۱ مَسیها مارا آزات کرت که ما آزات ببێن. گڑا مُهر بۆشتێت، وتارا پدا گُلامیئے جُگئے چێرا رئوَگا مئیلێت. ۲ گۆش دارێت! منِ پولُس شمارا گوَشان که اگن شما وتی سُنّت کنگ اِشت، گڑا شمارا چه مَسیهئے نێمگا هچّ پئیمێن پائِدگے نرسیت. ۳ آ مردم که وتی سُنّت کنگَ کِلّیت، من په دلجمی گۆن آییا گوَشان که په تئو اَلّم اِنت که سجّهێن شَریَتا بدارئے. ۴ شما که گۆن شَریَتئے دارگا وتا بێگناه و بێمئیار کنگَ لۆٹێت، بزان شما چه مَسیها سِندگ بوتگێت. شما چه هُدائے رهمتان دور بوتگێت. ۵ بله ایمانئے سئوَبا، ما چه پاکێن روهئے برکتا هما پاکی و پلگاریئے ودارا اێن که مارا آییئے اُمێت هست. ۶ چێا که ایسّا مَسیهئے راها سُنّت بئیگ و نبئیگئے مانا یَکّ اِنت، تهنا هما ایمانا مانا هست که چه مِهرئے راها وتا زاهِرَ کنت.
۷ شما شَرّ دێما رئوان اَتێت. کئیا شمارا چه راستیئے پرمانبرداریا داشت؟ ۸ شمئے گْوانک جنۆکا، بزان هُدایا وَه شمارا نداشت. ۹ تُشُکے هُمیر سجّهێن آرتا هُمیرێنَ کنت. ۱۰ منا هُداوندئے سرا سِتک اِنت و دلجم آن که شمئے دلا دگه هئیالَ نئیئیت. آ مردم که شمارا مان گیشّێنَگا اِنت، آ وتی ملاما پُرَّ کنت، هرکَس که ببیت. ۱۱ او براتان! من وَه نون سُنّت کنگئے وازا کنگا نه‌آن و پمێشکا آزار دئیگ بئیگا آن. اگن من سُنّت کنگئے واز بکرتێن، گڑا چه سَلیبئے پئیگاما کَسّا بَد نبُرتگ‌اَت. ۱۲ هما که شمارا جنجالَ کننت، وتا گوَهتَگ کناتنت.
۱۳ او براتان! شما گْوانک جنَگ بوتگێت که آزات ببێت، بله چۆ مبیت که اے آزاتی په شمئے گُنهکارێن تَب و سَرِشتا مۆهے ببیت. اِشیئے بدلا په مِهر یکدومیئے هِزمتا بکنێت. ۱۴ چێا که سجّهێن شَریَتئے مَجگ همے یکّێن هُکم اِنت: ”وتی همساهگا وتی جندئے پئیما دۆست بدار.“ ۱۵ شما یکدومیا چیلّێنگ و ورَگا اێت، بچارێت، یکدومیئے دستا تباه مبێت.
۱۶ نون منَ گوَشان، گۆن پاکێن روها همگام ببێت. اے پئیما شما گُنهکارێن تَب و سَرِشتئے لۆٹ و واهگانی رندا نکپێت. ۱۷ چێا که گُنهکارێن تَب و سَرِشتئے واهَگ پاکێن روهئے هِلاپ اَنت و پاکێن روهئے واهگ گُنهکارێن تَب و سَرِشتئے هِلاپ اَنت. اے گۆن یکدومیا جنْگا اَنت و پمێشکا شما آ کارانَ نکنێت که کنگِشَ لۆٹێت. ۱۸ بله اگن پاکێن روه شمئے رهشۆنیا بکنت، گڑا شما شَریَتئے پابند نه‌اێت. ۱۹ گُنهکارێن سَرشتئے کار زاهر اَنت: سیَه‌کاری، ناپاکی، وئیلانکی، ۲۰ بُت‌پَرستی، سِهر و جادوگری، نپرت، جنگ و جَدَل، هَسَدّ، هِژم، وَتواهی، سِست و سێد، گرۆه‌بندی، ۲۱ کێنَگ، مست و ملاری، ائیّاشی و همے پئیمێن چیزّ. اَنچۆ که من پێسرا شمارا هَبردار کرتگ، انّون پدا هَبردارَ کنان، هرکَس که اے پئیمێن کارَ کنت، آییا هُدائے بادشاهیا هچّ میراسَ نرسیت.
۲۲ بله پاکێن روهئے بَر و سَمر اِش اَنت: مِهر، شادِه، اێمنی، سَبر و اۆپار، مِهربانی، شَرّی، وَپاداری، ۲۳ نَرم‌تَبی و داشْت. چُشێن چیزّانی هلاپا هچّ شَریَت و کانون نێست. ۲۴ هما که ایسّا مَسیهئیگ اَنت، آیان وتی گُنهکارێن تب و سَرشت گۆن آییئے هئوَس و سِلّێن واهگان یکجاه سَلیب کَشِّتگ. ۲۵ نون که ما پاکێن روهئے رِدا زندَ گوازێنێن، گڑا گۆن پاکێن روها همگام ببێن. ۲۶ ما باید اِنت وَتگَلا و وَتپَسند مبێن، یکدومیا سۆکلۆ مدارێن و گۆن یکدومیا هسدّ مدارێن.