۱ څښتن موسی ته وویل ۲ چې د اسراییلو قوم ته داسې ووایي: «که چېرې ستاسو څخه څوک که هغه نر وي یا ښځه غواړي چې د ځانګړي نذر په ورکولو سره خپل ځان ما څښتن ته وقف کړي، ۳ نور باید شراب ونه څښي او نه دې کوم ډول سرکه وکاروي. شربت دې نه څښي، انګور یا ممیز دې نه خوري. ۴ ترڅو پورې چې هغه وقف شوی وي باید کوم شی چې د انګورو څخه جوړیږي ونه خوري، حتی تخمونه او پوستکي یې هم ونه خوري.
۵ ترڅو پورې چې هغه وقف شوی وي، باید خپل ویښتان کم نه کړي او خپله ږیره ونه خرایي. په هغه ټوله موده کې چې هغه څښتن ته وقف شوی وي، باید نذر ورکړي او خپل ویښتان پرېږدي چې لوی شي. ۶-۷ د هغه ویښتان خدای ته د هغه د وقف کېدلو نښه ده، نو هغه باید خپل ځان مړي ته په ورنژدې کېدلو سره ناپاک نه کړي، که څه هم هغه د هغه د پلار، د هغه د مور، د هغه د ورور یا د خور مړی وي. ۸ ترڅو پورې چې هغه نذر ورکوي، هغه به څښتن ته وقف وي.
۹ که چېرې د هغه وقف شوي ویښتان یو چاته په ورنژدې کېدلو سره چې ناڅاپه مړ شي ناپاک شي، هغه باید اووه ورځې صبر وکړي او بیا خپل سر وخرایي، نو هغه به په مذهبي لحاظ پاک شي. ۱۰ په اتمه ورځ به هغه کس دوه کوترې یا دوه قمري ګانې د سپېڅلې خېمې دروازې ته کاهن ته راوړي. ۱۱ کاهن به یوه مرغۍ د ګناه د نذرانې په توګه او بله به د سوځېدونکې نذرانې په توګه وړاندې کړي چې د هغه دپاره کفاره ادا کړي، ځکه چې هغه مړي ته په ورنژدې کېدلو سره ګناه کړې ده. هغه دې په هماغه ورځ د خپلو ویښتانو د پاکولو مراسم تر سره کړي. ۱۲ نو هغه کس دې خپل وخت بیا څښتن ته وقف کړي. تېرې شوې ورځې نه حسابیږي، ځکه چې د هغه سپېڅلي ویښتان ناپاکه شول. هغه باید د تاوان د نذرانې په توګه یو وری چې یو کلن وي راوړي.
۱۳ کله چې هغه کس خپله هغه موده پوره کړي چې هغه په کې دا وعده کړې ده چې نذر به ورکوي، باید دا مراسم سرته ورسوي. د سپېڅلې خېمې دروازې ته دې ورشي ۱۴ او څښتن ته دې درې داسې حیوانات وړاندې کړي چې کوم عیب په کې نه وي، یعنې یو وری چې یو کلن وي د سوځېدونکې نذرانې دپاره، یوه یو کلنه مېږه د ګناه د نذرانې دپاره او یو پسه د سلامتۍ د نذرانې دپاره. ۱۵ هغه دې یوه ټوکرۍ فطیره ډوډۍ هم وړاندې کړي یعنې پنډې ډوډۍ چې د داسې ښو اوړو څخه تیارې شوې وي چې د زیتونو تېل ورسره ګډ وي او داسې نرۍ ډوډۍ چې تېل ورباندې موښل شوي وي او د غلې دانې او د څښلو نذرانې هم باید ورسره وي.
۱۶ کاهن به دا ټول څښتن ته حاضر کړي او د ګناه نذرانه او سوځېدونکې نذرانه دې وړاندې کړي. ۱۷ هغه به پسه د سلامتۍ د نذرانې په توګه څښتن ته قرباني کړي او هغه به د ډوډۍ د ټوکرۍ سره وړاندې کړي، همدارنګه هغه به د غلې دانې او څښلو نذرانې هم وړاندې کړي. ۱۸ له هغې وروسته به هغه کس د سپېڅلې خېمې د دروازې په خوله کې ودریږي، خپل سر به وخرایي او ویښتان چې د وقف کېدلو یوه نښه ده، هغه به په هغه اور کې واچوي چې د سلامتۍ نذرانه ورباندې سوځول کیږي.
۱۹ کله چې د پسه د اوږې غوښه وایشول شوه، کاهن به هغه واخلي او د ټوکرۍ د یوې پنډې ډوډۍ او یوې نرۍ ډوډۍ سره به یې د هغه کس په لاسونو کې کېږدي. ۲۰ هغه به یې بېرته کاهن ته ورکړي او کاهن به یې ما څښتن ته د وقف کولو دپاره پورته ونیسي. بیا کاهن کولای شي چې د پسه د اوږې غوښه، سینه او د هغه شاتنۍ پښه وخوري، ځکه چې دا د نذرانې څخه د هغه برخه ده. له دې وروسته به هغه کس نور نذر نه ورکوي او شراب څښلی شي.
۲۱ دا قانون د هغو خلکو دپاره دی چې نذر شوي دي. که چېرې کوم کس وعده کړې وي چې څښتن ته برسېره په هغو شیانو چې هغه یې په عادي حالت کې ورکوي کوم بل شی د نذر په توګه ورکړي، نو هغه دې د خپلې وعدې سره سم خپل ځانګړی نذر ورکړي.»
۲۲ څښتن موسی ته وویل: ۲۳ «کله چې هارون او د هغه زامن د اسراییلو قوم ته برکت ورکوي، هغوی باید داسې ووایي:
۲۴ څښتن دې درکړي برکت
او تاسو دې وساتي
۲۵ په ورین تندي باندې دې وګوري
څښتن تاسو ته
او مهرباني دې وکړي تاسو باندې
۲۶ څښتن دې ښه درسره وکړي
او سلامتي دې درکړي تاسو ته
۲۷ که چېرې هغوی زما په نوم د اسراییلو په قوم باندې برکت وایي، زه به هغوی ته برکت ورکړم.»