۱ هُداوندا گۆن موسّایا گوَشت: ”من پِرئون و مِسرئے سرا دگه یکّ کَهرے دئورَ دئیان. اِشیا رند آ شمارا چه اِدا رئوگا کِلّیت. رئوگئے هبرا بِلّ، شمارا سَرجمیا چه اِدا گَلّێنیت. ۲ مهلوکا بگوَش که هرکَس، هر مردێن و هر جنێن وتی همساهگئے کِرّا چه نُگره و تِلاها اَڈّ بوتگێن سامان بلۆٹیت.“ ۳ هُداوندا مِسریانی نِزَر په وتی مهلوکا نێک کرت. موسّائے جند هم مِسرئے مُلکا پِرئونئے هِزمتکار و مردمانی چمّان سکّێن مزنێن مردمے بوت.
۴ موسّایا گوَشت: ”هُداوندَ گوَشیت: ’من شپئے نێما درَ کایان و سجّهێن مِسرا گَردان. ۵ بادشاهی تَهتا نِشتگێن پِرئونئے ائولی چُکّا بگر تان جِنتِرئے سرا نِشتگێن مۆلدێئے ائولی چُکّا، مِسرا سجّهێن ائولی مَردێن‌چُکَّ مِرنت. سجّهێن مال و دَلوَتانی ائولی نَرێن چُکّ هم مِرنت. ۶ سَرجمێن مِسرا اَنچێن مزنێن گرێوگ و زاریے چِستَ بیت که نه پێسرا بوتگ و نه دێمترا بیت، ۷ بله بنی اِسراییلئے سرا کُچِکّے هم نئوَکّیت، نه مردمێئے سرا و نه دَلوَتێئے سَرا.‘ گڑا شما زانێت که هُداوند اِسراییل و مِسرئے نیاما پرک و پێرَ کنت. ۸ تئیی اے سجّهێن هِزمتکار منِ موسّائے کرّا کاینت و کۆنڈانَ کپنت و گوَشنت: ’در آ، تئیی جند گۆن هما سجّهێن مردمان که تئیی رَندگیر اَنت.‘ گڑا من چه اے مُلکا درَ کایان و رئوان.“نون موسّا زهرا زهر چه پِرئونئے کرّا در آتک و شت.
۹ هُداوندا گۆن موسّایا گوَشت: ”پِرئون شمئے هبران گۆشَ نداریت. پمێشکا مِسرا منِ هُداوندئے مۆجزه گێشترَ بنت.“ ۱۰ موسّا و هارونا پِرئونئے دێما اے سجّهێن مۆجزه پێش داشتنت، بله هُداوندا پِرئونئے دل سِنگ کرت و پِرئونا اِسراییلی چه وتی مُلکا رئوگا نه‌اِشتنت.