۱ زه به خپل د څارنې برج ته وخېژم او انتظار به وباسم، ترڅو وګورم چې څښتن ماته څه وایي او زما شکایت ته څه ځواب ورکوي.
۲ څښتن ماته دا ځواب راکړ: «څه چې زه درته په رویا کې ښایم هغه په روښانه توګه په لوحو باندې ولیکه، ترڅو هغه په اسانۍ سره ولوستل شي. ۳ ځکه چې د هغې د عملي کېدلو وخت لا نه دی رارسېدلی. خو هغه وخت به زر راشي او هغه څه چې زه یې په رویا کې درته ښایم هغه به رښتیا شي. که څه هم هغه وخت ورو ورو راځي، خو هغه ته انتظار کوه. خامخا به داسې کیږي او په هغې کې کوم ځنډ نه رامنځته کیږي. ۴ ګورئ، هغه پیغام دا دی چې مغرور خلک به ژوندي نه پاتې کیږي، خو نېکان به د خپل ایمان په وسیله ژوند کوي.»
۵ مال او دولت یو غولوونکی شی دی. مغروره خلک تل ناارامه وي او د هغوی حرص لکه د قبر او مرګ په شان دی چې هېڅکله نه مړیږي، نو ځکه هغوی د خپلو ځانونو دپاره قومونه رانیسي. ۶ اسیران شوي خلک به هغو خلکو ته چې دوی یې نیولي دي، پېغور ورکوي او په هغوی باندې به ملنډې وهي. هغوی به وایي:
«افسوس ستاسو په حال! تاسو ته به خدای سزا درکړي، ځکه چې تاسو هغه څه اخلئ چې ستاسو نه دي، ترڅو پورې به تاسو خپل ځانونه په هغو شیانو باندې شتمن کوئ چې خپل پوروړي مجبوروئ چې د خپل پور نه زیات شیان درکړي؟ ۷ نو د کومو خلکو نه چې تاسو کوم شیان اخیستې دي، هغوی به ناڅاپه ستاسو په وړاندې راپورته شي او ستاسو نه به د هغو نه زیات واخلي. هغوی به راشي او تاسو به له وېرې ولړزوي. هغوی به تاسو لوټ کړي! ۸ تاسو د ډېرو قومونو خلک لوټ کړي دي، خو اوس چې څوک پاتې دي، هغوی به تاسو لوټ کړي، ځکه چې تاسو قتلونه کړي دي او د نړۍ او د هغې د ښارونو د خلکو سره مو ظلم زیاتی کړی دی.
۹ افسوس ستاسو په حال، ځکه چې تاسو چې په ظلم باندې کوم شیان اخیستي دي، په هغو باندې مو خپله کورنۍ شتمنه کړې ده او کوښښ مو کړی چې خپل کورونه د زیان او خطر نه په امن کې وساتئ! ۱۰ خو ستاسې دسیسې ستاسو د رسوایۍ سبب شوې دي او په دې کار سره تاسو د ډېرو قومونو په له منځه وړلو سره په خپل ځان باندې تباهي راوستې ده. ۱۱ حتی د دېوالونو تیږې هم ستاسو په خلاف چیغې وهي او ستاسو د کورونو د چتونو تیران هم ستاسو په خلاف چیغې وهي.
۱۲ افسوس ستاسو په حال، ځکه چې تاسو د ښار بنیاد په بېانصافۍ باندې ایښی دی او هغه مو د وینې په تویولو باندې جوړ کړی دی. ۱۳ مطلق قادر څښتن داسې اراده کړې ده چې کوم قومونه چې تاسو نیولي دي، هغوی خپل ځانونه هسې په کارونو ستړي کړي وو او هغه ټول شیان چې هغوی جوړ کړي وو، هغه به وسوځي او په ایرو باندې به بدل شي. ۱۴ ځکه چې ځمکه به د څښتن د جلال د پېژندنې نه داسې ډکه شي لکه څنګه چې بحیرې د اوبو نه ډکې وي.
۱۵ افسوس ستاسو په حال، ځکه چې تاسو په خپلو ګاونډیو قومونو باندې د خپل قهر د جام شراب وڅښل او هغوی مو نشه کړل او بیا مو هغوی وشرمول د دې دپاره چې د هغوی لوڅ بدنونه وګورئ. ۱۶ د هغې په بدل کې به تاسو د عزت په ځای په شرمونو پټ شئ. تاسو خپله به هغه وڅښئ او ستاسو لوڅوالی به ښکاره شي. څښتن به په تاسو باندې د خپلې سزا پیاله وڅښي او ستاسو عزت به په شرم او رسوایۍ باندې بدل شي. ۱۷ تاسو د لبنان سره ظلم کړی دی، نو په تاسو باندې به هم ظلم وشي. تاسو د هغو حیوانات ووژل، اوس به حیوانات تاسو وېروي. دا کار به کیږي، ځکه چې تاسو قتلونه کړي دي او د نړۍ او د هغې د ښارونو د خلکو سره مو ظلم زیاتی کړی دی.
۱۸ یو بت څه ګټه لري چې انسان جوړ کړی دی یا یوه مجسمه چې د دروغو تعلیم ورکوي؟ دا د خپل جوړوونکي سره څه ښېګڼه کولای شي چې هغه ورباندې توکل کوي، که څه هم هغه خبرې نه شي کولای؟ ۱۹ افسوس ستاسو په حال چې د لرګي یوې ټوټې ته وایئ: ‹راویښه شه!› یا یوې تیږې ته وایئ: ‹پاڅېږه!› ایا بت تاسو ته کوم شی ښودلی شي؟ که څه هم هغه په سپینو یا سرو زرو باندې پوښل شوی وي، خو په هغه کې ساه نشته.»
۲۰ خو څښتن په خپل سپېڅلي عبادتځای کې دی، نو د ځمکې په مخ ټول خلک دې د هغه په حضور کې خاموش وي.