۱ ”اگن کَسێا گۆکے یا پَسے دُزِّت و هلار کرت یا بهایی کرت، گڑا گۆکئے بدلا پنچ گۆک و پَسئے بدلا چار پَس بدنت.
۲ اگن دُزّێا لۆگے جت و همے وهدا گِرَگ بوت و همینکَس لَٹّ و کُٹّ کنگ بوت که مُرت، آییا هۆن‌بَها نێست. ۳ بله اگن اے کار رۆچئے دَر آیگا رند بوت، گڑا هۆن، کُشۆکئے سرا اِنت.
هرکَس که دُزّیَ کنت، باید اِنت مَلام پُرّ بکنت، بله اگن په مَلامئے پُرّ کنگا هچّی نێست، گڑا جندی بها کنگ ببیت و مَلام پُرّ کنگ ببنت. ۴ بله اگن دزِّتگێن مال، گۆکے ببیت یا هَرے یا پَسے، آییئے کِرّا زندگا دَر آتک، گڑا دو سَری مَلام بدنت.
۵ اگن کَسێا وتی دَلوَت ڈگار یا اَنگوری باگێا چارێنتنت یا دگه مردمێئے ڈگارا یله‌ای کرتنت، گڑا چه وتی شَرترێن کِشار یا اَنگوری باگئے شَرترێن بهرا مَلاما پُرّ بکنت. ۶ اگن کَسێا آسے رۆک کرت و اے آسا شَماله کَشِّت و ڈنگرانی تها اَنچۆ شِنگ بوت که کِشارئے گْرام یا دانئے نرُتگێن کِشار یا ڈگاری سۆتکنت، گڑا اے آسئے رۆک کنۆک پورهێن مَلامان پُرّ بکنت.
۷ اگن کَسێا زَرّ یا سامانے همساهِگێئے کِرّا اَمانت کرت و اے اَمانت چه همساهگئے لۆگا دُزّگ بوت، گڑا دُزّ دو سری مَلام پُرّ بکنت، اگن گِرگ بوت. ۸ بله اگن گِرگ نبوت، گڑا لۆگئے واهندا هُدائے بارگاها ببرنت که زانگ ببیت که آییا وتی همساهگئے مال دست جتگ یا نه.
۹ اگن دو مردم چیزّێئے سرا اَڑِت، گۆکے ببیت یا هرے یا پَسے یا چادِرے یا دگه گار بوتگێن چیزّے، گڑا اے دوێنانی جێڑه هُدائے بارگاها برگ ببیت و هرکَس که هُدایا مئیاربار کرت، آ، دومیا دو سری مَلام بدنت.
۱۰ اگن کَسێا هرے، گۆکے، پَسے یا دگه دَلوَتے وتی همساهگئے اَمانت کرت و آ دَلوَت مُرت یا ٹَپّیگ بوت یا برگ بوت و کَسّا ندیست، ۱۱ گڑا آیانی جێڑه هُداوندئے سئوگندئے سرا گیشّێنگ ببیت که آییا اَمانت کرتگێن مال دست نجتگ. دَلوَتئے واهند اے سئوگندئے سرا رازیگ ببیت و سئوگندئے ورۆک مَلام پُرّ مکنت. ۱۲ بله اگن دَلوَت چه آییئے کِرّا دُزّگ بوتگ، گڑا آ، دَلوَتئے واهُندا مَلام بدنت. ۱۳ اگن دَلوَت رسترێا جتگ و کُشتگ، گڑا آ، په سَبوت دَلوَتئے جۆنا بیاریت و مُرتگێن دَلوَتئے مَلاما پُرّ مکنت.
۱۴ اگن کَسێا چه همساهگێا دَلوَتے بَدل زرت که پدا ترا دئیانی، و واهُند اۆدا نبوت و آ دَلوَت ٹَپّیگ بوت یا مُرت، گڑا بَدل زورۆک پورهێن مَلاما پُرّ بکنت. ۱۵ بله اگن اے کار واهُندئے دێما بوت، گڑا مَلام پُرّ کنگ مبیت. اگن دَلوَت په کرێه زورگ بوتگ، گڑا کرێهئے جند بَسّ اِنت.“
۱۶ ”اگن مردێا جنێن‌چُکّے رَد دات و گۆن آییا وپت و واب کرت و اگن اے جنکّ کَسّی دِشتار نه‌اِنت، گڑا آییئے هَک‌مِهرا بدنت و بگیپتی. ۱۷ بله اگن جنکّئے پت وتی جنکّئے دئیگا هچّ وڑا رازیگ نبوت، گڑا اے مردێن، جنکّێئے هَک‌مِهرئے کِساسا زَرّ بدنت.
۱۸ جادوگرێن جنێنا زندگا مئیل.
۱۹ هرکَسا که گۆن هئیوانێا وپت و واب کرت، آییئے سِزا مَرک اِنت.
۲۰ هرکَسا که چه هُداوندا اَبێد په دگه هُداێا کُربانیگ کرت، گار و گُمسار کنگ ببیت.
۲۱ گۆن دَرامَدێا بدی مکن و آزاری مدئے، چێا که شما وت مِسرا دَرامَد بوتگێت.
۲۲ چه جنۆزام یا چۆرئوێئے مجبوریا ناجائِزێن پائدگ چِست مکن. ۲۳ اگن اے کارا بکنئے و آ منی کرّا پریات بکننت، من اَلّم آیانی پریاتان گۆشَ داران. ۲۴ منی هِژم چِستَ بیت و شمارا په زهمَ کُشان، و شمئے جَن جنۆزامَ بنت و چُکّ چۆرئو.
۲۵ اگن منی مهلوکئے نێزگارێا وامے دئیئے، گڑا وام دئیۆکانی پئیما مکن و چه آییا بْیاج مگِر.
۲۶ اگن تئو وتی همساهگئے چادِر په زمانَت وتی کرّا اێر کرت، گڑا چه رۆنندا پێسر پِری تَرّێن. ۲۷ چێا که بلکێن آییئے پۆشاک اێوکا همِش اِنت، گڑا چے پِر بدنت و بوَپسیت؟ اگن منی کرّا پریات بکنت، من گۆشَ داران، چێا که من مهربان آن.
۲۸ کُپر مکن. وتی مهلوکئے سرۆکا نالت مکن.
۲۹ چه وتی کِشار و شیرَگان منی بَهرئے دئیگا دێر مکن. وتی ائولی مَردێن‌چُکّا منا بدئے. ۳۰ وتی گۆک و پَسانی ائولی نَرێن چُکّا هم بدئے. آیانی ائولی چُکّان تان هپت رۆچا ماتئے کِرّا بِلّ و هشتمی رۆچا منااِش بدئے.
۳۱ شما منی پاک و در چِتگێن کئوم ببێت. آ دَلوَت که رسترێا جتگ و کُشتگ، آییئے گۆشتا مئورێت، کُچِکّانی دێما دئوری دئیێت.“