۱ساره یگ صد و بِیست و هفت سال زِندگی کد؛ اینَمی سال های عُمرِ ساره بُود ۲و اُو دَ قِریَت اَربَع، یعنی دَ حِبرون دَ سرزمِینِ کِنعان فَوت کد و اِبراهِیم بَلدِه شی ماتم گِرِفته چخرا کد. ۳و اِبراهِیم از پالُوی مَیِت خُو باله شُده دَ پیشِ بَنی حِت رفت و دَزوا گُفت: ۴”ما دَ مینکلِ شُمو بیگَنه و مُسافِر اَستُم؛ دَز مه یگ جای بَلدِه قبرِستو سَودا کُنِید تا مَیِت خُو ره از پیشِ چِیم خُو دَ اُونجی دَفن کُنُم.“ ۵بَنی حِت دَ جوابِ اِبراهِیم گُفت: ۶”بادار مه، تورِه مو ره گوش کُو. تُو دَ مینکل مو شخصیَتِ بُزُرگ اَستی. مَیِت خُو ره دَ خُوبتَرِین قبر های مو دَفن کُو. هیچ کُدَم مو قبر خُو ره از تُو دِریغ نَمُونی اگه تُو مَیِت خُو ره دَفن کنی.“ ۷پس اِبراهِیم باله شُد و خود ره دَ پیشِ مردُمِ امزُو سرزمی، یعنی بَنی حِت خَم کد ۸و قد ازوا گپ زَده گُفت: ”اگه دِل شُمو اَسته که ما مَیِت خُو ره از پیشِ چِیم خُو دَفن کنُم، پس تورِه مَره بِشنَوِید و از عِفرون باچِه صوحار بَلدِه مه درخاست کنِید ۹تا غارِ مَکفیله ره که مُلکیَت شی و دَ آخِرِ زمِینای شی اَسته، دَز مه بِدیه. بیلِید که اُو ره دَ قِیمَتِ کامِل دَ حُضُورِ ازشُمو بَلدِه قبرِستو دَ عِنوانِ مُلکیَت دَز مه سَودا کُنه.“
۱۰عِفرون دَ بَینِ حِتیا شِشتُد. پس عِفرونِ حِتی دَ جوابِ اِبراهِیم دَ حُضُورِ بَنی حِت یعنی دَ حُضُورِ پگِ کسای که دَ درگِه شارِ ازُو جَم شُدُد، گُفت: ۱۱”نَه بادار مه، دَز مه گوش کُو! ما امُو پَٹی زمی ره دَز تُو مُوبخشُم و غاری که دَزُو تعلُق دَره ام از تُو بَشه. دَ حُضُورِ قَومای خُو اُو ره دَز تُو مُوبخشُم. بورُو، مَیِت خُو ره دَفن کُو.“ ۱۲پس اِبراهِیم خود ره دَ پیشِ مردُمِ امزُو سرزمی خَم کد ۱۳و قد عِفرون دَ حُضُورِ مردُمِ امزُو سرزمی گپ زَده گُفت: ”لُطفاً عرض مَره گوش کُو: ما قِیمَت ازُو زمی ره دَز تُو مِیدُم. اُو ره از طرفِ ازمه قبُول کُو تا مَیِت خُو ره دَ اُونجی دَفن کنُم.“ ۱۴و عِفرون دَ جوابِ اِبراهِیم گُفت: ۱۵”بادار مه، دَز مه گوش کُو: یگ پَٹی زمی که چار صد مِثقال نُقره قِیمَتِ دَره، اِی دَ بَینِ ازمه و ازتُو چی اَسته؟ بورُو، مَیِت خُو ره دَفن کُو.“ ۱۶اِبراهِیم گبِ عِفرون ره گوش کد و نُقرِه ره که عِفرون دَ حُضُورِ بَنی حِت یاد کدُد، یعنی چار صد مِثقال نُقره ره دَ مُطابِقِ وَزنی که رَواج بُود بَلدِه عِفرون ٹول کده دَد. ۱۷دَ امزی رقم زمِینِ عِفرون دَ منطقِه مَکفیله که رُوی دَ رُوی مَمری بُود، یعنی زمی و غاری که دَزُو تعلُق دَشت قد پگِ دِرختای که دَ جَغِه شی بُود، ۱۸دَ حُضُورِ بَنی حِت، یعنی تمامِ کسای که دَ درگِه شارِ ازُو اَمدُد دَ عِنوانِ مُلکیَت دَ اِبراهِیم تحوِیل دَده شُد.
۱۹بعد ازُو اِبراهِیم خاتُون خُو ساره ره دَ غارِ زمِینِ مَکفیله که رُوی دَ رُوی مَمری یعنی حِبرون دَ سرزمِینِ کِنعان بُود، دَفن کد. ۲۰ خُلاصه، امُو زمی قد غاری که دَزُو تعلُق دَشت دَ عِنوانِ قبرِستو از طرفِ بَنی حِت دَ مُلکیَتِ اِبراهِیم تحوِیل دَده شُد.