۱ملایکِه خُداوند از جِلجال دَ بوکِیم رفت و گُفت: ”شُمو ره از مِصر بُرو اَوُردُم و دَ سرزمِینی که دَ بابه‌کَلونای شُمو قَسم خورده بُودُم داخِل کدُم و گُفتُم، ’عهد خُو ره هرگِز قد شُمو مَیده نَمُونُم؛ ۲و شُمو ام قد باشِنده های امزی سرزمی عهد بسته نَکنِید، بَلکِه قُربانگاه های ازوا ره چَپه کنِید.‘ مگم شُمو از اَید مه نَشُدِید. اِی چی کار بُود که کدِید؟ ۳امزی خاطر آلی مُوگیُم که ما اُونا ره از پیشِ رُوی شُمو هَی نَمُونُم؛ اُونا بَلدِه بغلای شُمو خار جور مُوشه و خُدایونِ ازوا بَلدِه شُمو دام اَسته.“ ۴وختِیکه ملایکِه خُداوند امی تورا ره دَ پگِ بَنی اِسرائیل گُفت، قَوم آواز خُو ره بِلند کده چخرا کد. ۵امزی خاطر اُونا اُونجی ره بوکِیم نام کد. اُونا دَ اُونجی بَلدِه خُداوند قُربانی تقدِیم کد.
۶وختِیکه یوشِع قَوم ره رُخصَت کد، بَنی اِسرائیل هر کُدَم شی دَ مُلک خُو رفت تا سرزمِین خُو ره تَصَرُف کنه. ۷قَومِ اِسرائیل دَ تمامِ روزای زِندگی یوشِع و دَ تمامِ روزای زِندگی رِیش سفیدای که بعد از یوشِع هنوز زِنده بُود، خُداوند ره عِبادت کد، چُون اُونا پگِ کارای بُزُرگ ره که خُداوند بَلدِه اِسرائیل کده بُود، دِیدُد. ۸یوشِع باچِه نُون خِدمتگارِ خُداوند دَ سِنِ یگ صد و دَه سالَگی فَوت کد. ۹و اُونا اُو ره دَ زمِینی که تقسِیمِ خود شی بُود، دَ تِمنه-حارس دَ کوھِستونِ اِفرایم، دَ شمالِ کوهِ جاعَش دَفن کد. ۱۰امُو نسل ام پگ شی فَوت کده قد بابه‌کَلونای خُو یگجای شُد و بعد ازوا یگ نسلِ دِیگه دَ وجُود اَمَد که نَه خُداوند ره مِیشنَخت و نَه از کاری که اُو بَلدِه اِسرائیل کدُد، خبر دَشت.
۱۱اوخته بَنی اِسرائیل چِیزای ره که دَ نظرِ خُداوند زِشت بُود، انجام دَد و بُت های بَعل ره عِبادت کد. ۱۲اُونا خُداوند، خُدای بابه‌کَلونای خُو ره که اُونا ره از سرزمِینِ مِصر بُرو اَوُردُد، ایله کد و از خُدایونِ بیگَنه از خُدایونِ قَوم های که دَ گِرد-و-بَرِ ازوا بُود پَیرَوی کده اُونا ره سَجده کد؛ دَمزی رقم اُونا قارِ خُداوند ره باله اَوُرد. ۱۳ازی که اُونا خُداوند ره ایله کده بَعل و عَشتاروت ره پرستِش کد، ۱۴آتِشِ غَضَبِ خُداوند دَ خِلافِ اِسرائیل دَر گِرِفت و اُونا ره دَ دِستِ غارَتگرا دَد تا اُونا ره غارَت کنه. اُو اُونا ره دَ دِستِ دُشمنای گِرد-و-بَر ازوا دَده سَودا کد تا دِیگه نَتَنه دَ برابرِ دُشمنای خُو ایسته شُنه. ۱۵اُونا ھر جای که بَلدِه جنگ مورفت، دِست خُداوند دَ ضِدِ ازوا بُود تا دَزوا بَدی بِرسَنه، امُو رقم که خُداوند گُفتُد و امُو رقم که خُداوند دَزوا قَسم خوردُد. اَرے، اُونا دَ پریشانی-و-مُشکِلاتِ سخت گِرِفتار بُود.
۱۶اوخته خُداوند رهبرا ره تعیِین کد و اُونا بَنی اِسرائیل ره از دِستِ غارَتگرا نِجات دَد. ۱۷لیکِن اُونا از اَیدِ رهبرای خُو ام نَشُد، چُون اُونا فاحِشه‌گری کده از پُشتِ خُدایونِ بیگَنه رفت و اُونا ره سَجده کد. اُونا دَ زُودی امزُو راه بُر شُد، که بابه‌کَلونای ازوا دَ مُطابِقِ ازُو رفتار کدُد و از احکامِ خُداوند اِطاعَت کدُد. اَرے، اُونا رقمِ بابه‌کَلونا رفتار نَکد. ۱۸ھر وختِیکه خُداوند یگ رهبر ره دَ بَلِه ازوا تعیِین مُوکد، اُو قد رهبر مُوبُود و قَوم ره دَ تمامِ روزای زِندگی رهبر از دِستِ دُشمنای ازوا نِجات مِیدَد، چُون خُداوند بخاطرِ ناله-و-فریادِ ازوا که از دِستِ ظالِما و سِتَمگرا مُوکد، دَ بَلِه ازوا رَحم مُوکد. ۱۹مگم غَیتِیکه رهبر فَوت مُوکد، اُونا رُوی مِیگَشتَند و از آته‌گون خُو کده کَلوتر فاسِد مُوشُد و از خُدایونِ بیگَنه پَیرَوی کده اُونا ره عِبادت و سَجده مُوکد. اُونا از کارای خُو و راه های یاغِیگری خُو دِست نَمِیکَشِید.
۲۰امزی خاطر آتِشِ غَضَبِ خُداوند دَ بَلِه اِسرائیل داغ شُد و خُداوند گُفت: ”ازی که اِی قَوم عهد مَره که قد بابه‌کَلونای ازیا بسته کده بُودُم، مَیده کد و از اَید مه نَشُد، ۲۱ما ام دِیگه هیچ کُدَمِ امزی مِلَّت ها ره از پیشِ رُوی ازیا هَی نَمُونُم، مِلَّت های ره که یوشِع هَی نَتنِست و خود شی مُرد. ۲۲ ما اِی کار ره مُونُم تا بَنی اِسرائیل ره آزمایش کنُم که آیا اُونا دَ مُطابِقِ راه-و-طرِیقِ ازمه رفتار مُونه، رقمی که بابه‌کَلونای ازوا رفتار مُوکد، یا نَه.“ ۲۳پس خُداوند امُو مِلَّت ها ره باقی ایشت؛ اَرے، اُو اُونا ره دِستی هَی نَکد و دَ دِستِ یوشِع تسلِیم نَکد.