۱ وتی برات هارون و آییئے مَردێن‌چُکّان، بزان ناداب و اَبیهو و اِلیازَر و ایتامارا چه اِسراییلیانی نیاما وتی کرّا بیار که دینی پێشوا ببنت و منی هِزمتا بکننت. ۲ په وتی برات هارونا پاکێن گُد تئیار کن که هارونا بْرَهدار و شاندار بکننت. ۳ هما سجّهێن هُنرمند که من په چُشێن کاران دانایی بکشاتگ‌اَنت، آیان بگوَش که هارونئے پۆشاکان تئیار بکنێت که هارونِش گوَرا بکنت و په دینی پێشوایی و منی هِزمتا وَپک ببیت. ۴ اِش اَنت هما پۆشاک که تئیار کنگی اَنت: سێنَگ‌پۆشے، اێپۆدے، کباهے، نَکش نَکشێن جامگے، پاگے و لانکیگے. په تئیی برات هارون و آییئے مَردێن‌چُکّان اے پۆشاکان تئیار بکننت که هارون و چُکّ دینی پێشوا ببنت و منی هِزمتا بکننت. ۵ اے پۆشاکان چه تلاها و چه آسمانی و جَمو و سُهرێن پَژما و چه شَرّێن لیلُما تئیار بکننت.
۶ اێپۆدا گۆن تلاها و گۆن آسمانی و جَمو و سُهرێن پَژما و گۆن رِستگێن شَرّێن لیلُما تئیار بکننت. اے کارا هُنرمندێن اِزمکارے بکنت. ۷ اِشیئے دو سْروگا دو سَرکۆپَگ پِر کن که اێپۆد بندگ ببیت. ۸ اێپۆدئے بند اێپۆدئے پئیما ببیت، بزان گۆن تلاها و گۆن آسمانی و جَمو و سُهرێن پَژما و گۆن هورت‌گواپێن لیلُما تئیار کنگ ببیت. اے بند و اێپۆد هۆر گوَپگ ببنت، اے یَک‌ٹُکُّر ببنت.
۹ دو سِنگِ سُلئیمان بزور و آیانی سرا اِسراییلئے مَردێن‌چُکّانی نامان آجِن و نَکش کن. ۱۰ آیانی پێدا بئیگئے رِد و بندئے هسابا شَش نام یکّ سِنگێئے سرا و آ دگه شَشێن نام دومی سِنگئے سرا ببنت. ۱۱ هما پئیما که آجِنۆک مُهرے نَکشَ چِنت، تئو هم اِسراییلئے چُکّانی نامان همے دوێن سِنگانی سرا آجِن. دوێن سِنگان دو تِلاهئے مُهرَگ‌جاهئے تها کن و ۱۲ اێپۆدئے دوێن سَرکۆپَگان پِرِش کن که اِسراییلئے چُکّانی یاتگێجیئے سِنگ اَنت. هارون هُداوندئے بارگاها په یاتگێجیا اِشانی نامان وتی دوێن کۆپَگانی سرا بکنت. ۱۳ تلاهئے مُهرَگ‌جاه اَڈّ کن و ۱۴ چه زَگرێن تِلاها رِستگێن سادئے ڈئولێن دو زَمزیلُک اَڈّ کن و گۆن مُهرَگ‌جاهان لِچّێن.
۱۵ پئیسَله‌سازیئے سێنَگ‌پۆشے اَڈّ کن. اِشیا اێپۆدئے پئیما اَڈّ کن، بزان چه تلاها و چه آسمانی و جَمو و سُهرێن پَژما و چه هورت‌گواپێن لیلُما اَڈّی کن. اے کارا هُنرمندێن اِزمکارے بکنت. ۱۶ اے سێنَگ‌پۆش چارکُنڈ ببیت و دوتَل ببیت. دْراجی و پْراهیا یکّ یکّ بِچیلّے ببیت. ۱۷ اِشیئے سرا چار رِدا گران‌کیمّتێن سِنگ لِچّێن. ائولی رِدا روبی، پُکراج و بئیرِل، ۱۸ دومی رِدا پێرۆزه، نیلُم و زُمُرّد، ۱۹ سئیمی رِدا شونزێن آکوت، اَکیک و جَموێن آکوت، ۲۰ چارمی رِدا تلاه‌رنگێن آکوت، سِنگِ سُلئیمان و یَشْم. اِشان تلاهێن مُهرَگ‌جاهان بنادێن. ۲۱ سِنگ، اِسراییلئے چُکّانی نامانی هسابا ببنت، دوازده نام و دوازده سِنگ. هر یکّێئے سرا چه دوازدهێن کَبیلهان یکّێئے نام چۆ مُهرا نَکش ببیت. ۲۲ په سێنَگ‌پۆشا چه زَگرێن تلاها رِستگێن سادئے ڈئولێن زَمزیلُک اَڈّ کن. ۲۳ په سێنَگ‌پۆشا دو تلاهێن کَڑی اَڈّ کن و سێنَگ‌پۆشئے دو سْروگا پِرِش کن. ۲۴ دوێن تلاهێن زمزیلُکانی یکّ یکّ سرے بزور و سێنَگ‌پۆشئے دوێن سْروگانی کَڑیان مانِش کن. ۲۵ زمزیلُکانی دومی سران بزور و گۆن دوێن مُهرَگ‌جاهان لِچّێن، اێپۆدئے سَرکۆپَگانی دێمی نێمگا. ۲۶ چه تلاها دو کَڑی اَڈّ کن و سێنَگ‌پۆشئے آ دگه دوێن سْروگانِش پِر کن، هما لَمبان که دێمِش گۆن اێپۆدا اِنت. ۲۷ چه تلاها دگه دو کَڑی اَڈّ کن و اێپۆدئے دێما، سَرکۆپَگانی جَهلی نێمگا، اێپۆدئے بندئے سربرا پِرِش کن، همۆدا که سَرکۆپَگ گۆن اێپۆدا لِچِّتگ‌اَنت. ۲۸ سێنَگ‌پۆشئے کَڑیان گۆن آسمان‌رنگێن بندان اێپۆدئے کَڑیان اَنچۆ بند که سێنَگ‌پۆش اێپۆدئے بندئے سربرا ببیت و چه اێپۆدا مَسُریت.
۲۹ هارون که پاکێن جاگها رئوت، اِسراییلئے مردێن‌چُکّانی نام پئیسله‌سازیئے سێنَگ‌پۆشئے سرا په یاتگێجی مُدام هُداوندئے بارگاها آییا گۆن ببنت. ۳۰ اوریم و تومیما پئیسله‌سازیئے سێنَگ‌پۆشا مان کن که وهدے هارون هُداوندئے بارگاها رئوت، اے آییئے دلئے سرا ببنت. اے ڈئولا هارون هر وهدا هُداوندئے بارگاها اِسراییلئے پئیسله‌سازیئے ائوزاران وتی دلبَندا بداریت.
۳۱ اێپۆدئے کباها سَرجمیا چه آسمان‌رنگێن گُدا اَڈّ کن. ۳۲ کباها گُٹّے پِر ببیت. گُٹّئے چپّ و چاگردا کالارئے پئیمێن دَزگواپێن کِناریے پِر ببیت که گُٹّ مَدِریت. ۳۳ آسمانی و جَمو و سُهرێن پَژمئے اَنار اَڈّ کن و کباهئے لَمبا، چپّ و چاگردا پِرِش کن و اِشانی نیاما تلاهێن ژانگ پِر کن. ۳۴ کباهئے دامُنئے چپّ و چاگردا ژانگے و اَنارے، ژانگے و اَنارے پِر کنان کن. ۳۵ هما وهدا که هارون هِزمت کنگا بیت، اے کباها گوَرا بکنت. وهدے هُداوندئے بارگاها پاکێن جاگها رئوت یا چه اۆدا درَ کپیت، ژانگانی تئوار اِشکنگ ببیت و اے هبر زانگ ببیت که هارون زندگ اِنت.
۳۶ چه زَگرێن تلاها پَٹّیے اَڈّ کن و اے لبزان چۆ مُهرئے نَکشا پَٹّیئے سرا نَکش کن: ’وَپْکِ هُداوندی.‘ ۳۷ اِشیا گۆن آسمان‌رنگێن بندێا، پاگئے دێمی نێمگا بند. ۳۸ اے هارونئے پێشانیگا بیت و اِسراییلی که وَپکێن شُگرانهَ دئینت، شُگرانه هرچے که ببنت، اگن اے کارئے تها رَدیے بوت، زِمّه هارونئے سرا بیت. اے پَٹّی هر وهدا هارونئے پێشانیگا بیت که هُداوند شُگرانهان کبول بکنت.
۳۹ جامَگا چه شَرّێن لیلُما اَڈّ کن و نَکشی پِر کن. شَرّێن لیلُمئے پاگے اَڈّ کن و رنگ‌گواپێن لانکیگے هم اَڈّ کن. ۴۰ په هارونئے مَردێن‌چُکّان اَنچێن جامَگ و لانکیگ و کُلاه اَڈّ کن که آیان بْرَهدار و شاندار بکننت. ۴۱ اے گُدان وتی برات هارون و آییئے چُکّانی گوَرا دئے. هارون و چُکّان رۆگن پِر مُش و گیشّێن و وَپکِش کن و دینی پێشواییئے کارا همایانی دستا دئے. ۴۲ په آیان چه لیلُما چێرپۆش اَڈّ کن که آیانی جاندریا بپۆشنت. اے چه سرێنا تان رانان ببنت. ۴۳ وهدے هارون و آییئے چُکّ شاهدیئے تَمبوئے تها یا کُربانجاهئے نزّیکّا رئونت، بزان په هِزمتا پاکێن جاگها کاینت، اے چێرپۆشان بپۆشنت. چۆ مبیت که گناهے وتی سرا بلَڈّنت و بمرنت. اے په هارون و آییئے نَسل و پَدرێچا اَبدمانێن پرمانے.