۱ هُداوندا مِسرئے مُلکا گۆن موسّا و هارونا گوَشت: ۲ ”اے ماه په شما بِنداتی ماهَ بیت، په شما سالئے ائولی ماهَ بیت. ۳ اِسراییلئے سجّهێن مهلوکا بگوَشێت که اے ماهئے دَهمی رۆچا هر لۆگ و هاندان په وت پَسے بزوریت، هر لۆگ یکّ پَسے. ۴ اگن لۆگێئے مردم اَنچۆ کمّ ببنت که پورهێن پَسے په آیان باز ببیت، گڑا آ و آیانی نزّیکترێن همساهگ هۆر ببنت و یکّ پَسے بزورنت. مردمان هساب کنێت و بچارێت که یکّ مردمے چینچُکَ وارت، و هما اَندازَهێن پَسے بزورێت. ۵ شمئے پَس الّما بےائیب ببیت، اُمرا یکّ سالیے ببیت و نرێنے ببیت. گوَرانڈے زورێت شَرّ و پاچِنے زورێت شَرّ. ۶ تان اے ماهئے چاردهمی رۆچا بِدارێتی. سجّهێن اِسراییلی مهلوک مگرب‌تهارا وتی وتی پَسا هلار بکنت. ۷ مردم کمّے هۆن بزورنت و هما لۆگا که اے گۆشتا ورنت، آ لۆگئے دروازگئے چانٹا، بزان دروازگئے سربُرا و کَشان اے هۆنا پِر بِمُشنت. ۸ آ باید اِنت هما شپا گۆشتا آسا بپَچنت و گۆن بێهُمیرێن نگن و تَهلێن کاهُکا بوَرنتی. ۹ اے گۆشتا هامَگا مئورێت و آپگْرادی هم مکنێت و مئوَرێتی. گۆن سَرَگ و پادَگ و دِلیگ و لاپیگان آسا پَچێت و بوَرێتی. ۱۰ تان سُهبا چه آییا هچّ پَشت مکپیت. اگن تان سُهبا چیزّے سر آتک، آسا بسۆچێتی. ۱۱ چۆ بوَرێتی: وتا په سپرا تئیار بکنێت، سواسان پادا کنێت و اَسایا دستا کنێت و اِشتاپ اِشتاپا بوَرێت. اے هُداوندئے سَرگوَز اِنت.
۱۲ من همے شپا مِسرا گَردانَ بان و مُلکئے سجّهێن ائولی مَردێن‌چُکّانَ جنان. اِنسانان بگر تانکه دَلوَتانی ائولی چُکّانَ جنان و مِسرئے سجّهێن هُدایان سِزا دئیان. من هُداوند آن. ۱۳ لۆگان پِر مُشتگێن اے هۆن شمئے نِشانیَ بیت که اِدا شما اێت. من اے هۆنان که گِندان، چه شما سرَ گوَزان و وهدے مِسرا تباهیئے کَهرے دئورَ دئیان، اے کَهر شمئے سرا نکپیت.
۱۴ اے په شما یاتگارێن رۆچے ببیت. شما باید اِنت اے رۆچا هُداوندئے ناما جَشنے بکنێت. اے جشنا نَسلانی نَسل اَبدی پرمانێئے هسابا برجاه بدارێت. ۱۵ هپت رۆچا بێهُمیرێن نگن بوَرێت. هرچے هُمیر که شمئے لۆگان هست، ائولی رۆچا دئورِش بدئیێت. چێا که هرکَسا که ائولی رۆچا بگر تان هپتمی رۆچا هُمیری چیزّے وارت، آ مردم چه اِسراییلئے کئوما سِندَگَ بیت.
۱۶ ائولی رۆچا پاکێن دیوانے بکنێت و هپتمی رۆچا هم. اے دوێن رۆچان هچّ کار مکنێت، بَسّ په ورگا وراک تئیار کنێت. همے یکّێن کارا کرتَ کنێت. ۱۷ بێهُمیرێن نگنئے ائییدا برجاه بدارێت، چێا که همے رۆچا من شمارا رُمب رُمبا چه مِسرا در کرت. نَسلانی نَسل اے رۆچا اَبدی پرمانێئے هسابا برجاه بدارێت.
۱۸ ائولی ماها، چاردهمی رۆچئے بێگاها بگر تان بیست و یکّمی رۆچئے بێگاها بێهُمیرێن نگن بوَرێت. ۱۹ تان هپت رۆچا شمئے لۆگان هُمیر مبیت. چێا که هرکَسا که هُمیری چیزّے وارت، آ مردم چه اِسراییلئے مهلوکا سِندَگَ بیت، هرکَس ببیت، دَرامَدے یا مُلکی مردمے. ۲۰ هچّ هُمیری چیزّ مئوَرێت. وتی سجّهێن مێتگان بێهُمیرێن نگن بوَرێت.“
۲۱ موسّایا اِسراییلئے سجّهێن کماش لۆٹاێنتنت و گۆن آیان گوَشتی: ”برئوێت و په وت، په وتی لۆگان پَس بزورێت. اے پَس سَرگوَزئے کُربانیگ اِنت، هلاری کنێت. ۲۲ بَندُکے زوپا بزورێت، تْرَشتئے تهئے هۆنانی بجنێت و وتی لۆگانی دروازگئے چانٹا، سَربُر و دوێن کَشانی داران پِری مُشێت، چه همے هۆنان که تْرَشتئے تها اَنت. تان سُهبا چه شما کَسّ چه لۆگئے دروازگا ڈَنّ در مئیئیت. ۲۳ هُداوند په مِسریانی جنَگا گَردانَ بیت، بله وهدے شمئے چانٹانی سرئے هۆنانَ گندیت، گڑا چه آ دروازگا سرَ گوَزیت و تباه کنۆکا شمئے لۆگان پُترَگ و شمئے جنَگا نئیلیت. ۲۴ اے رسما تان اَبد برجاه بدارێت، اے په شما و شمئے چُکّان ابَدی پرمانے. ۲۵ وهدے شما هما مُلکا سرَ بێت که هُداوند وتی وادَهئے هسابا شمارا دنتی، اۆدا اے رسما برجاه بدارێت. ۲۶ شمئے چُکّ که چه شما جُستَ کننت که اے چۆنێن رسمے، ۲۷ بگوَشێت که اے په هُداوندا سَرگوَزئے کُربانیگے، چێا که هُداوندا، مِسرا اِسراییلیانی لۆگ سَرگوَز کرتنت. وهدے هُداوندا مِسری جَتنت، مئے لۆگانی سرا هئیری کرت.“گڑا مردمان سر جَهل کرت و پَرستِشا لگِّتنت. ۲۸ اِسراییلی شتنت و هما پئیما که هُداوندا موسّا و هارون هُکم داتگ‌اَتنت، هما پئیما کرتِش.
۲۹ هما شپئے نێما هُداوندا، مِسرئے مُلکا سجّهێن ائولی مَردێن‌چُکّ جتنت. شاهی تَهتا نِشتگێن پِرئونئے ائولی چُکّا بگر تان زندانا نِشتگێن بندیگێئے ائولی چُکّ، و مال و دَلوَتانی سجّهێن ائولی نَرێن چُکّ، سجّهێن مُرتنت. ۳۰ شپا پِرئون و آییئے سجّهێن هِزمتکار و سجّهێن مِسری پاد آتکنت. مِسرا مزنێن گرێوَگ و زاریے چِست اَت. چشێن لۆگے نێست‌اَت که اۆدا یکّے نمُرتگ‌اَت. ۳۱ شپئے شپ پِرئونا موسّا و هارون لۆٹاێنتنت و گوَشتی: ”چِست بێت و چه منی مُلک و مردمان دور بێت، شمئے جند و سجّهێن اِسراییلی. برئوێت و هُداوندا پرستش کنێت، هما پئیما که شما وت گوَشتگ. ۳۲ وتی رمگ و گۆرُمان هم برێت گۆن، هما پئیما که شما وت گوَشتگ. په من هم برکت بلۆٹێت.“
۳۳ مِسریان اِسراییلی هُجّ کرت و گوَشتنت که شما چه مئے مُلکا زوتّ در آێت که ما سجّهێنَ مرێن. ۳۴ مردمان تَرّ کرتگێن بێهُمیرێن آرت، چه گوات گِرَگا پێسر گۆن دَرپان زرت و وتی چادِران کرت و بَڈّا جتنت.
۳۵ اِسراییلیان هما پئیما کرتگ‌اَت که موسّایا گوَشتگ‌اَتنت. آیان مِسریانی کِرّا گُد و چه نُگره و تِلاها اَڈّ بوتگێن سامان لۆٹتگ‌اَت. ۳۶ هُداوندا هم مِسریانی نِزَر په اِسراییلیان نێک کرتگ‌اَت. پمێشکا آیان هرچے لۆٹتگ‌اَت، مِسریان داتگ‌اَت. اے پئیما مِسریانی دئولَتِش برت.
۳۷ اِسراییلی چه رَمِسێسا دێم په سُکّوتا سَر گِپتنت. جنێن و چُکّان اَبێد، آ کِساس شَش سد هزار پئیادَگێن مردێن اَتنت. ۳۸ هۆر و هئوارێن مردمانی بَلاهێن رُمبے هم گۆن آیان شت گۆن. اِسراییلیان باز رَمگ و گۆرُم، سکّ باز مال و دَلوَت گۆن اَت. ۳۹ هما تَرّ کرتگێن آرت که چه مِسرا گۆن اَتنتِش، چه آیان بێهُمیرێن کۆلُکِش پَتک. مردم چه مِسرا گلّێنَگ بوتگ‌اَتنت، پمێشکا چانَگ بێهُمیر اَتنت. آیان نَتوانت مَهتل ببنت و په وتی تۆشگا وراک اَڈّ بکننت. ۴۰ اِسراییلیان چار سد و سی سال مِسرا گوازێنتگ‌اَت. ۴۱ اے چار سد و سیێن سالانی گُڈسرا، گُڈّی رۆچئے جندا هُداوندئے سجّهێن مهلوک رُمب رُمبا چه مِسرا دَر آتک. ۴۲ اے سجّهێن شپا هُداوندا آیانی نگهپانی کرت که آیان چه مِسرا در بکنت، پمێشکا اے شپ په اِسراییلیان هُداوندئے ناما شَپ‌پاسیے و باید اِنت سجّهێن اِسراییلی اے شَپ‌پاسیا نَسلانی نَسل برجاه بدارنت.
۴۳ هُداوندا گۆن موسّا و هارونا گوَشت: ”اِش اِنت سَرگوَزئے ورگئے پَرمان: هچّ ڈَنّی مردم اِشیا مئوارت، ۴۴ زَرهریدێن گُلام وارتیَ کنت بله چه سُنّت بئیگا رند. ۴۵ هما مردم که په گوَنڈێن مُدّتێا آتکگ و نِشتگ، آ هم مئوارت و هما نئوکر هم مئوارت که په زَرّ شمئے کِرّا کارا اِنت. ۴۶ یکّێن لۆگئے تها ببێت و بوَرێتی. چه سَرگوَزئے گۆشتا تُشے ڈَنّا مبرێت و پَسئے یکّ هَڈّے هم مپرۆشێت. ۴۷ سَرگوَزئے رۆچا اِسراییلئے سجّهێن مهلوک ائیید بکنت. ۴۸ اگن شمئے نیاما ڈَنّی مردمے نِشتگ و سَرگوَزئے رۆچا هُداوندئے ناما ائیید کنگَ لۆٹیت، آییئے لۆگئے سجّهێن مردێن پێسرا سُنّت کنگ ببنت. گڑا آ مردم بَهر زرتَ کنت و مُلکی مردمانی پئیما بیت. بله هچّ سُنّت نکرتگێن مردێن اِشیا مئوارت. ۴۹ اِشیئے کانون یکّ اِنت، په مُلکی مردمان و په هما ڈَنّی مردمان که شمئے نیاما نِشتگ‌اَنت.“
۵۰ هما پئیما که هُداوندا موسّا و هارون هُکم داتگ‌اَتنت، سجّهێن اِسراییلیان هما پئیما کرت. ۵۱ هما رۆچئے جندا هُداوندا اِسراییلی، رُمب رُمبا چه مِسرا در کرتنت.