۱دَ جماعتِ ایماندارای اَنطاکیه یگ تعداد نَبی و معلِم وجُود دَشت که اینی کسا بُود: بَرنابا، شِمعون که اُو ره نِیجِر ام مُوگُفت، لُوکیوس قیروانی، مناحِم که بِرارخوندِه هیرودیس پادشاه بُود و شائول. ۲یگ روز وختِیکه اُونا روزه دَشت و خُدا ره عِبادت مُوکد، روح اُلقُدس دَزوا گُفت: ”بَرنابا و شائول ره بَلدِه کاری که ما اُونا ره کُوی کدیم، بَلدِه ازمه جدا کُنِید.“ ۳پس اُونا بعد از روزه گِرِفتو و دُعا کدو دِست خُو ره دَ سرِ ازوا ایشت و اُونا ره بَلدِه خِدمت رَیی کد.
۴پس بَرنابا و شائول دَ اَمر و هِدایتِ روح اُلقُدس رَیی شُد. اُونا اوّل دَ شارِ سَلُوکیه رفت و ازُونجی دَ کِشتی سُون جزِیرِه قِبرِس سَفر کد. ۵وختِیکه دَ شارِ سَلامِیس رسِید، اُونا دَ عِبادت خانه های یهُودیا رفته کلامِ خُدا ره اِعلان کد. یوحَنّای مشهُور دَ مَرقَس قد ازوا همکار بُود. ۶اُونا تمامِ جزِیره ره گشت تاکه دَ شارِ پافوس رسِید. دَ اُونجی اُونا قد یگ آدمِ یهُودی دَ نامِ بار-یشُوع سر خورد که اُو جادُوگر و پَیغمبرِ دروغی بُود. ۷اُو یکی از نفرای سِرگیوس پولُس والی قِبرِس بُود. سِرگیوس پولُس یگ آدمِ دانِشمَند بُود و اُو بَرنابا و شائول ره دَ پیش خُو طلب کد، چُون میخاست کلامِ خُدا ره بِشنَوه. ۸مگم امُو جادُوگر که ترجُمِه نامِ شی دَ یونانی علِیماس بُود، قد ازوا مُخالِفَت کده کوشِش مُوکد که والی ره از ایمان اَوُردو مَنع کنه. ۹اوخته شائول مشهُور دَ پولُس، پُر از روح اُلقُدس شُده سُون علِیماس غَوُوج توخ کد و گُفت: ۱۰”اَی باچِه شَیطو که پُر از هر حِیله و هر نَیرَنگ اَستی، اَیدُشمونِ تمامِ نیکی ها! آیا از کَج معنیٰ کدونِ راه های راست خُداوند دِست باله نَمُوکُنی؟ ۱۱اینه، آلی دِستِ خُداوند دَ خِلاف تُو باله مُوشه و تُو کور شُده آفتَو ره بَلدِه چند وخت دِیده نَمِیتَنی.“ دَمزُو لَحظه غُبار و ترِیکی دَ بَلِه چِیمای ازُو اَمَد و اُو دَ گِرد خُو تاو مُوخورد که یَگو کس ره پَیدا کُنه تا از دِست شی گِرِفته اُو ره کوتَل کُنه. ۱۲وختِیکه والی امی واقِعه ره دِید، ایمان اَوُرد، چراکه از تعلِیم دَ بارِه مَولا عیسیٰ حَیرو مَندُد.
۱۳پولُس و رفِیقای شی از پافوس حَرکت کده دَ کِشتی سُون شارِ پِرگه دَ ولایتِ پَمفِیلیه رفت و دَ اُونجی یوحَنّا ازوا جدا شُده پس دَ اورُشَلیم رفت. ۱۴مگم اُونا از پِرگه حَرکت کده دَ شارِ اَنطاکیه دَ ولایتِ پِیسِیدیه اَمَد. اُونا دَ روزِ آرام دَ عِبادت خانِه یهُودیا دَر اَمَد و دَ اُونجی شِشت. ۱۵بعد از خاندونِ تورات و نوِشته های اَنبیا بُزُرگای عِبادت خانه یگ نفر ره دَ پیشِ ازوا رَیی کده گُفت: ”بِرارو، اگه کُدَم پَیغامِ تشوِیق کُنِنده بَلدِه مردُم دَرِید، لُطفاً بُگِید.“ ۱۶پس پولُس ایسته شُده قد دِست خُو اِشاره کد و دَزوا گُفت: ”اَی مَردای اِسرائیلی و دِیگه کسای که خُداتَرس اَستِید، گوش کُنِید. ۱۷خُدای امزی قَومِ اِسرائیل، اَجداد مو ره اِنتِخاب کد و قَوم مو ره دَ دَورونی که دَ عِنوانِ بیگَنه دَ سرزمِینِ مِصر بُود سربِلند کد و اُونا ره قد بازُوی قَوی ازُونجی بُرو اَوُرد ۱۸و تقرِیباً مُدَتِ چِل سال دَ بیابو حَرکت های ازوا ره تَحَمُل کد. ۱۹اُو هفت مِلَّت ره از سرزمِینِ کِنعان نابُود کده سرزمِینِ ازوا ره دَ عِنوانِ میراث دَ بَنی اِسرائیل دَد. ۲۰اِی واقِعه ها تقرِیباً چار صد و پِنجاه سال ره دَربَر گِرِفت. بعد ازُو خُدا تا زمانِ سموئیل پَیغمبر قاضی ها ره مِثلِ رهبر دَزوا دَد. ۲۱اوخته مردُم خاست که یگ پادشاه دَشته بَشه و خُدا شائول باچِه قَیس ره از طایفِه بِنیامِین دَ عِنوانِ پادشاه بَلدِه ازوا دَد و اُو مُدَتِ چِل سال حُکُومت کد. ۲۲وختِیکه خُدا شائول ره از پادشاهی برطرف کد، داوُود ره پَیدا کد تا پادشاهِ ازوا شُنه و دَ بارِه ازُو شاهِدی دَده گُفت: ’داوُود باچِه یسّی آدمِ دِلخاهِ مه اَسته. اُو تمامِ خاست های مَره پُوره مُوکُنه.‘ ۲۳از نسلِ امزی پادشاه، خُدا دَ مُطابِقِ وعدِه خُو یگ نِجات دِهِنده، یعنی عیسیٰ ره بَلدِه بَنی اِسرائیل رَیی کد. ۲۴پیش از اَمَدونِ عیسیٰ، یحییٰ پَیغمبر دَ تمامِ بَنی اِسرائیل اِعلان مُوکد که توبه کُنه و غُسلِ تعمِید بِگِیره. ۲۵وختِیکه دَورِه خِدمتِ یحییٰ دَ خلاص شُدو بُود اُو گُفت: ’شُمو مَره کِی خیال مُونِید؟ ما اُو نِیَستُم که شُمو دَ اِنتِظار شی اَستِید. مگم اُو شخص بعد از مه مییه و ما حتیٰ لیاقتِ ازی ره نَدَرُم که بَندِ چپلی شی ره واز کنُم.‘ ۲۶اَی بِرارو که اَولادِه اِبراهِیم اَستِید و ام شُمو کسای دِیگه که از خُدا ترس دَرِید: اِی پَیغامِ نِجات دَ پگمو دَده شُده. ۲۷مردُمِ شارِ اورُشَلیم و رهبرای شی عیسیٰ ره نَشِنخت و پیشگویی پَیغمبرا ره که هر روزِ آرام خانده مُوشُد ام نَفامِید. وختِیکه اُونا عیسیٰ ره دَ مَرگ محکُوم کد، اُونا دَ حقِیقت امُو پیشگویی ها ره پُوره کد. ۲۸اگرچِه اُونا کُدَم دَلِیل نَدَشت که اُو ره دَ مَرگ محکُوم کنه، لیکِن اُونا از پیلاتُس خاهِش کد که اُو ره اِعدام کُنه. ۲۹وختی اُونا تمام پیشگویی های ره که دَ بارِه ازُو نوِشته شُده بُود پُوره کد، اُونا اُو ره از صلِیب تا کده دَ قبر ایشت. ۳۰مگم خُدا اُو ره از مُرده ها دُوباره زِنده کد ۳۱و دَ دَورونِ روزای کَلو بَلدِه کسای که قد شی از جلِیلیه دَ اورُشَلیم اَمَده بُود ظاهِر شُد. و امی‌آلی اُونا دَ بارِه ازُو دَ مردُم شاهِدی مِیدیه. ۳۲مو دَز شُمو اینی خوشخبری ره مِیدی: چِیزی ره که خُدا دَ بابه‌کَلونای مو وعده کده بُود، ۳۳اُو ره خُدا بَلدِه ازمو که اَولادِه ازوا اَستی قد دُوباره زِنده کدونِ عیسیٰ پُوره کد. امُو رقم که دَ زبُورِ دوّم نوِشته شُده:
’تُو باچِه مه اَستی،
ما اِمروز آتِه تُو شُدُم.‘
۳۴خُدا اُو ره از مُرده ها دُوباره زِنده کد تا جَسَد شی هرگِز گَنڈه نَشُنه. اُو دَزی باره اینی رقم گُفته:
’امُو بَرکاتِ مُقَدَّس و پُر اِعتِماد ره که دَ داوُود وعده کده بُودُم، دَز تُو مِیدیُم.‘
۳۵دَ یگ جای دِیگِه زبُور اینی رقم گُفته:
’تُو نَمیلی که مَردِ وفادار تُو دَ قبر گنڈه شُنه.‘
۳۶لیکِن داوُود دَ زمانِ خود خُو دَ مُطابِقِ اِرادِه خُدا خِدمت کد و مُرد و دَفن شُده قد بابه‌کَلونای خُو یگجای شُد و جَسَد شی گنڈه شُد. ۳۷لیکِن اُو کسی ره که خُدا دُوباره زِنده کد جَسَد ازُو هرگِز گَنڈگی ره نَدِید. ۳۸امزی خاطر، بِرارای عزِیز، بِدَنِید که دَ وسِیلِه امزی عیسیٰ بخشِشِ گُناه ها بَلدِه شُمو اِعلان مُوشه. ۳۹هر کسی که دَزُو ایمان بیره از تمام چِیزای که شریعتِ مُوسیٰ نَتنِسته اُو ره آزاد کنه، آزاد مُوشه. ۴۰پس اِحتیاط کُنِید که گُفته های پَیغمبرا دَ سر شُمو نَیه که مُوگیه:
۴۱’اَی رِیشخَندگرا، توخ کُنِید،
حَیرو بُمَنِید و نابُود شُنِید،
چراکه دَ روزای ازشُمو کاری مُونُم
که حتیٰ اگه یَگو کس اُو ره بَلدِه شُمو بُگیه،
شُمو باوَر نَمُوکُنِید.‘“
۴۲وختِیکه پولُس و بَرنابا از عِبادت خانه بُرو میمَد مردُم ازوا خاهِش کد که دَ روزِ آرامِ آینده بسم قد ازوا دَ بارِه ازی چِیزا توره بُگه. ۴۳وختِیکه مردُم از عِبادت خانه رُخصَت شُد، غَدرِ از یهُودیا و دِیگه مردُمِ خُداپَرست که دِین یهُود ره قبُول کدُد، از دُمبالِ پولُس و بَرنابا رَیی شُد. هر دُوی شی قد ازوا توره مُوگُفت و اُونا ره تشوِیق مُوکد که دَ فَیض-و-رَحمتِ خُدا پایَدار بُمَنه. ۴۴دَ روزِ آرامِ دِیگه، تقرِیباً پگِ مردُمِ شار جَم شُد تا کلامِ خُداوند ره بِشنَوه. ۴۵مگم وختِیکه یهُودیا اُو جمعیَتِ کٹه ره دِید، سخت بَخِیلی ازوا اَمَد و قد هر چِیزِیکه پولُس مُوگُفت، اُونا مُخالِفَت کده دَوکری مُوکد. ۴۶اوخته پولُس و بَرنابا دَ شُجاعت دَزوا گُفت: ”لازِم بُود که کلامِ خُدا از پگ کده اوّلتَر دَز شُمو یهُودیا مِیرَسِید. مگم ازی که شُمو اُو ره رَد کدِید و خودگون خُو ره لایقِ زِندگی اَبَدی نَدِیدِید، اینه، مو دَ پیشِ غَیرِ یهُودیا موری، ۴۷چراکه خُداوند دَز مو اینی رقم اَمر دَده:
’ما تُو ره بَلدِه مِلَّت ها یگ نُور جور کدیم
تاکه دَ سراسرِ زمی سَبَبِ نِجات بَشی.‘“
۴۸وختِیکه غَیرِ یهُودیا اِی توره ها ره شِنِید، اُونا خوشحال شُد و کلامِ مَولا ره تعرِیف-و-تَمجِید کد و تمامِ امزُو کسای که بَلدِه زِندگی اَبَدی تعیِین شُده بُود، ایمان اَوُرد. ۴۹و کلامِ مَولا دَ سراسرِ امزُو منطقه تِیت شُد. ۵۰لیکِن یهُودیا خاتُونوی خُداتَرس و آبرُومَند و بُزُرگای شار ره دَ ضِدِ پولُس و بَرنابا باله کد و اُونا ره آزار-و-اَذیَت کده از منطقِه خُو بُر کد. ۵۱اوخته پولُس و بَرنابا خاکِ پای خُو ره دَ عِنوانِ اِعتراض دَ پیشِ رُوی ازوا ٹَک زَده دَ شارِ قونیه رفت. ۵۲و پَیرَوا پُر از خوشی و روح اُلقُدس بُود.