. ۲۵و بِنیامِینیا ام دَ خِلافِ ازوا دَ روزِ دوّم از جِبعه بُر شُد و بسم هژده هزار نفرِ بَنی اِسرائیل ره که پگ شی شمشیرزَن بُود، کُشته نَقشِ زمی کد. ۲۶اوخته تمامِ بَنی اِسرائیل، یعنی پگِ قَوم پس دَ بَیت-ئیل رفت و دَ اُونجی دَ حُضُورِ خُداوند شِشته چخرا کد؛ اُونا امُو روز ره تا شام روزه گِرِفت و قُربانی های سوختَنی و قُربانی های سلامَتی دَ حُضُورِ خُداوند تقدِیم کد. ۲۷اوخته بَنی اِسرائیل از خُداوند مشوَره طلب کد، چُون صندُوقِ عهدِ خُدا دَ امزُو روزا دَ اُونجی بُود؛ ۲۸و فِینحاس باچِه اِلعازار نوسِه هارُون دَ امزُو روزا دَ خِدمت خُداوند ایسته مُوشُد. اَرے، اُونا مشوَره طلب کده گُفت: ”آیا مو بسم بوری و قد بِرارون خُو، اَولادِه بِنیامِین جنگ کنی یا رَد شی ره ایله بِدی؟“ خُداوند گُفت: ”بورِید، چراکه صَباح ما اُونا ره دَ دِستِ ازشُمو تسلِیم مُونُم.“
۲۹پس مَردای اِسرائیل دَ هر طرفِ جِبعه کمِین گِرِفت. ۳۰و بَنی اِسرائیل دَ روزِ سِوّم دَ جنگِ اَولادِه بِنیامِین رفت و رقمِ دَفعِه پیشنه رُوی دَ رُوی جِبعه آمادَگی گِرِفت. ۳۱وختِیکه اَولادِه بِنیامِین دَ جنگِ قَوم رفت، اُونا از شار دُور بُرده شُد. اُونا رقمِ دَفعِه پیشنه بسم زَدو-و-کُشتونِ قَومِ ره شُروع کد و دَ راه های که یگ شی طرفِ بَیت-ئیل و دِیگِه شی طرفِ جِبعه موره و دَ صحرا تقرِیباً سی نفرِ اِسرائیلیا ره کُشت. ۳۲اَولادِه بِنیامِین قد خود خُو گُفت: ”اُونا رقمِ دفعِه پیشنه از پیش مو شِکست خورد.“ لیکِن بَنی اِسرائیل قد یگدِیگِه گُفتُد: ”بیِید که عَقَب-نِشِینی کنی و اُونا ره از شار کشِیده دَ راه‌ها بیری.“ ۳۳اوخته پگِ مَردای اِسرائیل از جای های خُو باله شُد و دَ بَعل-تامار آمادَگی گِرِفت؛ و اِسرائیلی های که دَ کَمِین بُود ام از جای خُو یعنی از مَعَرِه-جِبعه بُر شُد ۳۴و دَه هزار مَردای اِنتِخاب شُدِه اِسرائیل دَ خِلافِ جِبعه اَمَد و جنگِ سخت دَر گِرِفت. لیکِن اَولادِه بِنیامِین نَمُوفامِید که بَلا-و-مُصِیبت دَ بَلِه ازوا اَمَده. ۳۵خُداوند بِنیامِینیا ره دَ پیشِ اِسرائیلیا شِکست دَد و بَنی اِسرائیل دَ امزُو روز بِیست و پَنج هزار و یگ صد نفرِ بِنیامِینیا ره که پگ شی شمشیرزَن بُود، کُشت. ۳۶اوخته اَولادِه بِنیامِین پَی بُرد که شِکست خورده.
خُلاصه، مَردای اِسرائیل مَیدانِ جنگ ره دَ بِنیامِینیا ایله کد، چُون اُونا دَ بَلِه کسای که دَ چارطرفِ جِبعه کمِین گِرِفتُد، اِعتماد دَشت. ۳۷پس کسای که کمِین گِرِفتُد، دَ عَجَله دَ بَلِه جِبعه هُجُوم اَوُرد و امُو نفرا دَ هر سُو تِیت شُده تمامِ شار ره قد دَمِ شمشیر زَد. ۳۸دَ بَینِ مَردای اِسرائیل و کسای که کمِین گِرِفتُد یگ نشانی ایشته شُدُد که وختی نفرای کمِین از شار دُودِ تِیره باله کنه، ۳۹مَردای اِسرائیل پس تاو خورده جنگ کنه. مگم اَولادِه بِنیامِین پیش ازی کار شُروع دَ زَدو-و-کُشتو کد و تقرِیباً سی نفر از مَردای اِسرائیل ره کُشت و گُفت: ”یقِیناً اُونا رقمِ دَفعِه پیشنه از پیش مو شِکست خورده.“ ۴۰لیکِن وختِیکه یگ ستُونِ دُودِ تِیره از شار دَ باله رفتو شُد، بِنیامِینیا پُشت خُو ره توخ کد و دِید که تمامِ شار دَ مَنِه دُود سُونِ آسمو باله موره. ۴۱اوخته مَردای اِسرائیل پس تاو خورد و بِنیامِینیا وَحشَت زَده شُد، چُون اُونا دِید که بَلا-و-مُصِیبت دَ بَلِه ازوا اَمَده. ۴۲پس اُونا از پیشِ مَردای اِسرائیل سُون بیابو دُوتا کد، لیکِن آتِشِ جنگ اُونا ره گِرِفتار خُو کد و کسای که از شار بُرو اَمَد اُونا ره دَ بَین قرار دَده نابُود کد. ۴۳اُونا بِنیامِینیا ره محاصِره کد و اُونا ره از مَنوحه دُمبال کده تا رُوی دَ رُوی جِبعه سُونِ آفتَو بُرشُد پایمال کد؛ ۴۴و هژده هزار نفر از لشکرِ بِنیامِین که پگ شی مَردای جنگی بُود، کُشته شُده اُفتَد. ۴۵وختی اُونا تاو خورده سُون بیابو دَ قادِه رِمّون دُوتا کد، پَنج هزار نفرِ ازوا دَ راه ها کُشته شُد؛ اُونا تا جِدعوم دُمبال شُد و دُو هزار نفرِ دِیگِه ازوا ام کُشته شُد. ۴۶پس کسای که دَ امزُو روز از لشکرِ بِنیامِین کُشته شُده اُفتَد، بِیست و پَنج هزار مَردِ شمشیرزَن بُود و پگ شی مَردای جنگی. ۴۷تنها شَش صد نفرِ ازوا تاو خورده سُونِ بیابو دَ قادِه رِمّون دُوتا کد و چار ماه دَ قادِه رِمّون مَند. ۴۸مَردای اِسرائیل تاو خورده پس دَ خِلافِ باقی بِنیامِینیا اَمَد و اُونا ره دَ دِیگه شارای ازوا ام قد دَمِ شمشیر زَد، مردُمِ شار و حَیوانا ره، یعنی هر چِیزی ره که دَ گِیر ازوا اَمَد. اُونا امچُنان دَ تمامِ شارای که رسِید اُونا ره آتِش زَد.