۱دَ حالِیکه عِزرا دُعا و اِعتراف مُوکد و چخرا کده خود ره دَ پیشِ خانِه خُدا قد رُوی خُو اَندختُد، یگ جمعیَتِ غَدر کٹِه مَردا، خاتُونو و بچکِیچای اِسرائیلی دَ گِردِ ازُو جَم شُد و مردُم ام زار زار چخرا کد. ۲اوخته شِکنیا باچِه یحِیئیل که اَولادِه عیلام بُود، دَ عِزرا گُفت: ”مو دَ ضِدِ خُدای خُو گُناه کدی، چُون قد خاتُونوی بیگَنه که از مردُمای امزی سرزمی اَسته توی کدی، لیکِن با وجُودِ ازی امی آلی ام بَلدِه اِسرائیل اُمِید باقی اَسته. ۳پس آلی بیه که قد خُدای خُو یگ عهد بسته کنی و امُو خاتُونو ره قد اَولادای ازوا مُطابِقِ مشوَرِه بادار مه و کسای که از احکامِ خُدای مو مِیتَرسه از قَوم بُر کنی تا امی کار مُطابِقِ شریعت انجام شُنه. ۴باله شُو، چُون اِی کار مربُوطِ ازتُو مُوشه و مو ام قد تُو اَستی؛ قَوی بَش و اِی کار ره انجام بِدی.“
۵اوخته عِزرا باله شُده کٹه‌کَلونای پیشوایو، لاویا و تمامِ اِسرائیل ره قَسم دَد که اُونا مُطابِقِ تورای گُفته شُده عمل مُونه؛ پس اُونا قَسم خورد. ۶عِزرا از پیشِ رُوی خانِه خُدا باله شُده دَ اُتاقِ یهوحانان باچِه اِلیاشِیب رفت و دَ اُونجی نَه نان خورد و نَه آو وُچی کد، چُون بخاطرِ خیانَتِ کٹِه اسِیرای پس اَمدَگی غُصّه مُوخورد. ۷اُونا دَ تمامِ یهُودا و اورُشَلیم دَ اسِیرای پس اَمدَگی اِعلان کد که دَ اورُشَلیم جَم شُنه. ۸و هر کسی که تا روزِ سِوّم نَیه، نظر دَ تصمِیمِ کٹه‌کَلونا و رِیش سفیدا مال-و-دارایی شی ضَبط مُوشه و خود شی از جماعتِ اسِیرای پس اَمدَگی آخ مُوشه.
۹پس دَ دَورونِ سِه روز تمامِ مردُمِ یهُودا و بِنیامِین دَ اورُشَلیم جَم شُد؛ روزِ بِیستُمِ ماهِ نُهم بُود که تمامِ مردُم دَ مَیدانی پیشِ رُوی خانِه خُدا شِشت و بخاطرِ امزی توره و بخاطرِ بارِشِ سخت می‌لَرزِید. ۱۰اوخته عِزرای پیشوا باله شُده دَزوا گُفت: ”شُمو خیانَت کدید، چُون قد خاتُونوی بیگَنه توی کده گُناهِ اِسرائیل ره کَلو کدید. ۱۱پس آلی دَ پیشِ خُداوند، خُدای بابه‌کَلونای خُو دَ گُناهِ خُو اِعتراف کُنِید و خاست-و-اِرادِه ازُو ره دَ جای بیرِید و خودون ره از مردُمای امزی سرزمی و خاتُونوی بیگَنه جدا کُنِید.“ ۱۲تمامِ جماعت دَ آوازِ بِلند دَ جواب شی گُفت: ”صَحیح اَسته؛ امُو رقم که گُفتی، مو امُو رقم مُونی. ۱۳لیکِن مردُم غَدر کَلو یَه و دَ امزی غَیت بارِش ام اَسته؛ مو نَمِیتَنی دَ امزی جای سرواز ازی کَلو ایسته شُنی. و اِی کار، کارِ یگ روز و دُو روز نِییه، چُون غَدر مو دَ امزی باره گُناه کدے. ۱۴اِجازه بِدی که کٹه‌کَلونای مو از تمامِ جماعت نُمایندَگی کنه و تمامِ کسای که دَ شارای مو خاتُونوی بیگَنه گِرِفته، دَ وختای مُعیَّن حاضِر شُنه و رِیش سفیدا و قاضی های هر شار ام قد ازوا قَتی بییه، تا شِدَّتِ قارِ خُدای مو دَزی باره از بَلِه مو دُور شُنه.“ ۱۵تنها یوناتان باچِه عَسائیل و یحزیا باچِه تِقوَه قد امزی پیشنِهاد مُخلِافت کد و مِشُلام و شَبِتائی لاوی ام ازوا پُشتِیوانی کد.
۱۶پس اسِیرای پس اَمدَگی امُو رقم کد که پیشنِهاد شُد. عِزرای پیشوا مَردای ره که کٹه‌کَلونای اَولادِ بابه‌ها بُود، دَ مُطابِقِ اَولادِ بابه های ازوا اِنتِخاب کد و نام های ازوا ره نوِشته کد. اُونا دَ روزِ اوّلِ ماهِ دَهُم یگ نِشَست برگُزار کد تا مَوضوع ره بررَسی کنه ۱۷و دَ روزِ اوّلِ ماهِ اوّل بررَسی خُو ره دَ بارِه تمامِ مَردای که خاتُونوی بیگَنه گِرِفتُد، دَ آخِر رَسَند.
۱۸دَ مینکلِ باچه های پیشوایو ام مَردای پَیدا شُد که خاتُونوی بیگَنه گِرِفتُد. از اَولادِه یِشُوعَ باچِه یوصاداق و بِرارون شی: مَعَسیا، اِلیعِزِر، یارِیب و گِدَلیا. ۱۹اُونا قَول دَده وعده کد که خاتُونوی خُو ره ایله مِیدیه و هر کُدَمِ ازوا یگ قُوچ دَ عِنوانِ قُربانی جُرم بَلدِه جُرم خُو تقدِیم کد.
۲۵از باقی اِسرائیلیا:
۴۴پگِ امزیا خاتُونوی بیگَنه گِرِفتُد و بعضی از خاتُونوی ازوا صاحِبِ باچه ها ام شُدُد.