۱ په هارون و آییئے مردێن‌چُکّانی وَپک کنگا اے کاران بکن که آ دینی پێشوا ببنت و منی هِزمتا بکننت: یکّ کاییگرے و دو گوَرانڈ بزور، هچّ ائیبِش مان مبیت. ۲ چه شَرّێن گندمئے آرتا بێهُمیرێن نگن و بێهُمیرێن رۆگنی کۆلُک و بێهُمیرێن تَنَکّێن پُراٹه بِپَچ. ۳ اِشان سَپْتێا کن و اے سَپْتا کاییگر و دوێن گوَرانڈانی همراهیا بیار. ۴ هارون و آییئے چُکّان شاهدیئے تَمبوئے دپا بیار و آیانی جانا شۆد. ۵ گُد و پۆشاکان بزور و جامَگ و اێپۆدئے کباه و اێپۆد و سێنَگ‌پۆشا هارونئے گوَرا دئے. اێپۆدا گۆن اێپۆدئے بندا بند. ۶ پاگا هارونئے سرا دئے و تلاهئے پَٹّیا، بزان پاکێن تاجا پاگئے سرا بند. ۷ پِر مُشَگی رۆگن بزور و هارونئے سرا اێر رێچ و پِری مُش. ۸ هارونئے چُکّان بیار و جامَگِش گوَرا دئے و ۹ کُلاهِش سرا دئے. هارون و آییئے چُکّانی سْرێنا لانکیگ بند. اے اَبدمانێن پرمانے که دینی پێشوایی همایانیگ اِنت. اے کارا هارون و آییئے چُکّانی دَستا دئے.
۱۰ کاییگرا تَمبوئے دێما بیار و هارون و آییئے چُکّ کاییگرا دستا بَڈّا بجننت. ۱۱ کاییگرا هُداوندئے بارگاها، تَمبوئے دپا هلار کن. ۱۲ چه کاییگرئے هۆنان کمّے بزور و گۆن وتی لنکُکا کُربانجاهئے کانٹان پِر مُش و سر آتکگێن هۆنان کُربانجاهئے بُنا رێچ. ۱۳ چادِرپیگ و سَرجگر و دوێن گُٹّگ و گُٹّگانی پیگان بزور و کُربانجاهئے سرا سۆچ. ۱۴ بله کاییگرئے گۆشت و پۆست و رۆتان چه اُردگاها ڈَنّ سۆچ. اے گناهانی پهِلّیئے کُربانیگ اِنت.
۱۵ ائولی گوَرانڈا بیار، هارون و آییئے چُکّ گوَرانڈا دستا بَڈّا بجننت و ۱۶ تئو گوَرانڈا هلار کن و هۆنانی بزور و کُربانجاهئے سجّهێن نێمگان درَنز دئے. ۱۷ گوَرانڈا ٹُکّر ٹُکّر کن، دِلیگ و لاپیگ و پادانی شۆد و گۆن سرَگ و آ دگه ٹُکّران یکجاه اێر کن. ۱۸ سَرجمێن گوَرانڈا کُربانجاهئے سرا سۆچ. اے په هُداوندا سۆچَگی کُربانیگے بیت، تاهیربَکشێن وشبۆے و په هُداوندا آس‌جَتێن کُربانیگے.
۱۹ نون دومی گوَرانڈا بیار، هارون و آییئے چُکّ گوَرانڈا دستا بَڈّا بجننت و ۲۰ تئو گوَرانڈا هلار کن و چه آییئے هۆنان کمّے بزور و هارون و آییئے چُکّانی راستێن گۆشئے دُرجاها و آیانی راستێن دست و راستێن پادئے ماتی لنکُکان پِر مُش و سر آتکگێن هۆنان کُربانجاهئے سجّهێن نێمگان درَنز دئے. ۲۱ کمّے پِر مُشَگی رۆگن و چه کُربانجاهئے سرا کمّے هۆن بزور و هارون و آییئے گُدانی سرا و هارونئے چُکّ و آیانی گُدانی سرا درَنز دئے. گڑا هارون و آییئے گُد و آییئے چُکّ و چُکّانی گُد وَپْکِ هُداوندیَ بنت.
۲۲ اے گوَرانڈ که پێشوائے پاگبَندیئے رسمئے گوَرانڈ اِنت، اِشیئے پیگان، بزان دُمبَگ و چادِرپیگ و سَرجگر و دوێن گُٹّگان گۆن پیگان و راستێن پادئے بُنا بزور و ۲۳ چه هُداوندئے بارگاهئے سَپْتئے بێهُمیرێن نگنان یکّ گِردێن کۆلُکے و یکّ بَزێن و یکّ تَنَکّێن پُراٹَهے بزور و ۲۴ اے سجّهێنان هارون و آییئے چُکّانی دستانی دلا دئے و آیانی دستان هُداوندئے بارگاها چِست کن که اے چِست کنگی کُربانیگے. ۲۵ نون اے چیزّان چه آیانی دستان بزور و کُربانجاهئے سرا سۆچَگی کُربانیگئے سرا اێرِش کن و سۆچِش. اے هُداوندئے بارگاها تاهیربَکشێن وشبۆے و په هُداوندا آس‌جَتێن کُربانیگے.
۲۶ گڑا هما گوَرانڈ که په هارونئے پێشواییئے پاگبَندیئے رسما کُربانیگ کنگَ بیت، آییئے سێنَگا بزور و چِست کنگی کُربانیگێئے هسابا هُداوندئے بارگاها چِستی کن. اے تئیی وَنڈ اِنت. ۲۷ پێشوائے پاگبَندیئے گوَرانڈئے هما سێنَگا و پادئے بُنا وَپْک کن که چِست کنگی کُربانیگئے تها اَتنت. اے هارون و آییئے چُکّانی وَنڈ اِنت. ۲۸ اے چه اِسراییلیانی نێمگا په هارون و آییئے چُکّان ابدمانێن شُگرانهے، چه هما همدلیئے کُربانیگان که اِسراییلی په هُداوندا کننتِش.
۲۹ چه هارونا رند هارونئے پاکێن گُد آییئے چُکّانیگَ بنت که آ همے گُدانی تها رۆگن پِر مُشگ ببنت و آیانی پاگبَندیئے رَسم سَرجم کنگ ببیت. ۳۰ هما چُکّ که هارونئے جاگها دینی پێشوا بیت و تَمبوئے تها پاکێن جاگها رئوت و هِزمتَ کنت، اِشان تان هپت رۆچا گوَرا بکنت. ۳۱ پێشوائے پاگبَندیئے گوَرانڈا بزور و آییئے گۆشتا پاکێن جاگهێا لَهڑ دئے. ۳۲ هارون و آییئے چُکّ تَمبوئے دپا گوَرانڈئے گۆشت و سَپتئے تَهئے نگنان بوَرنت. ۳۳ آ اے چیزّان وت بوَرنت، چێا که اے چیزّ په آیانی پاگبَندی و وَپْکیئے رسما کَپارَتے اَنت. دگه کَسّ اِشان مئوارت، چێا که اے پاکێن وراک اَنت. ۳۴ اگن چه پێشوائے پاگبَندیئے کُربانیگئے گۆشت یا نگنان تان سباها چیزّے پَشت کپت، بسۆچِش. اِشان مئوَر چێا که پاکێن وراک اَنت.
۳۵ همے پئیما که من ترا هُکم داتگ، گۆن هارون و آییئے چُکّان اَنچۆ بکن. هپت رۆچا پێشواییئے پاگبَندیئے رسما سَرجَم کن. ۳۶ په گناهئے کُربانیگا هر رۆچ کاییگرے بکُش، په کَپارَتا. کَپارَت بدئے و کُربانجاها پاک و پَلگار کن. کُربانجاها رۆگن پِر مُش که پاک و پَلگار ببیت. ۳۷ هپت رۆچا کَپارَت بدئے و کُربانجاها پاک و پَلگار کن. نون کُربانجاه چه پاکا پاکترَ بیت و هر چیزّے که گۆن اِشیا ڈُکّ بلَگّیت، پاکَ بیت.
۳۸ اے هما چیزّ اَنت که باید اِنت تئو اِشان مُدام کُربانجاهئے سرا پێش بکنئے، هر رۆچ: دو یکّ سالگێن گوَرانڈ. ۳۹ یکّے سُهبا پێش کن و یکّے مَگرِب‌تَهارا. ۴۰ یکّ و نێم سێر شَرّێن آرت گۆن یکّ سێرے زئیتونئے زَگرێن ٹێلا هئوار کن و ائولی گوَرانڈئے همراهیا پێش کن. یکّ سێرے شراب هم پێش کن که رێچَگی کُربانیگ اِنت. ۴۱ دومی گوَرانڈا مَگرِب‌تَهارا پێش کن، سُهبئے دانئے کُربانیگئے پئیما، و رێچَگی کُربانیگا هم پێش کن. اے تاهیربَکشێن وشبۆے و په هُداوندا آس‌جَتێن کُربانیگے.
۴۲ اے سۆچَگی کُربانیگ نَسل په نَسل مُدام شاهدیئے تَمبوئے دپا هُداوندئے بارگاها پێش کنگ ببنت. من همۆدا گۆن تئو گِندُکَ کنان و گۆن تئو هبرَ کنان. ۴۳ گۆن اِسراییلی مهلوکا هم همِدا گِندُکَ کنان و اے جاگه منی شان و شئوکتئے برکتا پاکَ بیت. ۴۴ من تَمبو و کُربانجاها پاک و پَلگارَ کنان و په وتَ گیشّێنان، هارون و آییئے چُکّان هم پاک و پَلگارَ کنان و په وتَ گیشّێنان که دینی پێشوا ببنت و منی هِزمتا بکننت. ۴۵ من اِسراییلیانی نیاما جهمنندَ بان و آیانی هُدا بان. ۴۶ گڑا آ زاننت که من آیانی هُداوندێن هُدا آن، هما هُدا که آیانا چه مِسرا درُن کرت که آیانی نیاما نندۆک ببان. من آیانی هُداوندێن هُدا آن.