خرُوج - کِتابِ تَورات - بَخشِ دوّم
بَخشِ ۳۸
جور کدونِ قُربانگاه بَلدِه قُربانی های سوختَنی
۱اُو قُربانگاهِ قُربانی سوختَنی ره از چیوِ اَکاسی دَ شکلِ چارکُنج جور کد که پَنج توغَی دِرازی شی، پَنج توغَی بَر شی و سِه توغَی بِلندی شی بُود. ۲اُو دَ چار کُنجِ ازُو چار شاخ تَیار کد که قُربانگاه و شاخای شی از یگ چیو جور شُدُد و تمامِ قُربانگاه ره قد رُویکَشِ برونزی پوشَند. ۳بعد ازُو تمامِ اَسبابِ قُربانگاه، یعنی سَطل ها، خاکاَنداز ها، کاسه ها، چَنگک ها و آتِشدان ها ره از برونز جور کد. ۴و بَلدِه قُربانگاه یگ اُجاقِ برونزی ام تَیار کد که تاهتَر از لبِ قُربانگاه تا نِیمِ بِلندی شی جای-دَ-جای شُد. ۵اُو چار حَلقِه برونزی ریختَند که دَ چار کُنجِ اُجاق سخت شُد. اُونا مِثلِ خانه بَلدِه دِستَکچیو های دِراز بُود. ۶اُو دِستَکچیوها ره از دِرختِ اَکاسی جور کد و اُونا ره قد رُویکَشِ برونز پوشَند ۷و امُو دِستَکچیوها ره دَ مَنِه حلقه های دُو بغلِ قُربانگاه تیر کد تاکه قد ازوا بُرده و اَوُرده شُنه. خُلاصه، اُو قُربانگاه ره قد تَخته ها جور کد و مَنِه شی خالی بُود.
۸بعد ازُو حَوض و پایِه ها شی ره از برونز جور کد و امُو برونز ره از آینههای برونزی خاتُونوی که دَ دانِ درگِه خَیمِه مُلاقات خِدمت مُوکد، گِرِفت.
جور کدونِ حَولی جایگاهِ مُقَدَّس
۹بعد ازُو چاردیوالی حَولی ره جور کد:
- طرفِ جنُوبِ حَولی پرده ها از کتانِ نَرم و مَیده بافت که صد توغَی دِرازی دَشت، گِرِفته شُد. ۱۰امُو پرده ها بِیست ستُون دَشت و بِیست پایِه برونزی، و چَنگک ها و پُشتبَند های ستُون ها نُقرهیی بُود.
- ۱۱و طرفِ شمال شی پرده ها دَ دِرازی صد توغَی بُود که بِیست ستُون قد بِیست پایِه برونزی دَشت و چَنگک های ستُونها قد پُشتبَند های شی از نُقره بُود.
- ۱۲و طرفِ غَرب شی پرده های پِنجاه توغَی بُود که دَه ستُون قد دَه پایه دَشت و چَنگک های ستُونها قد پُشتبند های شی نُقرهیی بُود.
- ۱۳و طرفِ شَرق شی یعنی طرفِ آفتَوبُرشُد پِنجاه توغَی بُود.
- ۱۴پرده های یگ طرفِ درگه پوزده توغَی بُود که سِه ستُون و سِه پایه دَشت. ۱۵و پرده های دِیگه طرفِ درگِه حَولی ام پوزده توغَی بُود که سِه ستُون و سِه پایه دَشت. یعنی پرده های اِی طرف و اُو طرف شی یگ رقم بُود.
- ۱۶تمامِ پرده های چاردیوالی حَولی از کتانِ نَرم و مَیده بافت جور شُدُد. ۱۷پایه های ستُونها از برونز بُود، مگم چَنگک ها و پُشتبَند های ستُونها از نُقره، و سرِ ستُونها قد نُقره پوشَنده شُدُد. تمامِ ستُون های چاردیوالی حَولی قد پُشتبَند های نُقرهیی دَ یگدِیگه وَصل شُدُد.
- ۱۸پردِه دَروازِه چاردیوالی از کتانِ نَرم و مَیده بافت قد چُوغ های لاجوَردی، اَرغَوانی و سُرخ رَنگ دَ وسِیلِه یگ گُلدوزِ لایق جور شُدُد. دِرازی شی بِیست توغَی و بِلندی شی رقمِ پرده های چاردیوالی پَنج توغَی بُود ۱۹که چار ستُون دَشت و چار پایِه برونزی، و چَنگکا و تِیرای پُشتبَند شی از نُقره بُود و سرِ ستُونا قد نُقره پوشَنده شُدُد. ۲۰تمامِ میخ های جایگاه و چاردیوالی حَولی از برونز بُود.
مَواد و حِسابِ جور کدونِ جایگاهِ مُقَدَّس
۲۱اینی حِسابِ مَوادِ جایگاه، یعنی جایگاهِ صندُوقِ شهادَت اَسته که دَ اَمرِ مُوسیٰ ثَبت شُد و لاویا خِدمت کده دَ تَی نظرِ اِیتامار باچِه هارُون پیشوا امی کار ره انجام دَد. ۲۲بِصَلئیل باچِه اُوری و نوسِه حُور از قبِیلِه یهُودا، پگِ چِیزای ره که خُداوند دَ مُوسیٰ اَمر کدُد، جور کد. ۲۳دِستیارِ ازُو اَهولیاب باچِه اَخِیسامَک از قبِیلِه دان بُود. اُو دَ کارای نَقاشی، طراحی و گُلدوزی قد چُوغِ اَرغَوانی و سُرخ رَنگ دَ بَلِه کتانِ نَرم و مَیده بافت قابِل و ماهِر بُود.
۲۴تمامِ طِلّای که بَلدِه پگِ کارای جور کدونِ جایگاهِ مُقَدَّس مَصرَف شُد و طِلّای هدیِه مردُم بُود، بِیست و نُه وَزنه و هفت صد و سی مِثقال دَ مُطابِقِ مِثقالِ جایگاهِ مُقَدَّس وَزن دَشت. ۲۵و نُقرِه که از دَرَکِ سرشُماری جماعت جَم شُدُد، صد وَزنه و یگ هزار و هفت صد و هفتاد و پَنج مِثقال دَ مُطابِقِ مِثقالِ جایگاهِ مُقَدَّس وَزن دَشت. ۲۶از هر مَردِ که عُمر شی بِیست یا بالهتَر از بِیست سال بُود و دَ سرشُماری حِساب شُد، فی نفر یگ بیقع، یعنی نِیم مِثقال نُقره دَ مُطابِقِ مِثقالِ جایگاهِ مُقَدَّس جَم آوَری شُد. و تعدادِ ازوا شَش صد و سِه هزار و پَنج صد و پِنجاه نفر بُود. ۲۷بَلدِه ریختونِ پایههای خَیمِه مُقَدَّس و پایههای ستُونای پردِه داخِل ازُو صد وَزنِه نُقره مَصرَف شُد. صد پایه از صد وَزنه، یعنی یگ وَزنه بَلدِه هر کُدَمِ ازوا. ۲۸و از یگ هزار و هفت صد و هفتاد و پَنج مِثقال نُقره چنگَک های ستُونها، پُشتبَندا و رُویکَشِ بَلِه سرِ ستُونها جور شُد. ۲۹برونزِ هدیه شُده هفتاد وَزنه و دُو هزار و چار صد مِثقال بُود. ۳۰قد امزُو مَوادِ برونز اُونا پایههای دَروازِه خَیمِه مُلاقات، قُربانگاهِ برونزی، اُجاقِ برونزی و تمامِ سامانِ قُربانگاه ره جور کد. ۳۱امچُنان پایههای چاردیوالی حَولی و پایههای درگِه حَولی و پگِ میخهای خَیمه و تمامِ میخهای گِردوبَرِ حَولی ره امزُو مَوادِ برونز تَیار کد.