۱دَ سالِ اوّلِ حُکمرانی کوروش پادشاهِ فارس، بَلدِه ازی که کلامِ خُداوند که از دانِ اِرمیا گُفتُد پُوره شُنه، خُداوند روحِ کوروش پادشاهِ فارس ره دَ شور اَوُرد و اُو دَ تمامِ پادشاهی خُو یگ اِعلامیه پَخش کد که نوِشتِه شی اینی رقم خانده شُد: ۲”کوروش پادشاهِ فارس اینی رقم مُوگیه، ’خُداوند، خُدای آسمونا، تمامِ مَملَکَت‌های زمی ره بَلدِه ازمه دَده و دَز مه وظِیفه دَده تا بَلدِه شی یگ خانه دَ اورُشَلیم آباد کنُم که دَ یهُودا اَسته. ۳آلی هر کسی که از تمامِ قَوم شی دَ مینکل شُمو اَسته، خُدای شی قد ازُو بَشه و اُو مِیتنه دَ اورُشَلیم بوره که دَ یهُودا اَسته و خانِه خُداوند، خُدای اِسرائیل ره جور کنه؛ اُو خُدای اَسته که دَ اورُشَلیم عِبادت مُوشه. ۴پس تمامِ باقی‌مَنده های اِسرائیل دَ هر جای که زِندگی مُونه، مردُمِ امزُو جای باید بَلدِه ازوا نُقره، طِلّا، اَسباب و گَله-و-رمه کومَک کنه و دَ پالُوی شی هدیه‌های داوطلبانه بَلدِه خانِه خُدا که دَ اورُشَلیم آباد مُوشه، بِدیه.
۵پس کٹه‌کَلونای اَولادِ بابه‌های مردُمِ یهُودا و بِنیامِین قد پیشوایو، لاویا و تمامِ کسای که خُدا روحِ ازوا ره دَ شور اَوُردُد، اَماده شُد تا بوره و خانِه خُداوند ره دَ اورُشَلیم جور کنه. ۶تمامِ همسایه‌گونِ ازوا بَلدِه ازوا چِیزای نُقره‌یی، طِلّا، اَسباب، گَله-و-رمه و تُحفه‌های قِیمَتی کومَک کد، علاوه از تمامِ هدیه‌های که داوطلبانه بَلدِه خانِه خُدا دَد. ۷کوروش پادشاه ظرفای خانِه خُداوند ره که نِبُوکَدنِصر از اورُشَلیم اَوُرده بُود و دَ خانِه خُدایون خُو ایشتُد، ازُونجی بُرو اَوُرد. ۸کوروش پادشاهِ فارس اُونا ره دَ وسِیلِه مِیترِداتِ خزانه‌دار بُرو اَوُرد و مِیترِدات اُونا ره حِساب کده دَ شیشبَصَر رهبرِ یهُودا تسلِیم کد. ۹تِعدادِ ازوا ازی قرار بُود:
۱۱تمامِ چِیزای طِلّایی و نُقره‌یی پَنج هزار و چار صد دانه بُود و پگ شی ره شیشبَصَر قد اسِیرای که از بابُل دَ اورُشَلیم مورفت، بُرد.