۱اوخته خُداوند قد مُوسیٰ گپ زَده گُفت: ۲”قد ھارُون گپ بِزَن و دَزُو بُگی: ’وختِیکه چِراغا ره آماده مُونی، امُو هفت چِراغ باید طرفِ پیشِ رُوی چِراغدان روشَنی بِدیه.‘“ ۳پس ھارُون امُو رقم کد: اُو چِراغا ره رقمی قرار دَد که طرفِ پیشِ رُوی چِراغدان روشَنی بِدیه، امُو رقم که خُداوند دَ مُوسیٰ اَمر کدُد. ۴ساختِ چِراغدان از طِلّای چکُشکاری شُده اینی رقم بُود: از پایِه شی گِرِفته تا گُل های شی چکُشکاری شُدُد و مُطابِقِ نَمُونِه بُود که خُداوند دَ مُوسیٰ نِشو دَده بُود. اَرے، اُو چِراغدان ره امُو رقم جور کدُد.
۵خُداوند قد مُوسیٰ گپ زَده گُفت: ۶”لاویا ره از مینکلِ بَنی اِسرائیل جدا کده اُونا ره پاک کُو. ۷بَلدِه پاک کدونِ ازوا اینی کار ره انجام بِدی: آوی ره که بَلدِه پاک کدو اَسته دَ بَلِه ازوا پاش بِدی؛ اُونا باید مُویای تمامِ جِسم خُو ره قد تیغ کَل کُنه و کالای خُو ره بُشویه و دَ امزی طرِیقه خودون ره پاک کُنه. ۸بعد ازُو اُونا باید یگ جونه‌گاو ره بَلدِه قُربانی سوختَنی قد هدیِه غَلّه-و-دانِه شی که از بِهترِین آردِ روغو گٹ شُده بَشه گِرِفته بَیره؛ و تُو ام یگ جونه‌گاوِ دِیگه بَلدِه قُربانی گُناه بَیر. ۹اوخته لاویا ره دَ پیشِ خَیمِه مُلاقات بیَر و پگِ جماعتِ بَنی اِسرائیل ره جم کُو. ۱۰وختِیکه لاویا ره دَ حُضُورِ خُداوند اَوُردی، بَنی اِسرائیل باید دِستای خُو ره دَ سرِ لاویا بیله ۱۱و ھارُون لاویا ره از طرفِ بَنی اِسرائیل دَ حُضُورِ خُداوند دَ عِنوانِ هدیِه خاص تقدِیم کُنه، تا اُونا خِدمتِ خُداوند ره دَ جای بَیره. ۱۲بعد ازُو لاویا دِستای خُو ره دَ سرِ گاو ھا بیله و هارُون یگ شی ره دَ عِنوانِ قُربانی گُناه و دِیگِه شی ره دَ عِنوانِ قُربانی سوختَنی دَ خُداوند تقدِیم کُنه تا بَلدِه لاویا کِفاره شُنه. ۱۳اوخته لاویا ره پیشِ رُوی هارُون و باچه های شی ایسته کُو و اُونا ره دَ عِنوانِ هدیِه خاص دَ خُداوند تقدِیم کُو. ۱۴دَ امزی رقم لاویا ره از مینکلِ بَنی اِسرائیل جدا کُو و اُونا از مه مُوشه.
۱۵بعد امزی چِیزا لاویا مِیتَنه داخِلِ خَیمِه مُلاقات بوره و خِدمت کُنه. اَرے، تُو باید اُونا ره پاک کنی و دَ عِنوانِ هدیِه خاص تقدِیم کنی، ۱۶چُون از مینکلِ بَنی اِسرائیل اُونا کامِلاً دَز مه دَده شُده. ما اُونا ره دَ عِوَضِ پگِ کسای که اوّلِین تَولِیدِ رَحم اَسته، یعنی دَ عِوَضِ تمامِ اوّلباری های بَنی اِسرائیل بَلدِه خود خُو گِرِفتیم. ۱۷ اَرے، تمامِ اوّلباری ھای بَنی اِسرائیل از مه یَه، چی اِنسان بَشه، چی حَیوان. دَ امزُو روز که پگِ اوّلباری ها ره دَ سرزمِینِ مِصر زَدُم، ما اُونا ره بَلدِه خود خُو تقدِیس کدُم ۱۸و لاویا ره دَ عِوَضِ پگِ اوّلباری های بَنی اِسرائیل گِرِفتُم. ۱۹ما لاویا ره از مینکلِ بَنی اِسرائیل دَ عِنوانِ هدیه دَ ھارُون و باچه های شی دَدیم تا بَلدِه بَنی اِسرائیل دَ خَیمِه مُلاقات خِدمت کُنه و بَلدِه ازوا کِفاره کُنه، تا دَ غَیتِیکه بَنی اِسرائیل دَ نزدِیکِ جایگاهِ مُقَدَّس مییه، کُدَم بَلا دَ بَلِه ازوا نَیه.“
۲۰پس مُوسیٰ و ھارُون و پگِ جماعتِ بَنی اِسرائیل تمامِ امزُو چِیزا ره قد لاویا انجام دَد؛ اَرے، امُو رقم که خُداوند دَ بارِه لاویا دَ مُوسیٰ اَمر کدُد، امُو رقم بَنی اِسرائیل قد ازوا کد. ۲۱لاویا خودون ره پاک کد و کالا های خُو ره شُشت و ھارُون اُونا ره دَ عِنوانِ هدیِه خاص دَ خُداوند تقدِیم کد. اوخته هارُون بَلدِه ازوا کِفاره کد تا اُونا ره پاک کُنه. ۲۲بعد ازُو لاویا داخِلِ خَیمِه مُلاقات رفت و دَ پیشِ ھارُون و باچه های شی خِدمت خُو ره شُروع کد. امُو رقم که خُداوند دَ بارِه لاویا دَ مُوسیٰ اَمر کدُد، اُونا قد ازوا امُو رقم کد.
۲۳خُداوند قد مُوسیٰ گپ زَده گُفت: ۲۴ ”قانُون بَلدِه لاویا اینی اَسته: اُونا از بِیست و پَنج ساله و باله‌تَر باید دَ جمِ خِدمتگارا شامِل شُده دَ خَیمِه مُلاقات خِدمت خُو ره شُروع کُنه. ۲۵و دَ پِنجاه سالَگی از جمِ خِدمتگارا تقاعُد کُنه و دِیگه خِدمت نَکُنه. ۲۶اُونا مِیتنه قد بِرارون خُو دَ خَیمِه مُلاقات کومَک کُنه، ولے خودون شی نَباید خِدمت ره انجام بِدیه. اینَمی طرِیقِه اَسته که باید لاویا ره دَ وظِیفه های ازوا تعیِین کُنی.“