۱ کله چې ټول قوم د اردن د سیند څخه تېر شو، څښتن یوشع ته وویل: ۲ «د اسراییلو د قوم څخه دولس تنه وټاکه یعنې د هرې قبیلې څخه یو یو کس ۳ او هغوی ته حکم وکړه چې د اردن د سیند د منځ څخه یعنې د هماغه ځای څخه چې کاهنان ولاړ وو، دولس تیږې راواخلي. هغوی ته ووایه چې دا تیږې د ځان سره یوسي او په هغه ځای کې یې کېږدي چې تاسو نن شپه په کې خېمې ودروئ.» ۴ نو یوشع هغه دولس کسان چې هغه غوره کړي وو، راوغوښتل ۵ او هغوی ته یې وویل: «د اردن د سیند منځ ته هغه ځای ته چې د لوظ صندوق په کې دی، لاړ شئ. تاسو هر یو د اسراییلو د قبیلو د شمېر له مخې یوه یوه تیږه واخلئ او په خپلو اوږو باندې یې کېږدئ. ۶ دا تیږې به خلکو ته هغه کارونه ور په یادوي چې څښتن کړي دي. په راتلونکې کې کله چې ستاسو اولادونه درڅخه پوښتنه وکړي چې دا تیږې ستاسو دپاره څه معنی لري؟ ۷ نو تاسو به هغوی ته وایئ کله چې د څښتن د لوظ صندوق د اردن د سیند څخه تېرېده، نو د سیند اوبه ودرېدلې. دا تیږې به تل د اسراییلو قوم ته دا خبره ور په یادوي چې دلته څه پېښ شول.»
۸ هغو کسانو د یوشع حکمونه په ځای کړل. څنګه چې څښتن یوشع ته حکم کړی ؤ، هغوی د اردن د سیند د منځ څخه دولس تیږې راواخیستې یعنې د اسراییلو د هرې قبیلې دپاره یوه تیږه وه. هغوی دا تیږې د خېمو د ودرولو ځای ته یووړې او هلته یې کېښودلې. ۹ یوشع د اردن د سیند په منځ کې چې د لوظ د صندوق وړونکي کاهنان په کې ولاړ وو، هم دولس تیږې ودرولې. (هغه تیږې تر اوسه پورې هلته دي.) ۱۰ کاهنان تر هغه وخته پورې د اردن د سیند په منځ کې ولاړ پاتې شول، ترڅو چې قوم هغه ټول کارونه سرته ورسول چې څښتن په یوشع باندې د هغو حکم کړی ؤ. دا هغه څه وو چې موسی هم مخکې یوشع ته حکم کړی ؤ.
نو قوم په بیړه د اردن د سیند څخه تېر شو. ۱۱ کله چې هغوی ټول بلې غاړې ته پورې وتل، نو کاهنان د څښتن د لوظ د صندوق سره د قوم په مخکې پورې وتل. ۱۲ د روبین او جاد د قبیلو او د منسي د نیمې قبیلې کسان د جګړې دپاره تیار وو او لکه څنګه چې موسی هغوی ته ویلي وو، هغوی د پاتې قوم په مخکې پورې وتل. ۱۳ شاوخوا څلوېښت زره کسان د جګړې دپاره تیار وو او هغوی د څښتن په حضور کې هغه ډاګ ته چې اریحا ته نژدې ؤ، ورتېر شول. ۱۴ په هغه ورځ څښتن یوشع د ټولو اسراییلو په نظر کې سرلوړی کړ. ترڅو پورې چې هغه ژوندی ؤ هغوی د هغه درناوی کاوه، لکه څنګه چې هغوی د موسی درناوی کاوه.
۱۵ بیا څښتن یوشع ته وویل ۱۶ چې په هغو کاهنانو باندې چې د لوظ صندوق انتقالوي، امر وکړي چې د اردن د سیند څخه راووځي. ۱۷ یوشع هماغسې وکړل ۱۸ او کله چې کاهنان د سیند غاړې ته ورسېدل، نو سمدلاسه د سیند اوبو بېرته په بهېدلو پیل وکړ او د سېلاب په شان بیا د سیند د غاړو څخه پورته شولې.
۱۹ د لومړۍ میاشتې په لسمه ورځ قوم د اردن د سیند څخه تېر شو او په جلجال کې یې چې د اریحا ختیځې خواته پروت ؤ، خېمې ودرولې. ۲۰ یوشع په جلجال کې هغه دولس تیږې ودرولې چې هغوی د اردن د سیند څخه راویستلې وې. ۲۱ هغه د اسراییلو خلکو ته وویل: «په راتلونکې کې کله چې ستاسو اولادونه ستاسو څخه پوښتنه وکړي چې دا تیږې څه معنی لري؟ ۲۲ تاسو به هغوی ته د هغه وخت په اړه ووایئ چې اسراییلیان د اردن په سیند کې په وچه ځمکه باندې پورې وتل. ۲۳ هغوی ته ووایئ چې زمونږ څښتن خدای زمونږ په خاطر د اردن د سیند اوبه وچې کړې، ترڅو مونږ ورڅخه تېر شو، لکه څنګه چې هغه زمونږ دپاره د سرې بحیرې اوبه وچې کړې وې. ۲۴ هغه دا کارونه ځکه وکړل چې د ځمکې په مخ ټول قومونه پوه شي چې د څښتن قدرت څومره زیات دی او تاسو به د تل دپاره د خپل څښتن خدای څخه وېره کوئ.»