۱حمد-و-ثنا دَ خُداوند!
خُداوند ره از آسمو حمد-و-ثنا بُگِید،
اُو ره دَ عالمِ باله حمد-و-ثنا بُگِید.
۲اَی پگِ ملایکه های شی، اُو ره حمد-و-ثنا بُگِید،
اَی تمامِ لشکرای شی، اُو ره حمد-و-ثنا بُگِید.
۳اَی آفتَو و ماهتَو، اُو ره حمد-و-ثنا بُگِید،
اَی پگِ سِتاره های جَلو، اُو ره حمد-و-ثنا بُگِید.
۴اَی آسمونای بِلند و اَی آو های بَلِه آسمونا،
اُو ره حمد-و-ثنا بُگِید.
۵بیلِید که امیا نامِ خُداوند ره حمد-و-ثنا بُگیه،
چراکه اُو اَمر کد و امیا خَلق شُد.
۶اُو اُونا ره برقرار کد، تا اَبَداُلآباد؛
و یگ حد بَلدِه ازوا قرار دَد که ازُو تیر نَشُنه.
۷خُداوند ره از زمی حمد-و-ثنا بُگِید،
اَی جانداری کٹِه دریایی و پگِ غَوُجی ها؛
۸اَی آتِشَک و زاله و بَرف و آوُر،
و بادِ توفانی که اَمرِ ازُو ره دَ جای میرِید؛
۹اَی کوه ھا و پگِ تِپه ها،
اَی دِرختونِ میوه و تمامِ دِرختونِ سَرو؛
۱۰اَی تمامِ جانوَرای وَحشی و چارپایا،
اَی خزِنده‌گو و مُرغَکوی بالدار؛
۱۱اَی پادشایونِ زمی و پگِ قَوم ها،
اَی کٹه-کَلونا و تمامِ حُکمرانای دُنیا؛
۱۲اَی مَردای جوان و دُخترونِ جوان،
اَی آدمای پِیر و بچکِیچا.
۱۳بیلِید که پگ امزیا نامِ خُداوند ره حمد-و-ثنا بُگیه،
چراکه تنها نامِ ازُو مُتعال اَسته؛
بُزُرگی-و-جلالِ ازُو باله‌تَر از زمی و آسمو یَه.
۱۴اُو یگ قُدرت بَلدِه قَوم خُو باله کده،
تا اِفتخارِ پگِ مومنِین شی بَشه،
یعنی بَلدِه بَنی اِسرائیل که دَزُو نزدِیک اَسته.
حمد-و-ثنا دَ خُداوند!