۱ او هُداوند! منی دْوایا گۆش دار،
منی پریات ترا سر بات.
۲ منی سکّی و سۆریئے رۆچا
وتی دێما چه من چێر مدئے.
وتی دلگۆشا گۆن من کن،
وهدے ترا تئوارَ کنان، زوتّ پَسّئو بدئے.
۳ چێا که منی رۆچ چۆ دوتّا گارَ بنت و
هڈّ چۆ رۆکێن اِشکرا سُچنت.
۴ منی دل چۆ مُرتگێن کاها گیمّرتگ و هُشک تَرِّتگ و
چه وَرد و وراکا کپتگان.
۵ چه بازێن نالگ و پریاتا
هُشکێن هڈّ و پۆستے آن.
۶ گیابانی بومّێئے پئیما آن،
انچۆ که بومّے مان وئیرانگان.
۷ بێواب گندلانی تها تچک آن،
انچۆ که تهناێن مُرگے لۆگێئے سرا.
۸ دژمن سجّهێن رۆچا منا شگانَ جننت،
کَلاگَ بندنت و نالتَ کننت.
۹ چێا که نانئے بدلا پُرَ وران و
هرچے که نۆشان، اَرسا پُرّ اَنت،
۱۰ چه تئیی هِژم و گَزبا،
چێا که تئو منا چست کرت و زمینا جت.
۱۱ منی رۆچ، بێگاهی ساهگێئے پئیما گارَ بنت و
من کاهئے ڈئولا هُشک بئیگا آن.
۱۲ بله تئو، او هُداوند، تان اَبد وتی بادشاهی تهتا نِشتگئے و
تئیی نام نَسلانی نَسل برجاه اِنت.
۱۳ تئو جاهَ جنئے و ترا سَهیونئے سرا بزّگَ بیت،
چێا که سَهیونئے سرا رهم کنگئے وهد آتکگ،
آ گیشِّتگێن وهد رَستگ.
۱۴ چێا که تئیی هزمتکاران اے شهرئے سِنگ دۆست اَنت و
سَهیونئے هاکئے سرا هم بزّگِشَ بیت.
۱۵ کئوم چه هُداوندئے ناما تُرسنت و
زمینئے سجّهێن بادشاه چه تئیی مزنی و شانا.
۱۶ چێا که هُداوند سَهیونا نۆکسرا اَڈَّ کنت و
مان وتی شان و شئوکتا زاهرَ بیت.
۱۷ آ بزّگانی دْوایان گۆشَ داریت و
چه آیانی پریاتان نادلگۆشَ نبیت.
۱۸ بِلّ که اے په آیۆکێن نَسلێا نبیسگ ببیت و
اَنچێن کئومے که اَنگت اڈّ نبوتگ، هُداوندا ستا و سنا بکنت.
۱۹ آییا چه وتی پاکێن اَرشا جهلاد چارِتگ،
هُداوندا چه آسمانا دێم په زمینا چارِتگ،
۲۰ تانکه بندیگانی نالگان بِشکُنت و
همایان آزات بکنت که مرکئے سزا دئیگ بوتگ‌اَنت،
۲۱ که سَهیونا هُداوندئے ناما جار بجننت و
اورشَلیما آییئے ستایا بکننت،
۲۲ هما وهدا که کئوم و بادشاهی
په هُداوندئے پرستشا یکجاه مُچَّ بنت.
۲۳ راهئے نێما منی توانی پرۆشت و
منی رۆچی گوَنڈ کرتنت.
۲۴ گڑا من گوَشت:
”او هُداوند! اُمرئے نیاما منی زِندا پَچ مگِر،
تئیی سال تان سجّهێن نَسلان برجاه اَنت.
۲۵ زمین، تئو چه اَزلا جۆڑ کرتگ و
آسمان تئیی دستانی کار اِنت.
۲۶ اے سجّهێن گار و بێگواهَ بنت بله تئو مانئے،
اے سجّهێن چۆ پۆشاکا کوَهنَ بنت،
تئو اِشان چۆ پۆشاکا بدلَ کنئے و اے بێرانَ بنت،
۲۷ بله تئو مانئے و
تئیی سال هلاسَ نبنت.
۲۸ تئیی هزمتکارانی چُکّ تئیی بارگاها جَهمنندَ بنت و
آیانی پُشپَد تئیی درگاها برجاهَ ماننت.“