۱ هُداوندا گۆن موسّایا گوَشت: ۲ ”بچار، من چه یَهودائے کَبیلها اوریئے چُکّ، اَهورئے نُماسگ بِسَلێل گچێن کرتگ و ۳ چه هُدائے روها پُرّ کرتگ و اَگل و پَهم و زانت و هر کِسمێن دستئے هُنَر بَکشاتگ ۴ که تلاه و نُگره و بْرنجئے چیزّانی سرا نَکش جۆڑ بکنت و ۵ سِنگانی تْراشگ و نادێنَگئے کارا بکنت و دار به‌آجِنت و هر پئیمێن اِزمکاری بکنت. ۶ من چه دانئے کَبیلها اَهیسامَکئے چُکّ اُهولیاب هم گِچێن کرتگ که بِسَلێلا کُمَکّ بکنت. من سجّهێن هُنَرمند دانایی بکشاتگ‌اَنت که هما سجّهێن چیزّان اَڈّ بکننت که من ترا هُکم داتگ: ۷ شاهدیئے تَمبو و شاهدیئے پێتی و پێتیئے سرئے سرپۆش و تَمبوئے اے دگه سجّهێن سامانان، ۸ بزان ٹێبَل و ٹێبَلئے سامانان، چه زَگرێن تلاها اَڈّ بوتگێن چِراگدان و چِراگدانئے سجّهێن سامانان، بۆسۆچی کُربانجاها، ۹ سۆچَگی کُربانیگئے کُربانجاه و آییئے سجّهێن سامانان، تْرَشت و ترَشتئے پادَگا اَڈّ بکننت و ۱۰ دَزگواپێن گُدان، بزان دینی پێشوا هارونئے پاکێن گُد و په دینی پێشواییا آییئے چُکّانی گُدان اَڈّ بکننت و ۱۱ پِر مُشَگی رۆگن و په پاکێن جاگها وشبۆێن سۆچُکی هم اَڈّ بکننت. اے سجّهێن چیزّان هما پئیما اَڈّ بکننت که من ترا هُکم داتگ.“
۱۲ هُداوندا گۆن موسّایا گوَشت: ۱۳ ”اِسراییلیان بگوَش: ’منی شَبَّتان اَلّم برجاه بدارێت. اے په شمئے آیۆکێن نَسل و پَدرێچان منی و شمئے نیامئے اَهد و کَرارئے نشانیَ بیت تانکه شما بزانێت که من هُداوند آن، هما که شمارا گِچێنی کرتگ و شمارا پاک و پَلگارَ کنت. ۱۴ شَبَّتا برجاه بدارێت چێا که په شما گیشّێنگ بوتگ و پاک و پَلگار اِنت. هرکَسا اِشیئے بےاِزّتی کرت، آییئے سِزا مَرک اِنت. هرکَسا که اے رۆچا کار کرت، چه وتی مهلوکا سِندگَ بیت. ۱۵ شش رۆچا کار کنێت، بله هپتمی رۆچ شَبَّت اِنت، آرام کنگئے رۆچ اِنت. اے رۆچا په منِ هُداوندا وَپْک کنێت. هرکَسا شَبَّتئے رۆچا کار کرت، آییئے سِزا مَرک اِنت. ۱۶ اِسراییلی شَبَّتا برجاه بدارنت، نَسلانی نَسل چۆ اَبدمانێن اَهد و پئیمانێا برجاهی بدارنت. ۱۷ اے تان اَبد منی و اِسراییلئے نیامئے اَهد و کَرارئے نشانیَ بیت، چێا که منِ هُداوندا شش رۆچا زمین و آسمان اَڈّ کرتنت و هپتمی رۆچا آرام کرت و تازه‌دَم بوتان.‘“
۱۸ وهدے هُداوندا سینائے کۆهئے سرا گۆن موسّایا هبر هلاس کرت، شاهدیئے دوێن وانِکی موسّائے دستا داتنت، سِنگئے دو وانِک اَتنت که اِشانی سرا هُداوندا دَهێن پرمان دستِ وت نبشته کرتگ‌اَتنت.