۱ موسی د اسراییلو ټول قوم راوغوښت او ورته ویې ویل: «ای د اسراییلو خلکو، هغو ټولو قوانینو ته غوږ ونیسئ چې زه یې نن تاسو ته درکوم. هغه زده کړئ او په غور سره د هغو څخه پیروي وکړئ. ۲-۳ زمونږ څښتن خدای د سینا د غره سره یوازې زمونږ د پلرونو سره نه، بلکې زمونږ ټولو سره یې چې تر نن ورځې پورې ژوندي یو، لوظ وکړ. ۴ څښتن په هماغه غره باندې د اور د منځ څخه ستاسو سره مخامخ خبرې وکړې. ۵ په هغه وخت کې زه ستاسو او څښتن ترمنځ ودرېدم چې د هغه خبرې تاسو ته ورسوم، ځکه چې تاسو د هغه اور څخه وېرېدلئ او غره ته نه ورختلئ.
څښتن وویل: ۶ ‹زه ستاسو څښتن خدای یم چې تاسو مې د مصر څخه چې په کې غلامان وئ راوویستلئ.
۷ زما څخه پرته د بل خدای عبادت مه کوئ.
۸ د خپلو ځانونو دپاره د هېڅ شي په شکل چې هغه په اسمان کې یا په ځمکه باندې یا د ځمکې لاندې په اوبو کې وي، بتان مه جوړوئ. ۹ هېڅ بت ته سجده یا عبادت مه کوئ، ځکه چې زه ستاسو څښتن خدای یو غیرتي خدای یم. څوک چې زما څخه کرکه کوي، زه به هغوی او د هغوی اولادې ته تر درېم او څلورم نسله پورې سزا ورکړم. ۱۰ خو زه د هغو زرګونو نسلونو سره چې زما سره مینه کوي او زما حکمونو ته غاړه ږدي، مینه کوم.
۱۱ زما نوم د بدو مقصدونو دپاره مه کاروئ، ځکه چې زه ستاسو څښتن خدای به هغه چاته سزا ورکړم چې زما نوم په غلطه وکاروي.
۱۲ لکه څنګه چې ما یعنې ستاسو څښتن خدای په تاسو باندې امر کړی دی، د سبت ورځ ولمانځئ او هغه سپېڅلې وګڼئ. ۱۳ تاسو د کار کولو دپاره شپږ ورځې لرئ، ۱۴ خو اوومه ورځ د ارام کولو ورځ ده چې څښتن خدای ته وقف شوې ده. په دې ورځ به تاسو هېڅ کار نه کوئ، نه تاسو، نه ستاسو زامن یا لورګانې، نه غلامان، نه ستاسو غویان یا خره یا نور حیوانات او نه هغه پردي خلک چې ستاسو په وطن کې اوسیږي. ستاسو غلامان باید ستاسو په شان استراحت وکړي. ۱۵ دا په یاد ولرئ چې تاسو په مصر کې غلامان وئ او ما یعنې ستاسو څښتن خدای په خپل قوي مټ او ټول قدرت سره ازاد کړئ. نو ځکه تاسو ته حکم کوم چې د سبت یعنې د ارام کولو ورځ لمانځئ.
۱۶ لکه څنګه چې زه یعنې ستاسو څښتن خدای تاسو ته حکم کوم چې د خپل مور او پلار عزت کوئ، ترڅو نېکمرغه اوسئ او په هغه خاوره کې چې زه یې درکوم زیات عمر ولرئ.
۱۷ قتل مه کوئ.
۱۸ زنا مه کوئ.
۱۹ غلا مه کوئ.
۲۰ د هېچا په خلاف د دروغو شاهدي مه ورکوئ.
۲۱ د بل سړي ښځې ته د تمې په سترګه مه ګورئ. د هغه کور، ځمکې، غلامانو، غویانو، خرو یا هرڅه چې هغه یې لري، ورته تمه مه کوئ.›
۲۲ دا هغه حکمونه دي چې څښتن په هغه وخت کې تاسو ټولو ته درکړل کله چې د سینا د غره تر څنګ راټول شوي وئ او هغه په لوړ اواز سره د اور او تورې ورېځې د منځ څخه خبرې وکړې. هغه نور څه نه بلکې همدا حکمونه راکړل. بیا یې هغه د تیږو په دوو لوحو باندې ولیکل او ماته یې راکړل.
۲۳ کله چې ټول غره اور واخیست او تاسو هغه غږ واورېد چې د تیارې څخه راتله، نو ستاسو مشران او ستاسو د قبیلو مشران ماته راغلل ۲۴ او ویې ویل: ‹کله چې مونږ د هغه خبرې واورېدلې چې د اور د منځ څخه یې کولې، مونږ ته خپل څښتن خدای خپله لویي او جلال راوښود! نن مونږ ولیدل چې د یو انسان دپاره که خدای ورسره خبرې هم کړې وي، دا ممکنه ده چې ژوندی پاتې شي. ۲۵ خو مونږ ولې خپل ځانونه د مرګ په خطر کې واچوو؟ هغه هیبتناکه اور به مونږ له منځه یوسي. مونږ یقین لرو که چېرې د خپل څښتن خدای غږ بیا واورو، نو مړه به شو. ۲۶ ایا داسې یو انسان چې د اور د منځ څخه یې د ژوندي خدای خبرې اورېدلې وي، کله ژوندی پاتې شوی دی؟ ۲۷ نو موسی، نژدې ورشه او زمونږ د څښتن خدای ټولو خبرو ته غوږ ونیسه. بیا بېرته راشه او هغه خبرې چې هغه درته وکړلې مونږ ته یې ووایه. مونږ به ورته غوږ ونیسو او وبه یې منو.›
۲۸ کله چې څښتن دا خبرې واورېدلې، هغه ماته وویل: ‹ما د دغو خلکو خبرې واورېدلې، هغوی رښتیا وایي. ۲۹ کاشکې هغوی تل داسې احساس ولري! کاشکې هغوی تل زما څخه ووېریږي او زما ټولو حکمونو ته غاړه کېږدي، ترڅو د تل دپاره د هغوی او د هغوی د اولادې هر کار سم وي. ۳۰ لاړ شه او هغوی ته ووایه چې بېرته خپلو خېمو ته ورستانه شي. ۳۱ خو موسی، ته دلته زما سره پاتې شه. زه به تاته خپل ټول قوانین او حکمونه درکړم. هغه قوم ته ورزده کړه، ترڅو هغوی په هغه خاوره کې ورته غاړه کېږدي چې زه یې ورکوم.›
۳۲ د اسراییلو خلکو، تاسو باید په غور سره د خپل څښتن خدای هر حکم په ځای کړئ. د هغه د هېڅ یو قانون څخه سرغړونه ونه کړئ. ۳۳ د هغو ټولو څخه پیروي وکړئ، ترڅو ستاسو ټول کارونه سم روان وي او په هغه وطن کې چې تاسو به یې ونیسئ، خپل ژوند ته دوام ورکړئ.