۱ اے پئیما آسمان و زمین و اے سجّهێن چیزّانی جۆڑ بئیگ سَرجم بوت. ۲ هپتمی رۆچا، هُدایا هما کار سَرجم کرتگ‌اَتنت که دَستا اَتنتی. وتی سجّهێن کارانی هلاسیا رند، هپتمی رۆچا آرامی کرت. ۳ گڑا هُدایا هپتمی رۆچ برکت دات، گیشّێنت و پاکێن رۆچ نامێنت، چێا که هُدایا همے رۆچا چه اے سجّهێن هستیئے جۆڑ کنگئے کارا آرام کرت.
۴ اے زمین و آسمانئے کِسّه اَت که جۆڑ کنگ بوتنت. آ وهدا که هُداوندێن هُدایا زمین و آسمان جۆڑ کرتنت، ۵ زمینئے سرا هچّ درچک و دار نرُستگ‌اَت و ڈگاران سبزگ نێست‌اَت. چێا که تان آ وهدا هُداوندێن هُدایا زمینئے سرا هئور نَگوارێنتگ‌اَت و اَنگت اِنسانے نێست‌اَت که زمینا کِشت و کِشارے بکنت. ۶ بله چه زمینا آپئے چَمّگ بُتکنت و سجّهێن زمینئے سربُرِش سێراپ کرت. ۷ هُداوندێن هُدایا چه زمینئے هاکا مردمے جۆڑ کرت، آییئے پۆنزا زِندئے ساهی دَمِت و اے مردم سَهدارے بوت.
۸ هُداوندێن هُدایا رۆدراتکا، اَدَنا باگے جۆڑ کرت و وتی اَڈّ کرتگێن مردمی همۆدا نادێنت. ۹ هُداوندێن هُدایا چه هاکا هر وڑێن درچک رۆدێنت که گِندَگا زێبا و برِش ورگا وشّ اَتنت. زِندئے درچک و نێکی و بدیئے زانَگئے درچک باگئے نیاما اَتنت.
۱۰ په باگئے آپ دئیگا کئورے هست‌اَت که بُنزِهی اَدَنا اَت و چه اۆدا اے کئور چار جاها بهرَ بوت. ۱۱ ائولی کئورئے نام پیشۆن اِنت که هئویلَهئے سجّهێن سرڈگارا که سُهر و تِلاهی مان، چهرَ وارت. ۱۲ آ سرڈگارئے سُهر، شرّێن سُهرے و اۆدا کۆهی بۆد و سِنگِ سُلئیمان هم هست. ۱۳ دومی کئورئے نام گێهون اِنت که کوشئے سجّهێن سرڈگارا چهرَ وارت. ۱۴ سئیمی کئورئے نام دِجله اِنت که آشورئے رۆدراتکی گوَر و پهناتانَ تچیت و چارمی کئور پَرات اِنت.
۱۵ هُداوندێن هُدایا آ مردم زُرت و اَدَنئے باگا جَهمنند کرت که باگا آباد بکنت و باگئے هئیالا بداریت. ۱۶ هُداوندێن هُدایا مَرد پرمان دات که باگئے هر درچکئے برا ورئے بوَر، ۱۷ بله نێکی و بدیئے زانَگئے درچکئے بَرا مئوَر. هما رۆچا که تئو وارت، اَلّما مِرئے.
۱۸ هُداوندێن هُدایا گوَشت: ”په مَردا تهنایی شَرّ نه‌اِنت. من په آییا، همدَرورێن همراه و مَدت کنۆکے جۆڑَ کنان.“ ۱۹ هُداوندێن هُدایا چه هاکا زمینئے سرئے سجّهێن وَکشیێن هئیوان و آسمانئے سجّهێن مُرگ جۆڑ کرتگ‌اَتنت. نون آ سجّهێنی مردئے کِرّا آورتنت تان بچاریت که بارێن مَرد آیان کجام نامان تئوارَ کنت. هر نامێا که مَردا آ سَهدار تئوار کرتنت، هما آیانی نام بوت. ۲۰ مَردا سجّهێن دَلوَت، آسمانئے مُرگ و زمینئے وَکشیێن هئیوان نام پِر بستنت، بله مردا همدَرورێن همراه و مدت کنۆکے نێست‌اَت. ۲۱ گڑا هُداوندێن هُدایا مَرد گرانێن وابے سرا دات. مَرد که واب اَت گڑا هُدایا آییئے یکّ پهلوگے کَشِّت و هالیگێن جاهی گۆن گۆشتا پُرّ کرت. ۲۲ هُداوندێن هُدایا چه مردا کَشّتگێن پهلوگ جنێنے کرت و جنێنی مردئے کِرّا آورت.
۲۳ گڑا مردا گوَشت:
”نون اے چه منی هَڈّان هَڈّے و
چه منی گۆشتان گۆشتے.
اے باید اِنت جنێن گوَشگ ببیت،
چێا که چه مردێنا زورگ بوتگ.“
۲۴ پمێشکا مرد وتی پت و ماتا یلهَ کنت و گۆن جَنا هئوارَ بیت، گڑا آ دوێن، یکّ جسم و جانَ بنت. ۲۵ آدم و آییئے جَن، دوێن لوچ و جاندَر اَتنت و آیان شَرمَ نکرت.