۱ د مصر څخه د اسراییلو د قوم د وتلو څخه وروسته په څلور سوه اتیاوم کال کې په اسراییلو باندې د سلیمان د پاچاهۍ په څلورم کال د زیو په میاشت کې چې د کال دوهمه میاشت ده، هغه د خدای د کور په جوړولو پیل وکړ. ۲ هغه کور چې سلیمان د څښتن دپاره جوړ کړی ؤ، د هغه اوږدوالی اووه ویشت متره، سور یې نهه متره او لوړوالی یې دیارلس نیم متره ؤ. ۳ د خدای د کور مخې ته دهلېز ؤ چې اوږدوالی یې د خدای د کور سره برابر ؤ، یعنې نهه متره او سور یې څلورنیم متره ؤ. ۴ هغه د خدای د کور په دېوالونو کې لوړې تنګې کړکۍ ګانې جوړې کړې. ۵ د خدای د کور په اړخونو او شاته دباندیني دېوالونو ته څنګ په څنګ یې یوه درې منزله ودانۍ جوړه کړه. ۶ په لاندېني منزل کې هرې کوټې دوه متره او شل سانتي سور، په منځني منزل کې دوه متره او اویا سانتي سور او په پورتني منزل کې درې متره او لس سانتي سور درلود. د خدای د کور دېوال په هر منزل کې نسبت ښکتني منزل ته نری ؤ، ترڅو بې له دې چې په هغه کې تیرونه جوړ شي، کوټې په دېوال باندې ټینګې شي.
۷ د کومو تیږو نه چې د څښتن کور جوړ شوی ؤ هغه په کان کې تیارې شوې وې. کله چې د څښتن کور جوړېده، نو د څټکونو، تېشو یا د اوسپنې د نورو سامانونو اواز هلته نه اورېدل کېده.
۸ د ودانۍ د لاندېني منزل د ننوتلو دروازه د خدای د کور په جنوبي اړخ کې وه، چې د زینو په وسیله یې دوهم او درېم منزل ته لاره درلودله. ۹ نو په دې توګه سلیمان پاچا د خدای کور جوړ کړ او سرته یې ورساوه. بام یې د سبر د ونو د تیرانو او تختو څخه جوړ کړ. ۱۰ هغه درې منزله ودانۍ چې هر منزل یې دوه متره او شل سانتي لوړوالی درلود، د خدای د کور دباندیني دېوالونو ته څنګ په څنګ وه. ودانۍ د دېوالونو سره د سبر د ونو د تیرانو په وسیله نښلول شوې وه.
۱۱ څښتن سلیمان ته وویل: ۱۲ «زما د کور په اړه چې ته یې جوړوې، که چېرې زما په ټولو فرمانونو او حکمونو باندې عمل وکړې، نو زه به هغه وعده چې ستا د پلار داود سره مې کړې ده، ستا په وسیله تر سره کړم. ۱۳ او زه به د اسراییلو د قوم په منځ کې په هغه کور چې تا جوړ کړی دی اوسېږم او هغوی به هېڅکله یوازې پرېنږدم!»
۱۴ نو په دې توګه سلیمان پاچا د خدای د کور جوړول سرته ورسول.
۱۵ داخلي دېوالونه د غولي څخه تر چته پورې د سبر د ونو په تختو باندې پوښل شوي وو او د خدای د کور حویلۍ د سروې په لرګیو باندې پوښل شوې وه. ۱۶ داخلي کوټه چې د ډېر سپېڅلي ځای په نوم یادېدله د خدای د کور شاته برخه کې جوړه شوې وه. هغه نهه متره اوږده وه او د سبر د ونو د تختو په وسیله چې د غولي څخه تر چته پورې رسېدلې، د اصلي سالون څخه بېل شوې وه. ۱۷ اصلي سالون چې ډېر سپېڅلي ځای ته مخامخ ؤ، اتلس متره اوږدوالی یې درلود. ۱۸ د سبر د ونې تختې د کدوانو او ګلانو په نقشونو باندې ښکلې کړای شوې وې. ټوله دنننۍ برخه د سبر په لرګیو باندې پوښل شوې وه، ترڅو د دېوالونو تیږې ونه لیدل شي. ۱۹ ډېر سپېڅلی ځای تیار شو چې د څښتن د لوظ صندوق په کې کېږدي. ۲۰ د دې کوټې اوږدوالی نهه متره، سور یې نهه متره او لوړوالی یې نهه متره ؤ. داخلي برخه په سوچه سرو زرو باندې پوښل شوې وه. په همدې ډول د قربانۍ ځای چې د سبر د تختو څخه جوړ شوی ؤ، په سرو زرو باندې پوښل شوی ؤ. ۲۱ د خدای د کور دنننۍ برخه په سوچه سرو زرو باندې پوښل شوې وه او د ډېر سپېڅلي ځای د دروازې مخامخ ته د سرو زرو زنځیرونه ځای په ځای شوي وو چې هغه ځای هم په سوچه سرو زرو باندې پوښل شوی ؤ. ۲۲ د خدای د کور ټوله داخلي برخه په سرو زرو باندې پوښل شوې وه، همدارنګه د قربانۍ ځای هم چې د ډېر سپېڅلي ځای په څنګ کې ؤ، په سرو زرو باندې پوښل شوی ؤ.
۲۳ سلیمان دوه اسماني مخلوقات د زیتون د لرګیو څخه جوړ کړل او په ډېر سپېڅلي ځای کې یې کېښودل. هر یو څلورنیم متره لوړوالی درلود. ۲۴-۲۶ دواړه په یوه اندازه او په یو شکل وو او هر یو دوه دوه وزرونه درلودل. د هر یو وزر اوږدوالی دوه متره او شل سانتي ؤ، نو د یو وزر د سر نه د بل وزر تر سره پورې فاصله څلورنیم متره وه. ۲۷ هغه یې په ډېر سپېڅلي ځای کې یو تر بله څنګ په څنګ داسې کېښودل، ترڅو د هغوی دوه غوړېدلي وزرونه د کوټې په منځ کې یو د بله سره ولګیږي او دوه نور وزرونه د دېوالونو سره ولګیږي. ۲۸ دواړه اسماني مخلوقات په سرو زرو باندې پوښل شوي وو.
۲۹ د اصلي سالون او د ډېر سپېڅلي ځای دېوالونه چارچاپېره د اسماني مخلوقاتو، د خرما د ونو او ګلانو په توږل شویو نقشونو باندې ښکلي کړای شوي وو. ۳۰ د دنننیو او دباندینیو کوټو غولي هم په سرو زرو باندې پوښل شوي وو.
۳۱ سلیمان د ډېر سپېڅلي ځای د ننوتلو په دروازه کې یوه دوه پله یي دروازه چې د زیتون د لرګیو څخه جوړه شوې وه کېښودله، چې پنځه اړخیزه بازوګان او سرطاق یې درلودل. ۳۲ دوه پله یي دروازه د اسماني مخلوقاتو، د خرما د ونو او ګلانو په توږل شویو نقشونو باندې ښکلې کړای شوې وه. هغه دروازه، اسماني مخلوقات او د خرما ونې په ټکول شویو سرو زرو باندې پوښل شوي وو.
۳۳ په هماغه ډول اصلي سالون ته د ننوتلو د دروازې چوکاټ د زیتون د لرګیو څخه د مستطیل په شکل جوړ شوی ؤ. ۳۴ همدارنګه دوه دروازې وې چې د سروې د لرګیو څخه جوړې شوې وې. هرې دروازې دوه داسې برخې درلودلې چې چپراسونه یې درلودل. ۳۵ دا دروازې د اسماني مخلوقاتو، د خرما د ونو او د ګلانو په توږل شویو نقشونو باندې ښکلې کړای شوې وې چې یو برابر په سرو زرو باندې پوښل شوې وې. ۳۶ د عبادت ځای د دنننۍ حوېلۍ ګردچاپېره یو دېوال ؤ. هغه دېوال د درې طبقو توږل شویو تیږو او د یوې طبقې د سبر د تیرانو څخه جوړ شوی ؤ.
۳۷ د خدای د کور بنیاد د سلیمان د پاچاهۍ په څلورم کال د زیو په میاشت کې چې د کال دوهمه میاشت وه، کېښودل شو. ۳۸ د سلیمان د پاچاهۍ په یوولسم کال د بول په میاشت کې چې د کال اتمه میاشت وه، د خدای د کور د جوړېدلو کار کټ مټ د پلان له مخې په پوره توګه سرته ورسېده. سلیمان اووه کاله د هغه په جوړولو باندې ولګول.